Read Ma'anyan MARKUS 3 Bible Online

MARKUS 3 - Ma'anyan bible

MARKUS 3

¹Yesus mulek lagi ma lewu sumbayang. Hang yiru naan ulun sa tuhi tangani lumpuh.

²Hang yiru naan kawan ulun sa hamen ngantara kahalaen Yesus, nampan tau mangadu hanye. Jari here saratang mambidik hanye inun hanye sagar nyamare ulun hang anrau Sabat?

³Yesus kaeau ma ulun sa tuhi tanganni lumpuh yiru, “Hayu minri hang muka, yiti.”

⁴Balalu hanye nunti ma kawan ulun sa naan hang yiru, “Manyu agama, inun sa iyuh naulah takam hang anrau Sabat? Ngulah sa maeh atawa ngulah sa jahat? Nyalamat ulun atawa munu ulun?” Here katuluh uras suni.

⁵Nelang sangit Yesus ninung ulun rama ngawariung hanye, kude ateini mahanang pada, daya kadinung here bangat mape silu. Balalu hanye kaeau ma ulun yiru, “Surung tangannu.” Ulun yiru nyurung tanganni, palus tanganni balalu ware.

⁶Balalu kawan ulun Parisi tulak nanan lewu sumbayang yiru, here rereu mapakat anri papire kaulun sa umba teka hi Herodes, nampan munu Yesus.

⁷Yesus baya kawan ulun sa umba hanye tulak basingkir ma Danau Galilea. Kude rama tuu ulun teka Galilea tulak naharak Yesus. Rama pada sa hawi teka Yudea,

⁸teka Yerusalem, teka daerah Idumea, anri teka daerah tiba timur Yordan, nelang teka kalilingan kawan tumpuk Tirus anri Sidon. Here katuluh hawi nunung Yesus, daya here karengei neu kawan hal sa haut naulahni.

⁹Daya kala yiru ramani kawan ulun yiru, balalu Yesus nunyu kawan ulun sa umba hanye nyadia jukung ma hanye, wule hanye die hipit daya kawan ulun rama yiru.

¹⁰Rama tuu ulun nasamare dayani, hampe katuluh ulun sa sakit bakajal ikalihik ngakali nyanrite hanye nampan kaiyuh ngawir hanye.

¹¹Kamulek kawan ulun sa karasukan roh jahat, dami kadinung hanye, ijuku hang hadapan hanye nelang anri lengan sa mehet kaeau, “Hanyu Anak Alatalla!”

¹²Kude Yesus bahimat nguring kawan roh jahat yiru iwara hie hanye.

¹³Udiyiru Yesus mambai isa bukit, balalu nerau kawan ulun sa nakabahumenni. Kawan ulun yiru hawi,

¹⁴balalu hanye midi hengka here yiru dua walas kaulun. Eauni, “Aku midi naun, nampan naun umba aku, nampan aku ngutus naun neu iwara Kabar Maeh teka Alatalla,

¹⁵kamulek naun sagar kaiyuh kuasa pakai ngusir kawan roh jahat.”

¹⁶Iti ngaran kadua walas kaulun yiru: Hi Simon (sa naantuh pada hi Petrus),

¹⁷Hi Yakobus anri hi Yohanes pulaksanaini, hanyeyiru kawan anak Zebedeus (here yiti nagalar Boanerges aratini “anak nanyu”),

¹⁸Hi Andreas, Filipus, Bartolomeus, Matius, Tomas, Yakobus anak Alfeus, Tadeus, Simon hi Patriot,

¹⁹anri hi Yudas Iskariot sa makhianat Yesus.

²⁰Udi yiru Yesus mudi ma lewu. Kude ulun rama hawi lagi bakumpul, hampe Yesus anri kawan ulun sa umba hanye puang sampat kuman.

²¹Kawan ulun rama kaeau, “Hanye haut rapui!” Tawuk kaluargani karengei hal yiru, here tulak lepuh ngalap hanye.

²²Kawan guru agama sa hawi teka Yerusalem kaeau, “Hanye karasukan Beelzebul! Kapala kawan roh jahat yiru sa ngami kuasa ma hanye umak ngusir roh jahat.”

²³Balalu Yesus nerau ulun rama yiru, palus nyarita ma here papire rarapisan. “Puang maka tau roh jahat ngusir roh jahat,” eau Yesus.

²⁴“Amun isa nagara tapisah hawuang papire golongan sa bamusuhan, nagara yiru puang sagar kukuh.

²⁵Kamulek amun hawuang isa kaluarga puang uweng pipakatan nelang kawan anggotani paut bantah, kaluarga yiru sagar hansur.

²⁶Amun hawuang karajaan Iblis tapisah nelang bamusuhan, karajaan yiru puang tahan lawah nelang himat sagar wawai.

²⁷Puang sunah erang kaulun kaiyuh masuk mawuang lewu erang kaulun sa tingkas gansang palus hanrampas haratani amun hanye puang dahulu ngawet ulun tingkas gansang yiru. Udiyiru, wau hanye kaiyuh hanrampas haratani.

²⁸Patut naun karasa! Amun ulun ngulah dosa nelang ngeau nangkurun, hanye tau naampun.

²⁹Kude amun hanye nangkurun Roh Alatalla, hanye puang tau naampun! Daya nangkurun yiru samula dosa sa kalalawah.” (

³⁰Yesus kaeau kalayiru daya naan ulun sa kaeau Yesus karasukan roh jahat.)

³¹Udi yiru ineh anri kawan pulaksanai Yesus hawi. Here nganrei hang luar padingian nunyu ulun nerau Yesus.

³²Tawuk yiru ulun rama rahat maharung ngawuriung Yesus. Here kaeau mahanye, “Guru, ineh anri kawan pulaksanai nu naan hang luar. Here ngantara hanyu.”

³³Yesus nuing, “Hie inehku? Hie kawan pulaksanaiku?”

³⁴Udiyiru hanye ninung ma kawan ulun sa maharung ngawariung hanye balalu kaeau, “Iti ineh anri kawan pulaksanaiku!

³⁵Ulun sa nampalus kabahumen Alatalla, hanye pulaksanaiku upu, pulaksanaiku wawei, nelang inehku.”