Read Ma'anyan MARKUS 4 Bible Online

MARKUS 4 - Ma'anyan bible

MARKUS 4

¹Yesus ngajar lagi hang pingir pantai Danau Galilea. Rama tuu ulun ngawurunnung hanye. Daya yiru hanye tulak maharung hang wuang jukung hang danau, ulun rama yiru minri hang pingir danau.

²Balalu Yesus ngajar neu wahai hal ma here anri makai rarapisan. Kalayiti hanye ngajar here.

³“Rengei! Naan erang kaulun pangume tulak muau winini.

⁴Tawuk hanye muau, naan wini lawu manyahanyang hang penah lalan. Balalu wurung hawi matuk wini jari hampe galis.

⁵Naan pada lawu hang tane batu ampar sa duhu taneni. Wini yiru hinang tumbu daya duhu taneni,

⁶kude tawuk mate anrau mambai, kawan palatikni yiru layu balalu karing palus patei daya wakatni puang lalem masuk mawuang tane.

⁷Naan pada wini lawu hang padang rikut barunrui. Rikut barunrui yiru tumbu palus nawenan kawan palatikni yiru hampe puang tau mua.

⁸Kude naan pada wini lawu hang tane subur. Wini yiru tumbu, magin hante balalu mua, naan telumpulu, naan enempulu, nelang naan pada jatuh kali lipat.”

⁹Udi nyarita rarapisan yiru, Yesus kaeau, “Naun sa naan silu, sanrengei!”

¹⁰Tawuk Yesus ngaraerai, kawan ulun sa haut karengei pangajaranni hawi nunung hanye sinrah anri kadua walas ulun sa umba hanye. Here laku hanye manarang arati rarapisan yiru.

¹¹Yesus balalu kaeau ma here, “Ma naun haut naami lelu nampan karasa rasia neu kala awe Alatalla marentah. Kude kawan ulun luar naajar makai rarapisan,

¹²nampan ‘Here sagar saratang mantaru kude puang karasa inun sa jari, here sagar saratang nyanrengei, kude budas puang kataru, yiti jari nampan here ada kadinung ada kataru nelang ada hawi nunung Alatalla palus Alatalla ngampun here.’ ”

¹³Udi yiru Yesus kaeau ma here, “Amun naun puang kataru rarapisan yiru, kala awe naun tau kataru kawan rarapisan sa lain?

¹⁴Ulun sa muau yiru hanyeyiru ulun sa iwara kabar teka Alatalla.

¹⁵Wini sa lawu hang penah lalan ngintur kawan ulun sa karengei kabar neu kala awe Alatalla marentah. Kalayiru here karengei, Iblis hawi palus ngalap inun sa haut napuau hawuang atei here.

¹⁶Wini sa napuau hang tane batu ampar ngintur kawan ulun sa karengei kabar yiru, palus narimeni anri sanang atei.

¹⁷Kude kabar yiru puang iwakat hawuang atei here, daya yiru puang tahan lawah. Kala yiru here wuah kasusahen atawa nakahanangen daya gana kabar yiru, palus here murtad.

¹⁸Wini sa lawu hang padang rikut barunrui yiru ngintur kawan ulun sa karengei kabar yiru,

¹⁹kude here gaer neu pamelum here nelang hamen welum baegah-egah. Wahai masam kabahirien masuk mawuang atei here. Daya yiru kabar teka Alatalla hawenan hawuang atei here, hampe puang mua.

²⁰Kamulek wini sa lawu hang tane sa subur yiru ngintur kawan ulun sa karengei kabar yiru balalu narimeni, here mua wahai, naan telumpulu, naan enempulu, nelang naan pada jatuh kali lipat hasilni.”

²¹Kamulek Yesus kaeau lagi, “Inun suah ulun nutung palita balalu nutupni makai gantang, atawa ngelahni hang kapit unengan manre? Inun hanye puang ngelah palita yiru hang paharungan palita?

²²Puang uweng sa pasadina sa puang sagar dinung; nelang puang uweng rasia sa puang sagar tabungkar.

²³Daya yiru, amun naan silu, ware sanrengei!”

²⁴Balalu Yesus kaeau lagi, “Pantaru inun sa rengei naun yiti! Ukuran sa napakai naun ma ulun lain sagar napakai pada daya Alatalla ma naun — likan batambah wahai lagi.

²⁵Daya ma ulun sa haut uweng hang hanye, ma hanye sagar naami labis wahai lagi; kude ulun sa puang uweng inun-inun, butit sa magun naan hang hanye sagar naalap pada.”

²⁶Yesus nyambung lengan panerni lagi, “Amun Alatalla marentah kala raja, kaadaanni iyuh naintur kala erang kaulun sa muau wini hang umeni.

²⁷Kamalem hanye manre; kaanrau hanye kaelan. Hang tawuk yiru kawan wini jari tumbu nyurung tenak palus tari hante. Kude kala awe sarani kawan wini yiru tumbu hampe hante, ulun yiru puang karasa.

²⁸Tane yiru anri raeraini sa ngaluar hasil: mulani tangkaini, udi hie bakal wuani, balalu wuani.

²⁹Kamelek amun gandum yiru haut mihak, ulun yiru mulai masi daya haut hampe wayah masi.”

³⁰“Amun Alatalla marentah, makai inun takam tau nginturni?” tunti Yesus kamulek. “Inun sa tau umak suntu pakai takam manarangni?

³¹Amun Alatalla marentah, kaadaanni sameh kala rarapisan yiti: Erang kadiki sasawi naalap daya erang kaulun balalu naamule hang tane. Diki sasawi hanyeyiru pangarumis pangkan hang dunia.

³²Kude amun haut tumbu, hanye jari sa pangahante hengka kawan tanaman. Kawan raanni janrah hampe kawan wurung tau hawi, palus ngulah hanai hang kapit salindungan rawenni.”

³³Kala yiru Yesus ngajar ulun makai wahai rarapisan yiru, manyu kataruen here.

³⁴Yesus saratang makai rarapisan amun hanye ngajar kawan ulun yiru. Kude amun hanye erai anri kawan ulun sa umba hanye, hanye manarang katuluhni ma here.

³⁵Tawuk kariwe hang anrau yiru jua, Yesus kaeau ma kawan ulun sa umba hanye, “Hayu takam balayar ma sabarang danau.”

³⁶Yesus balalu sungkat ma jukung, baya kawan ulun sa umba hanye nanan ulun rama hang pingir danau. Kawan jukung salain naan pada hang yiru. Balalu Yesus anri kawan ulun sa umba hanye mulai balayar.

³⁷Puang lawah udi yiru hawi riwut barat mehet. Galumbang mulai nampuh jukung nelang ranu masuk mawuang jukung hampe jukung yiru kakai penu ranu.

³⁸Hang kamudi jukung yiru, Yesus rahat manre mangkading hang ambau undan. Kawan ulun sa umba hanye ngele hanye. Here kaeau, “Guru, inun hanyu puang paraduli, takam silaka?”

³⁹Yesus ambuan, balalu misuh riwut barat yiru, nelang pantane ma danau, “Taduh, baranai!” Riwut barat balalu taduh. Danau pada balalu ranai tatuu.

⁴⁰Balalu Yesus kaeau ma kawan ulun sa umba hanye, “Wuah inun naun takut? Wuah inun naun puang parisaya ma aku?”

⁴¹Here balalu takut nelang kaeau ma sameh tenga here, “Hie satuuni ulun yiti, hampe riwut barat anri galumbang sika ngalut nuu ma hanye?”