Read Ma'anyan MARKUS 16 Bible Online

MARKUS 16 - Ma'anyan bible

MARKUS 16

¹Tawuk anrau Sabat haut paitah, hi Maria Magdalena, hi Maria ineh Yakobus, anri hi Salome tulak lepuh midi kasai pakai ngasai bangkai Yesus.

²Kaayat subuh tawuk mate anrau hulet, hang anrau palanungkai minggu yiru, here tulak ma pasaran.

³Hang penah lalan here kaeau anri sameh here, “Hie sa tau ngarawah takam nyasar watu panutup wawa pasaran?” Daya watu yiru hante tatuu. Kude dami here hampe hang yiru here kadinung watu yiru haut pasasar.

⁵Balalu here masuk mawuang pasaran yiru. Hawuangni hang tiba tuhi kawan, here kadinung erang kaulun muda makai jubah mahilak rahat maharung, balalu here embah tatuu.

⁶Ulun muda yiru kaeau, “Ada takut! Aku karasa naun ngantara Yesus ulun Nazaret sa haut nabalasangar. Hanye puang uweng hang yiti. Hanye haut kaelan welum mulek! Mara naun ninung, iti bakas uneng here ngangkading hanye.

⁷Itati hulu tulak, wara kabar yiti ma kawan ulun sa umba hanye, wara pada ma hi Petrus. Wara, ‘Hanye tulak dahulu teka naun hampi Galilea. Hang yaru naun sagar kadinung hanye, kala sa haut nawarani ma naun.’ ”

⁸Balalu here kaluar teka pasaran yiru palus nempat daya embah nelang takut. Here puang iwara inun-inun ma hie-hie, daya takut. [

⁹Udi Yesus kaelan welum mulek teka pampatei, kaayat subuh hang anrau Minggu, hanye palanungkai nantarang tenga ma hi Maria Magdalena. (Teka hi Maria Magdalena yiru suah Yesus ngaluar pitu roh jahat.)

¹⁰Maka hi Maria Magdalena balalu tulak iwara kajadian yiru ma kawan hengau Yesus, sa ganjah mahanang atei nelang nungkau.

¹¹Kude tawuk here karengei Yesus welum, nelang hi Maria haut kadinung hanye here puang parisaya.

¹²Udi yiru Yesus nantarang tenga ma rueh kaulun ulun sa umba hanye anri sara lain. Yiru jari tawuk rueh kaulun yiru rahat takia ma isa tumpuk.

¹³Balalu here miulek palus iwara hal yiru ma here lainni. Kude here puang parisaya.

¹⁴Akhirni, Yesus nantarang tengani ma kasawalas kaulun ulun sa umba hanye, tawuk here rahat kuman. Hanye nagur here daya here kurang kaparisayaan nelang kajut karas atei hampe puang parisaya ma kawan ulun sa here raerai haut kadinung Yesus haut welum.

¹⁵Balalu Yesus kaeau ma here, “Hulu kia ma katuluh dunia nelang wara Kabar Maeh teka Alatalla yiru ma katantuluh ulun murunsia.

¹⁶Ulun sa puang parisaya sagar nahukum. Kude ulun sa parisaya nelang nabaptis, sagar salamat.

¹⁷Jari bukti neu here parisaya, kawan ulun yiru sagar ngusir roh jahat makai ngaranku; here sagar bapaner makai kawan basa sa puang here kataru.

¹⁸Amun here negei anipe atawa nguut rasun, here puang sagar silaka. Amun here hanrapak tangan hang ambau kawan ulun sakit, kawan ulun yiru sagar ware.”

¹⁹Udi Tuhan Yesus bapaner anri here, hanye mihemuk ma surga. Hang yaru hanye marentah baya anri Alatalla.

²⁰Maka kawan ulun sa umba hanye tulak palus iwara Kabar teka Alatalla ma awe-awe. Kamulek Tuhan pada umba bagawi baya anri here nelang mambuktini itetei kawan kaajaiban inun sa nawara here yiru tuu.] [AKHIR NASKAH UHANG ISA LAIN Kawan wawei yiru tulak nunung hi Petrus anri kawan hengauni, balalu nyarita anri imbe katuluh sa haut nawara ma here daya ulun muda yiru. Udi yiru, Yesus raerai itetei kawan ulun sa umba hanye iwara kabar teka timur ma barat kabar sa maeh nelang kalalawah neu salamat sa kalalawah.]