Read Ma'anyan MARKUS 12 Bible Online

MARKUS 12 - Ma'anyan bible

MARKUS 12

¹Kamulek Yesus mulai bapaner makai rarapisan ma kawam imam kapala, kawan guru agama anri kawan pamimpin Yahudi yiru. Yesus kaeau, “Naan erang kaulun ngamule anggur hang erang kalamar kabun, balalu ngulah pagar kalilingni. Udi yiru hanye ngadi luwang uneng ngameh anggur, balalu hanye ngapinri isa sani unengan panganrean. Udi yiru hanye ngakarun kabun anggur yiru ma papire kaulun sa ngarajani balalu hanye tulak hampi daerah lain.

²Dami haut hampe wayahni mutik wua anggur, ulun yiru ngirim erang kaulun palayanni nunung kawam ulun sa ngaraja kabun yiru, neu narime bagianni.

³Kude kawan ulun sa ngaraja kabun yiru nyamba palayan yiru. Udi hie here meweh hanye, balalu nunyu hanye mudi wawelang.

⁴Balalu sa ampun kabun yiru ngirim lagi erang kaulun palayanni sa lain. Kude kawan ulun sa ngaraja kabun yiru mangkung ulu palayan yiru, balalu ngusir hanye nelang ngeau nangkurun hanye.

⁵Ampun kabun yiru ngirim lagi erang kaulun palayanni sa lain. Kude here munu palayan yiru. Kala yiru here santar naya rama palayan sa lain pada: naan sa naweweh nelang naan pada sa nawunu.

⁶Itati hie lagi sa tau nakirim daya ampun kabun yiru? Ekat malee erang kaulun, hanyeyiru anakni raerai sa nasintani. Jari panampukenni hanye ngirim anakni yiru nunung kawan ulun sa ngaraja kabun yiru. ‘Himat anakku sagar nahormat,’ pikirni.

⁷Kude kawan ulun sa ngaraja kabun yiru kaeau anri sameh here, ‘Iti hanye ahli warisni. Hayu takam munu hanye, nampan takam kaiyuh warisni!’

⁸Balalu anakni yiru najamba, palus nawunu. Bangkaini naumpe here ma luar kabun yiru.”

⁹Balalu Yesus nunti, “Inun sa sagar naulah daya ampun kabun yiru? Himat hanye sagar hawi palus munu kawan ulun sa ngaraja kabun yiru, balalu nyarah kabun yiru ma kawan ulun lain sa ngaraja kabun yiru.

¹⁰Naun batantu haut mambasa ayat yiti hawuang Surat Barasis, ‘Watu sa puang tapakai daya kawan tukang bangunan haut jari watu sa panga mambatang.

¹¹Iti pagawian Tuhan; tuu leha kaehni!’ ”

¹²Maka kawan pamuka bangsa Yahudi sa karengei rarapisan yiru, ngunu nyamba Yesus, daya here kataru rarapisan yiru natuju Yesus ma here. Kude here takut anri ulun rama. Balalu, here tulak nanan Yesus.

¹³Papire kaulun Farisi anri papire kaulun wat Herodes nahuyu hanjabak Yesus makai kawan tuntian.

¹⁴Here hawi nunung Yesus palus kaeau, “Guru, kami karasa hanyu jujur nelang puang nyanrengei pandapat hie-hie. Hanyu ngajar anri tarang tarus neu kabahumen Alatalla ma murunsia, daya hanyu puang ninung wangun ulun. Nah, suba hanyu iwara ma kami, ‘Manurut aturan agama takam, inun iyuh bayar pajak ma Kaisar atawa puang? Inun takam harus bayar pajak yiru, atawa puang?’ ”

¹⁵Yesus karasa here yiru pura-pura. Hanye nuing, “Daya inun naun hamen hanjabak aku? Suba tantarang ma aku erang kadiki duit perak.”

¹⁶Maka here ngami ma hanye erang kadiki duit perak. Balalu Yesus nunti, “Gambar nelang ngaran hie yiti?” “Kaisar,” tuing here.

¹⁷“Nah, amun kalayiru,” eau Yesus, “ami ma Kaisar inun sa wat Kaisar, nelang ma Alatalla inun sa wat Alatalla.” Here wauh karengei eauni.

¹⁸Papire kaulun teka golongan Saduki hawi nunung Yesus. (Here yiru golongan sa bapandapat ulun matei puang sagar welum kamulek.)

¹⁹“Guru,” eau here ma Yesus, “Hi Moses nyurat hukum yiti ma takam: ‘Amun erang kaulun upu matei nelang hanye puang uweng anak, maka pulaksanaini harus narangan walu pulaksanaini yiru nampan ngami katurunan ma ulun sa haut matei yiru.’

²⁰Suah naan pitu kaulun ipulaksanai. Sa taraulu narangan, balalu matei puang uweng baanak.

²¹Udi hie sa karueh narangan waluni, kude hanye pada matei puang uweng baanak. Kalayiru pada anri pulaksanai sa katelu,

²²nelang pada hampe ma sa kapitu. Lawu lawini wawei yiru pada matei.

²³Hang anrau ulun matei kaelan welum mulek, darangan hie wawei yiru? Daya kapapitu here haut narangan hanye!”

²⁴Yesus nuing, “Naun tuu hala. Daya naun puang kataru lengan Surat Barasis atawa kuasa Alatalla.

²⁵Daya amun kawan ulun matei kaelan welum mulek, here puang sagar narangan lagi, malengkan here sagar welum kala malekat hang surga.

²⁶Nelang neu ulun matei naele welum mulek, inun huan suah naun mambasa hawuang kitab Moses neu jubut sa malelap yiru? Hang wuang kawan ayat yiru nasurat Alatalla kaeau ma hi Moses, ‘Aku Alatalla Abraham, Alatalla Ishak nelang Alatalla Yakub.’

²⁷Alatalla yiru puang Alatalla ulun matei. Hanye Alatalla ulun welum. Naun tuu hala!”

²⁸Balalu hawi erang kaulun guru agama nyanrengei papaneran Yesus anri kawan ulun teka golongan Saduki yiru. Guru agama yiru karengei Yesus haut nuing lengan kawan ulun yiru anri maeh. Balalu hanye nunti ma Yesus, “Parentah awe sa panga mambatang teka katuluh parentah?”

²⁹Yesus nuing, “Parentah sa mambatang, hanyeyiru: ‘Rengei, u bangsa Israel! Tuhan Alatalla takam, Tuhan yiru tungkan.

³⁰Sinta Tuhan Alatallanu anri sagalis ateinu, anri sagalis amiruenu, anri sagalis kapintaren, nelang anri sagalis kakuatennu.’

³¹Parentah sa karueh hanyeyiru: ‘Ware hanyu sinta sasamehnu murunsia, kala hanyu sinta tenga dirinu raerai.’ Puang uweng lagi parentah lain sa labis mambatang hengka karueh parentah yiru.”

³²Balalu guru agama yiru kaeau ma Yesus, “Tangar tuu, Guru! Samula tuu inun sa naeaunu: Ekat Tuhan Alatalla sa tungkan, nelang puang uweng lagi Alatalla sa lain.

³³Nelang murunsia harus sinta ma Alatalla anri sagalis ateini, kamulek anri sagalis kapintarenni nelang anri sagalis kakuatenni. Kamulek hanye pada harus sinta ma sasamehni murunsia kala hanye sinta dirini raerai. Yiru labis maeh teka katuluh masam parapah.”

³⁴Yesus karengei guru agama yiru haut nuing anri maeh tatuu. Balalu Yesus kaeau ma hanye, “Hanyu haut ane jari ulun wat Alatalla.” Udi yiru puang sunah erang kaulun sa heei itunti lagi ma Yesus.

³⁵Tawuk ngajar hang Lewu Tuhan, Yesus nunti, “Kala awe kawan guru agama tau kaeau Raja Panyalamat yiru katurunan Dawid?

³⁶Padahal hi Dawid raerai — daya gana nailham daya Roh Alatalla — kaeau, ‘Tuhan kaeau ma Tuhanku: maharung hang tiba kawanku hampe aku ngulah kawan musuhnu takluk ma hanyu.’

³⁷Jari amun hi Dawid ngantuh Raja Panyalamat yiru ‘Tuhan’, puang maka tau pada hanye katurunan Dawid?” Ulun rama sa naan hang Lewu Tuhan yiru sanang nyanrengei Yesus ngajar.

³⁸Hanye kaeau ma here, “Hati-hati anri kawan guru agama. Here sindi takia makai jubah sa ambau nelang sindi nahormat hang pasar.

³⁹Here sindi kawan unengan sa tahormat hawuang lewu sumbayang anri hang kawan pesta.

⁴⁰Here nipu kawan walu nelang hanrampas lewuni. Kamulek pakai nutup kajahaten here yiru, here badoa ambau. Hukuman ma here yati maweat!”

⁴¹Tawuk maharung hang pintangan pati pangamian hang Lewu Tuhan, Yesus naniuh kawan ulun sa namasuk duit here mawuang pati yiru. Rama ulun tatau namasuk wahai duit;

⁴²balalu erang kaulun wawei walu paua hawi pada. Hanye namasuk rueh kadiki duit tamaga, hanyeyiru duit receh sa pangarumis haragani.

⁴³Balalu Yesus nerau kawan ulun sa umba hanye balalu kaeau ma here, “Taniuh yiti: Wawei walu paua yiru namasuk mawuang pati yiru labis wahai teka sa natamasuk daya katuluh kawan ulun lain.

⁴⁴Daya here katuluh ngami teka kalabihan haratani. Kude wawei walu yiru biar paua tuu hanye ngami katuluh sa naan hang hanye — likan sa naparlu tatuu dayani pakai welum.”