Read Ma'anyan MARKUS 15 Bible Online

MARKUS 15 - Ma'anyan bible

MARKUS 15

¹Dami anrau maraai, katuluh Pangadilan Agama tamasuk kawan imam kapala, kawan pamimpin Yahudi anri kawan guru agama badadas barunding. Here hanrantai Yesus, udi yiru nginsing hanye balalu nyarah hanye ma hi Pilatus.

²Hi Pilatus nunti ma Yesus, “Inun tuu hanyu raja ulun Yahudi?” “Kala yiru eaunu” tuing Yesus.

³Kawan imam kapala iwara wahai dawaan nadap Yesus.

⁴Balalu hi Pilatus nunti lagi ma Yesus, “Inun hanyu puang hamen nuing? Suba dinung pire wahai dawaan sa nawara here neu hanyu!”

⁵Kude Yesus budas puang nuing lagi, hampe hi Pilatus wauh.

⁶Hang tiap Pesta Paskah, biasani hi Pilatus napas erang kaulun tahanan manyu pidian ulun rama.

⁷Hawuang panjara, hengka kawan pambaruntak sa munu ulun tawuk huru hara, naan erang kaulun bangaran hi Barabas.

⁸Ulun rama bakumpul nelang ilaku anri hi Pilatus nampan hanye napas erang kaulun tahanan kala biasa.

⁹Hi Pilatus nunti ma here, “Inun naun hamen, aku napas raja ulun Yahudi yiru ma naun?”

¹⁰Daya hi Pilatus kataru kawan imam kapala manyarah Yesus ma hanye daya here muar.

¹¹Kude kawan imam kapala makat ulun rama nampan laku hi Pilatus napas hi Barabas ma here.

¹²Balalu hi Pilatus kaeau lagi ma ulun rama yiru, “Amun kala yiru, inun sa harus naulahku ma ulun sa naantuh naun raja ulun Yahudi yiru?”

¹³Anri lengan mehet here kaeau, “Balasangar hanye!”

¹⁴“Kude inun kajahatenni?” tunti Pilatus. Balalu here kaeau lagi labis mehet, “Balasangar hanye!”

¹⁵Hi Pilatus hamen ngampi sanang atei ulun rama yiru, balalu hanye napas hi Barabas ma here. Udi yiru hanye nunyu ulun ngawalawas Yesus, balalu nyarah hanye nampan nabalasangar.

¹⁶Yesus nainsing daya kawan parajurit ma balai pangadilan hang istana gubernur. Udi yiru katuluh pasukan naherau bakumpul.

¹⁷Balalu here namu jubah warna ungu hang Yesus, here ngulah mahkota teka kawan lawei jangkeng barunrui, udi hie namuni ma ulu Yesus.

¹⁸Udi yiru here nabe hanye. “Tabe Raja ulun Yahudi!” eau here.

¹⁹Here nyatuk ulu Yesus makai tungkeh, balalu here nura hanye palus nyambah ijuku hang hadapan hanye.

²⁰Udi ngakiek Yesus, here nguka jubah ungu yiru balalu namu kamulek pakaianni. Udi hie hanye nainsing hampi luar tumpuk nampan nabalasangar.

²¹Hang penah lalan here mamaksa erang kaulun ngantung balasangar Yesus. Ulun yiru kabulujuran wau hawi teka desa ngunu masuk ma tumpuk. (Ngaranni hi Simon, — baasal teka Kirene — ambah wat Aleksander anri hi Rufus.)

²²Yesus nainsing hampi isa unengan sa bangaran Golgota, aratini “Uneng Kuruwangah”.

²³Hang yiru here ngami ma hanye anggur basampur anri mur, kude Yesus puang hamen nguut anggur yiru.

²⁴Udi yiru here nyalib hanye, balalu mambagi pakaianni makai undian umak nantu bagian maisasaan,

²⁵tawuk yiru pukul suei kaayat.

²⁶Hang ambau balasangarni napasang tulisan neu dawaan nadap hanye, kalayiti: “Raja Ulun Yahudi”.

²⁷Sinrah anri Yesus here pada nyalib rueh kaulun parampok; erang kaulun hang tuhi kawan, erang kaulun lagi hang tuhi kawini. [

²⁸Anri kala yiru tulus sa nasurat hawuang Surat Barasis; hanye yiru: “Hanye naanggap tamasuk kawan ulun jahat.”]

²⁹Kawan ulun sa mitah hang yiru igutik ulu nelang mahina Yesus. Here kaeau, “U, hanyu sa ngaheng mungkar Lewu Alatalla nelang ngambuanni hawuang telu anrau.

³⁰Suba inau teka balasangar yiru, salamat tenganu!”

³¹Kala yiru pada kawan imam kapala anri kawan guru agama ngakiek Yesus. Here kaeau anri sameh here, “Hanye nyalamat ulun lain, kude tengani raerai puang hanye kaiyuh nyalamat!

³²Amun hanye raja Israel, Raja Panyalamat, ware hanye itati minau teka balasangar yiru, nampan kami kadinung palus parisaya ma hanye!” Kawan ulun sa nabalasangar sinrah Yesus yiru pada mahina Yesus.

³³Hang penah anrau, salawah telu jam katuluh unengan yiru jari maieng-maituk.

³⁴Hang pukul telu kariwe, Yesus kaeau anri lengan mehet, “Eloi, eloi, lama sabakhtani?” sa baarati, “U Alatallaku, u Alatallaku, wuah inun hanyu nanan aku?”

³⁵Papire kaulun hang yiru karengei lengan yiru, balalu kaeau, “Rengei, hanye nerau hi Elia!”

³⁶Erang kaulun teka here hinang tulak ngalap kambang karang, balalu nyusupni mawuang anggur maasem. Udi hie kambang karang yiru nasusuk hang hujung wila kayu, balalu surungni ma wiwi Yesus, nelang kaeau, “Anrei, mara takam ninung inun hi Elia hawi ngampinau hanye teka balasangar yiru.”

³⁷Balalu Yesus nantiak palus matei.

³⁸Tenda sa nasinsi hawuang Lewu Tuhan sitat patuhi rueh teka ambau hampe imbe.

³⁹Parwira sa minri hang hadapan balasangar yiru, kadinung kala awe wangun Yesus matei. Parwira yiru kaeau, “Samula tuu ulun yiti Anak Alatalla!”

⁴⁰Hang yiru naan pada papire kaulun wawei sa nantau teka lawit katuluh yiru. Hengka here yiru naan hi Salome, hi Maria Magdalena, anri hi Maria ineh Yakobus sa iya anri hi Yoses.

⁴¹Here yiru kawan wawei sa umba nelang ngarawah Yesus tawuk hanye naan hang Galilea. Kamulek rama lagi kawan wawei lain hang yiru sa haut hawi teka Yerusalem sinrah Yesus.

⁴²Anrau haut nuku maieng tawuk hi Yosef teka Arimatea hawi. Hanye anggota Pangadilan Agama sa tahormat. Hanye pada ganjah nganrei wayahni Alatalla mulai marentah yalah Raja. Anrau yiru anrau ulun Basadia (hanyeyiru anrau kapihuan anrau Sabat.) Daya yiru hi Yosef puang takut mangadap hi Pilatus neu laku bangkai Yesus.

⁴³

⁴⁴Hi Pilatus wauh karengei Yesus haut matei. Balalu hanye nunyu ulun nerau kapala pasukan palus nunti ma hanye inun Yesus haut lawah matei?

⁴⁵Dami karengei laporan parwira yiru, hi Pilatus satuju hi Yosef ngalap bangkai Yesus.

⁴⁶Balalu hi Yosef midi kain kapan teka kain lena, udi ngampinau bangkai Yesus, hanye mungkusni makai kain yiru. Udi hie hanye ngelah bangkai yiru hawuang isa pasaran sa naulah hawuang bukit watu. Udi yiru hanye nyasar isa watu hante nutup wawa pasaran yiru.

⁴⁷Tawuk yiru hi Maria Magdalena anri Maria ineh Yoses ninung hang awe Yesus naelah.