Read Ma'anyan MARKUS 14 Bible Online

MARKUS 14 - Ma'anyan bible

MARKUS 14

¹Rueh anrau lagi Anrau Paskah nelang Parayaan Rote Puang Baragi. Kawan imam kapala anri kawan guru agama rahat ngantara lalan neu nyamba Yesus anri suni-suni, nampan munu hanye.

²“Kude ada takam nampalus yiru hang tawuk parayaan,” eau here, “daya die timbul pirawekan.”

³Tawuk Yesus naan hang Betania, hang lewu Simon sa dahulu hie bapanyakit kadan, erang kaulun wawei hawi nunung hanye. Hanye nginsing minyak marauh enguh sa rarang hawuang isa bakam teka pualam, minyak yiru naulah teka wakat kayu. Tawuk Yesus rahat maharung kuman, wawei yiru nyaneah bakam yiru palus nalui minyak marauh enguh yiru ma ulu Yesus.

⁴Papire kaulun sa naan hang yiru balalu sangit nelang kaeau anri sasameh here, “Inun riranni minyak marauh enguh yiru natahayang?

⁵Minyak yiru tau naari anri haraga labis teka telu jatuh duit perak, nelang duitni naami ma ulun paua!” balalu here sangit anri wawei yiru.

⁶Kude Yesus kaeau, “Elahni hanye! Wuah inun naun mada hanye? Hanye nampalus ala sa maeh nelang na tawat ma aku.

⁷Ulun paua saratang naan hang penah naun. Tiap tawuk amun naun hamen, naun tau ngarawah here. Kude aku puang kalalawahni naan baya anri naun.

⁸Wawei yiti haut nampalus inun sa iyuhni nampalus. Hanye haut natap nyadia aku makai minyak marauh enguh neu ma anrau aku napasar badahulu teka wayahni.

⁹Parisayaleh! Hang litar dunia, hang awe Kabar Maeh teka Alatalla nawara, pagawian wawei yiti sagar nasarita pada nampan pakai ngitung hanye.”

¹⁰Balalu hi Yudas Iskariot, erang kaulun teka kadua walas ulun sa umba Yesus, tulak nunung kawan imam kapala ngaheng makhianat Yesus ma here.

¹¹Here sanang tuu karengei tawaran yiru, palus bajanji sagar ngami duit ma hi Yudas. Balalu hi Yudas mulai ngantara kasampatan neu makhianat Yesus.

¹²Hang anrau palanungkai Parayaan Rote Puang Baragi — tawuk ulun nyamalis babiri Paskah — kawan ulun sa umba Yesus nunti ma hanye, “Hang awe hanyu hamen kami nyadia kutaen Paskah ma hanyu?”

¹³Balalu Yesus nunyu rueh kaulun hengka here, “Kia hampi tumpuk, hang yaru naan erang kaulun upu ganjah ngantung isa kandi mahuang ranu, sagar panalu anri naun. Taharak hanye

¹⁴ma lewu sa naasukni palus eau ma ampun lewu yiru, ‘Guru nunti, hang awe unengni baya kawan ulun sa umba hanye sagar nguta kutaen Paskah.’

¹⁵Ulun yiru sagar nutui ma naun isa ruangan hante hang ambau. Ruangan yiru haut nasadia, sukup anri kawan parabotni. Sadia katuluhni hang yaru ma takam.”

¹⁶Balalu karueh ulun sa umba Yesus yiru tulak hampi tumpuk. Hang yaru here panalu katuluhni tuu kala sa naeau daya Yesus. Balalu here pada nyadia kutaen Paskah.

¹⁷Malem yiru Yesus hawi baya kadua walas kaulun ulun sa umba hanye.

¹⁸Rahat here maharung kuman, Yesus kaeau, “Rengei: erang kaulun teka naun, sa itati kuman sinrah baya aku sagar makhianat aku.”

¹⁹Karengei yiru, kawan ulun sa umba Yesus balalu mahanang atei tatuu. Balalu tiap tenga here baganti nunti ma Yesus, “Batantu puang aku sa naeau dayanu?”

²⁰Yesus nuing, “Hanye erang kaulun teka naun dua walas yiti, sa kuman mira lumbah baya aku.

²¹Samula Anak Murunsia sagar matei kala sa nasurat hawuang Surat Barasis. Kude leha silakani ulun sa makhianat Anak Murunsia yiru! Labis maeh ma ulun yiru jaka hanye budas puang nakayaan!”

²²Tawuk here rahat kuman, Yesus ngalap rote palus badoa ngantuh tarima kasih ma Alatalla. Udi yiru hanye miah nyanarai rote yiru makai tanganni, balalu ngami ma kawan ulun sa umba hanye nelang kaeau, “Alap kuta, yiti tengaku.”

²³Udi yiru hanye ngalap isa sangkir anggur. Hanye badoa ngantuh tarima kasih ma Alatalla, balalu ngami sangkir yiru ma kawan ulun sa umba hanye. Udi yiru here katuluh nguut anggur yiru.

²⁴Udi yiru Yesus kaeau, “Iti iraku sa nyantuhun janji Alatalla, ira sa nahalui ma ulun rama.

²⁵Parisayaleh: Aku puang sagar nguut anggur yiti lagi, hampe hang wayah aku nguut anggur isa wau sinrah naun hang Dunia Wau wat Ambahku.”

²⁶Udi yiru here manyanyi isa nyanyian pakai nawat mahormat. Balalu udi hie here tulak ma Bukit Zaitun.

²⁷Udi yiru Yesus kaeau ma here, “Naun katuluh sagar nempat nanan aku. Daya hawuang Surat Barasis naan nasurat, ‘Alatalla sagar munu pakatikni, balalu sawayan babirini sagar pasai pau.’

²⁸Kude udi aku naele welum mulek, aku sagar tulak nahuluan naun ma Galilea.”

²⁹“Puang” tuing Petrus, “biar here katuluh uras nanan hanyu, aku budas puang nanan.”

³⁰“Itung,” eau Yesus, “malem yiti pada, kapihuan manu nanru sa karueh kali, hantelu kali hanyu ngidim aku.”

³¹Anri tegas hi Petrus nuing, “Biar aku harus matei sinrah baya hanyu, aku himat puang sagar kaeau aku puang kataru hanyu!” Balalu kawan ulun sa umba Yesus sa lain kaeau kalayiru pada.

³²Here hampe hang isa unengan bangaran Getsemani, balalu Yesus kaeau ma kawan ulun sa umba hanye, “Maharung hang yiti padingian aku lepuh badoa.”

³³Balalu Yesus nuntut hi Petrus, hi Yakobus anri hi Yohanes tulak baya anri hanye. Hanye nuku kaingkam mahanang atei nelang balisah.

³⁴“Ateiku mahanang tuu,” eau Yesus ma here, “ingkamku yalah kai matei. Uneng hang yiti nelang bajaga!”

³⁵Yesus tulak lawit butit balalu ileku hang tane palus badoa. Hawuang doani hanye laku amun iyuh hanye puang usah kaingkam wayah kahanangen yiru.

³⁶“Ambah, U Ambah,” eauni, “puang uweng sunah isa, sa mustahil ma hanyu. Idar kahanangen yiti teka aku. Ekatni ada eleh manyu kabahumenku malengkan kabahumen Ambah.”

³⁷Udi yiru Yesus miulek palus kasasat kawan ulun sa umba hanye rahat manre. Hanye kaeau ma hi Petrus, “Simon, inun hanyu manre? Ekat erang jam, hanyu puang kaule bajaga?”

³⁸Balalu Yesus kaeau ma here, “Ware naun bajaga, nelang badoa nampan naun puang kaingkam wuah purija. Samula roh naun hamen nampalus sa patut, kude naun puang sanggup daya tabiat murunsia yiru maleme.”

³⁹Hinra lagi Yesus tulak badoa anri ngantuh kawan lengan sa sameh.

⁴⁰Udi yiru hanye mulek lagi nunung kawan ulun sa umba hanye palus kasasat here lagi rahat manre, daya here siruru tatuu. Hampe here puang karasa inun sa harus naeau here ma Yesus.

⁴¹Tawuk Yesus sa katelu kalini mulek nunung here, hanye kaeau, “Inun naun manre lagi nelang baranai? Sukup! Haut hampe wayahni Anak Murunsia nasarah ma tangan kawan ulun badosa.

⁴²Ambuan, hayu takam tulak. Dinung! Ulun sa makhianat aku haut hawi!”

⁴³Parahatan Yesus bapaner, hawi hi Yudas, erang kaulun teka kadua walas ulun sa umba hanye yiru. Sinrah anri hanye, hawi pada ulun rama sa nginsing taruh padang anri gagada. Here nautus daya kawan imam kapala, kawan guru agama anri kawan pamimpin Yahudi.

⁴⁴Hi Yudas haut nukas isa tanda ma here. “Ulun sa nasiukku,” eauni ma here, “hanyeyiru ulunni. Jamba hanye palus insing hanye nelang jaga bahimat.”

⁴⁵Tawuk hi Yudas hawi, hanye palus nunung Yesus nelang kaeau, “Guru!” udi hie hanye balalu nyiuk Yesus.

⁴⁶Balalu kawan ulun sa hawi sinrah baya hi Yudas yiru nyamba Yesus palus hanrantai hanye.

⁴⁷Kude isa teka here sa naan hang yiru nyintak taruh padangni palus nampek walah imam hante hampe siluni witus.

⁴⁸Balalu Yesus kaeau ma here, “Inun aku yiti panjahat, hampe naun hawi makai taruh padang anri gagada neu nyamba aku?

⁴⁹Tiap anrau aku ngajar hang Lewu Tuhan hang hadapan naun, kude naun puang nyamba aku. Kude samula haut pipatutni kala yiru, nampan tulus inun sa nasurat hawuang Surat Barasis.”

⁵⁰Katuluh ulun sa umba hanye nempat nanan Yesus.

⁵¹Erang kaulun iya muda, sa ekat makai erang kalamar kain umak nutup tengani, umba Yesus. Kawan ulun rama hamen nyamba hanye pada,

⁵²kude hanye napas kainni yiru, balalu nempat nelang tabentur.

⁵³Yesus nainsing ma lewu imam hante. Hang yaru katuluh imam kapala, pamimpin Yahudi, anri guru agama rahat bakumpul.

⁵⁴Hi Petrus naharak Yesus hengka lawit hampe masuk ma natat lewu imam hante. Hang yaru hanye maharung minrus rite apui baya anri kawan pangawal.

⁵⁵Kawan imam kapala anri katuluh Pangadilan Agama ngakali nampan kaiyuh bukti sa ngampi hala Yesus nampan tau nyanawu hukuman mati ma hanye. Kude here puang kaiyuh bukti sunah isa.

⁵⁶Rama saksi sa naherau neu ngami kasaksian palasu nadap Yesus, kude kasaksian here puang sameh isa anri sa lain.

⁵⁷Balalu papire kaulun saksi minri palus ngami kasaksian palasu neu Yesus kalayiti,

⁵⁸“Kami karengei ulun yiti kaeau, ‘Aku sagar mungkar Lewu Alatalla yiti sa naulah daya murunsia, kamulek udi telu anrau, aku sagar ngamuan sa lain sa puang ulahan murunsia.’ ”

⁵⁹Kude kasaksian kawan ulun yiru sika puang sameh isa anri sa lain.

⁶⁰Maka imam hante minri hang hadapan here katuluh palus nunti ma Yesus, “Inun hanyu puang nuing kawan dawaan sa natuju ma hanyu?”

⁶¹Kude Yesus suni. Hanye budas puang nuing. Balalu imam hante yiru nunti hinra lagi ma hanye, “Inun hanyu Raja Panyalamat, Anak Alatalla Panga Barasis?”

⁶²“Aku Raja Panyalamat,” tuing Yesus, “kude naun katuluh sagar kadinung Anak Murunsia maharung hang tiba kawan Alatalla Isa Panga Barasis nelang hawi hang awan teka langit!”

⁶³Balalu imam hante ngirah pakaianni palus kaeau, “Puang parlu lagi saksi!

⁶⁴Naun haut karengei raerai kawan lenganni sa nangkurun Alatalla. Itati inun kaputusan naun?” Here katuluhni mamutus Yesus yiru hala, nelang patut nahukum mati.

⁶⁵Balalu papire kaulun nura Yesus, balalu here nutup mateini balalu nampar hanye, balalu kaeau, “Suba tangguh, hie sa nampar hanyu?” Kawan pangawal pada umba nampar Yesus.

⁶⁶Parahatan hi Petrus muneng hang natat, erang kaulun palayan wawei wat imam hante hawi ma yaru.

⁶⁷Tawuk hanye kadinung hi Petrus minrus rite apui, hanye bahimat naniuh uruwawa Petrus balalu kaeau, “Angneh hanyu pada baya Yesus ulun Nazaret yiru?”

⁶⁸Kude hi Petrus puang mangaku. “Aku puang karasa nelang puang kataru inun bahumnu,” eauni ma palayan yiru. Balalu hi Petrus tulak ma pintu gerbang lewu imam hante yiru. [Hang tawuk yiru manu nanru.]

⁶⁹Palayan wawei yiru ninung hi Petrus lagi, balalu kaeau pada ma ulun hang yiru, “Hanye samula erang kaulun hengka here!”

⁷⁰Kude hi Petrus puang mangaku lagi. Puang lawah udi yiru, kawan ulun hang yiru kaeau lagi ma hi Petrus, “Puang tau naidim lagi himat hanyu erang kaulun hengka here, daya hanyu teka Galilea!”

⁷¹Balalu hi Petrus mulai nyapa tenga nelang kaeau, “Aku puang kataru ulun sa nabahum daya naun yiru!”

⁷²Hang tawuk yiru pada manu nanru ma karueh kalini. Balalu hi Petrus kaitung neu Yesus haut kaeau ma hanye, “Kapihuan manu nanru karueh kali, hanyu hantelu ngidim aku.” Hi Petrus balalu nungkau.