Read Ma'anyan MARKUS 13 Bible Online

MARKUS 13 - Ma'anyan bible

MARKUS 13

¹Tawuk Yesus nanan Lewu Tuhan, erang kaulun hengka kawan ulun sa umba hanye kaeau, “Guru, suba dinung kawan bangunan yiru. Taniuh kawan watuni. Tuu leha kaehni!”

²Yesus nuing, “Angneh, hanyu kadinung kawan bangunan sa hante yiru? Puang sunah erang kawuding watu teka kawan bangunan yiru sagar magun ipasusun hang paunenganni. Katantuluhni sagar rusak ramuk rakai.”

³Udi yiru Yesus tulak hampi Bukit Zaitun, palus maharung hang unengan sa bahadapan anri Lewu Tuhan. Balalu hi Petrus, hi Yakobus, hi Yohanes anri hi Andreas hawi nunung hanye neu bapaner anri hanye sara pribadi.

⁴“Suba hanyu iwara ma kami,” eau here ma hanye, “Hantamian katuluhni yiru sagar jari? Nelang inun kawan tanda sa iwara neu wayahni haut hampe?”

⁵“Hati-hati,” tuing Yesus, “ada hampe naun tatipu.

⁶Rama ulun sagar hawi makai ngaranku nelang kaeau, ‘Aku yiti Yesus!’ balalu nipu rama ulun.

⁷Amun naun karengei kawan lengan ulun babur nelang kawan kabar paparangan, ada takut. Katantuluh yiru harus jari, kude yiru puang baarati wayahni kiamat haut hampe.

⁸Bangsa saisa sagar babur nawan bangsa sa lain. Nagara saisa sagar manyarang nagara sa lain. Hang awe-awe sagar naan gempa bumi, naan juju-lau. Katuluhni yiru wau panukuanni, kala hanang sa naingkam daya erang kaulun wawei tawuk kai bagenda.

⁹Naun harus hati-hati, daya naun sagar najamba palus nainsing ma kawan pangadilan. Naun sagar naweweh hang kawan lewu sumbayang. Naun sagar nainsing mangadap kawan panguasa anri kawan raja daya gana naun ulun sa umba aku. Kude yiru kasampatan ma naun umak ngami kasaksian neu aku ma here.

¹⁰Kabar Maeh teka Alatalla yiru musti nawara dahulu ma katuluh bangsa.

¹¹Nelang amun naun najamba palus nainsing ma pangadilan, ada gaer neu inun sa harus napantane naun. Amun haut hampe wayahni neu bapaner, antuh inun sa nawara ma naun hang tawukni naun bapaner. Daya kawan lengan sa naantuh naun yiru puang lengan naun raerai, malengkan hawi teka Roh Alatalla.

¹²Ulun sagar mahianat pulaksanaini nampan nawunu. Yiru pada sa sagar jari ma ambah anri anakni. Kawan anak sagar nawan ineh-ambahni, palus nyarah here nampan nawunu.

¹³Naun sagar nakuar daya ulun katuluh daya gana naun ulun sa umba aku. Kude ulun sa batahan hampe pijumpuhanni, sagar nasalamat.”

¹⁴“Naun sagar kadinung ‘Kajahaten sa ngampi hansur’ minri hang unengan sa nauring ma hanye. (Catatan ma pambasa: Pantaru inun aratini!) Tawuk yiru ulun sa naan hang Yudea harus nempat ma pagunungan.

¹⁵Ulun sa naan hang ambau hapau lewu ada minau nelang masuk mawuang lewu neu ngalap inun heneng.

¹⁶Ulun sa naan hang ume ada mudi lepuh ngalap jubahni.

¹⁷Tuu leha sanringinenni kawan anrau yiru ma kawan wawei sa mihuwuntung nelang ineh sa magun ngampumu anakni!

¹⁸Ware badoa nampan katantuluh yiru ada jari hang wayah panguran.

¹⁹Hang kawan anrau sa maka sanringinen yiru sagar naan isa kasusahen sa huan suah naingkam, nuku hengka Alatalla ngulah dunia hampe itati, nelang pada puang sagar jari lagi.

²⁰Atikala Alatalla puang ngapimbe wayah yiru, himat puang uweng sunah erang kaulun sa nasalamat. Kude gana ulun watni Alatalla ngapimbe wayah yiru.

²¹Tawuk yiru amun erang kaulun kaeau ma naun, ‘Dinung, Raja Panyalamat yiru naan hang yiti!’ atawa ‘Dinung, hanye naan hang yaru!’ — ada parisaya ma ulun yiru.

²²Daya kawan panyalamat palasu anri kawan nabi palasu sagar hawi. Here sagar ngulah kawan pagawian luar biasa anri kawan kaajaiban umak nipu amun tau nipu, ulun wat Alatalla pada.

²³Jari, hati-hati! Katantuluhni yiru haut nawaraku ma naun kapihuan hal yiru jari.”

²⁴“Udi wayah kasusahen yiru, mate anrau sagar jari maieng, nelang wulan puang lagi basahaya.

²⁵Kawan wawahiang sagar lawu teka langit, nelang kawan panguasa hang langit sagar jari kacau-balau.

²⁶Tawuk yiru Anak Murunsia sagar dinung hawi hang awan makai kuasa sa hante nasinrah anri pihante mulia.

²⁷Hanye sagar ngutus kawan malekat neu ngumpul ulun pidianni teka kaepat pusing dunia, teka kawan hujung tang ma kawan hujung langit.”

²⁸“Alap palajaran teka kakau ara. Amun kawan jangkengni kakuring nelang maleme, anri nuku naruk muda, naun karasa himat musim kamarau haut rupak.

²⁹Kala yiru pada amun naun kadinung katantuluh yiru jari, naun karasa himat wayahni haut rupak tatuu.

³⁰Wuah naun karasa! Katantuluh yiti sagar jari kapihuan kawan ulun welum itati matei katuluhni.

³¹Langit anri tane sagar wawai mahinam, kude lenganku tatap hampe kalalawahni.”

³²“Biar kala yiru, puang sunah erang kaulun karasa hantamian anrauni atawa hantamian jamni. Kawan malekat hang surga pada puang karasa kala yiru pada Anak, ekat Ambah sa karasa.

³³Jari naun harus bajaga nelang hati-hati, daya naun puang karasa hantamian wayahni.

³⁴Kaadaanni sameh kala erang kaulun sa nanan lewuni balalu tulak hampi unengan sa lawit. Hanye nunyu kawan palayanni ngurus lewuni, nelang ngami tugas ma here maisasaan. Ma panyaga wawanawang, hanye ipesen nampan bajaga maeh-maeh.

³⁵Daya yiru naun harus bajaga, daya naun puang karasa hantamian ampun lewu yiru sagar hawi-tau kariwe anrau, tau pada penah malem, tau pada tawuk subuh, atawa tau pada hang tawuk matei anrau hulet.

³⁶Amun hanye hawi nyalenga, ada hampe hanye kasasat naun ganjah manre.

³⁷Inun sa naeauku yiti ma naun, naeauku pada ma katuluh ulun: ware naun bajaga!”