Read Ma'anyan MARKUS 2 Bible Online

MARKUS 2 - Ma'anyan bible

MARKUS 2

¹Papire anrau udiyiru Yesus mulek ma Kapernaum. Maka tasiar kabar neu hanye rahat naan hang lewu.

²Balalu rama ulun hawi. Here bakajal hang yaru hampe puang uweng unengan lagi. Hang wawa anawang magin sika penu pangah ulun rama. Balalu Yesus nampe kabar teka Alatalla ma here.

³Rahat hanye bapaner, epat kaulun ngantung erang kaulun lumpuh nginsingni nunung Yesus.

⁴Kude daya ulun bangat rama, here puang kaiyuh nyanrite hanye. Balalu here ngungkar hapau pas hang pintangan unengan Yesus. Udi hie here ngului ulun lumpuh yiru baya anri patahni.

⁵Tawuk Yesus kadinung tamam tuu kaparisayaan here, hanye kaeau ma ulun lumpuh yiru, “Anakku, kawan dosanu haut naampun.”

⁶Papire kaulun guru agama sa rahat maharung hang yiru itunti hawuang atei here,

⁷“Heei tuu ulun yiti pantane kala yiru! Hanye mahina Alatalla. Hie sa tau ngampun dosa, amun lain teka Alatalla?”

⁸Tawuk yiru pada Yesus karasa pikiran here. Balalu hanye kaeau, “Wuah inun naun itunti kala yiru hawuang atei naun?

⁹Saawe murah: ngantuh, ‘Dosanu haut naampun’, atawa ngantuh, ‘Ambuan, enat patahnu hulu takia’?

¹⁰Kude itati aku sagar mambuktini ma naun hawuang dunia yiti Anak Murunsia bakuasa ngampun dosa.” Balalu Yesus kaeau ma ulun lumpuh yiru,

¹¹“Ambuan, hinang alap patahnu kia mudi!”

¹²Hanye ambuan, balalu badadas ngalap patahni palus kaluar nadinung daya here katuluh. Kawan ulun rama yiru wauh balalu nawat Alatalla. Eau here, “Huan suah takam kadinung kajadian kalayiti!”

¹³Yesus mulek lagi hampi iring Danau Galilea. Rama ulun hawi nunung hanye, balalu hanye ngajar here.

¹⁴Tawuk Yesus takia hang yiru, hanye kadinung erang kaulun panagis pajak bangaran hi Lewi, anak Alfeus, rahat maharung hang kantor pajak. “Hayu umba aku,” eau Yesus nengkan hanye. Maka hi Lewi minri palus naharak Yesus.

¹⁵Tawuk Yesus rahat kuman hang lewu Lewi, rama hawi kawan panagis pajak anri kawan ulun sa naanggap puang maeh daya masyarakat umba kuman baya Yesus anri kawan ulun sa umba hanye. Daya rama hengka here sa umba Yesus.

¹⁶Papire guru agama teka babuhan Parisi kadinung Yesus kuman baya anri kawan panagis pajak anri kawan ulun sa naanggap puang maeh yiru. Balalu here nunti ma kawan ulun sa umba Yesus, “Wuah inun guru naun kuman baya anri kawan panagis pajak anri kawan ulun sa puang maeh yiru?”

¹⁷Yesus karengei tuntian here yiru, balalu nuing, “Ulun sa sehat puang parlu dokter; ekat ulun sa sakit. Aku hawi puang lepuh nerau ulun sa nganggap dirini haut maeh, malengkan ulun sa naanggap hina.”

¹⁸Hang hinra tawuk kawan ulun sa umba Yohanes Pambaptis anri kawan ulun Parisi rahat puasa. Balalu naan ulun hawi nunung Yesus palus nunti, “Wuah inun ulun sa umba Yohanes Pambaptis anri kawan babuhan ulun Farisi puasa, kude kawan ulun sa umba hanyu puang puasa?”

¹⁹Yesus nuing, “Hang pesta kawin, inun kawan tamu puang kuman? Amun pangantin upu magun naan baya here, batantu here kuman.

²⁰Kude sagar naan wayahni pangantin upu yiru naalap teka here. Tawuk yiru wau here puang kuman.

²¹Puang uweng ulun nambal baju buruk makai riris kain wau. Daya kain panambal yiru sagar pakarusut palus nyansitat baju yiru, hampe sitatni batambah hante.

²²Kala yiru pada puang uweng ulun sa nuwe anggur wau ma wuang kantung kulit sa uhang. Karana anggur wau yiru sagar ngulah sabab kantung yiru leah. Balalu die kararuehni taumpe. Anggur wau harus nahuwe mawuang kantung kulit sa wau pada!”

²³Hang hinra anrau Sabat, tawuk Yesus mitah erang kalamar ume gandum, kawan ulun sa umba hanye ngawing mepet gandum.

²⁴Balalu kawan ulun Parisi kaeau ma Yesus, “Wuah inun kawan ulun sa umba hanyu malangar hukum agama takam, anri ngulah sa puang iyuh naulah hang anrau Sabat?”

²⁵Yesus nuing, “Inun naun huan suah mambasa neu sa naulah daya Dawid, tawuk hi Abyatar rahat batugas jari imam hante? Tawuk hi Dawid anri kawan ulun sa umba hanye kajuju, nelang puang uweng anakuta, hanye masuk ma Lewu Tuhan, palus nguta rote sa haut nasarah ma Alatalla. Kamulek rote yiru naamini pada ma kawan ulun sa umba hanye. Padahal manurut agama takam, ekat kawan imam sa iyuh nguta rute yiru.”

²⁷Balalu Yesus kaeau lagi, “Anrau Sabat naulah ma murunsia; puang murunsia ma anrau Sabat.

²⁸Jari, Anak Murunsia bakuasa, likan hang ambau anrau Sabat.”