Read Ma'anyan MARKUS 5 Bible Online

MARKUS 5 - Ma'anyan bible

MARKUS 5

¹Udi yiru Yesus anri kawan ulun sa umba hanye hampe hang sabarang Danau Galilea, hang daerah Gerasa.

²Dami Yesus minau teka jukung, hanye natunung daya erang kaulun upu sa kaluar teka kawan luwang pasaran.

³Ulun yiru nakuasai daya roh jahat nelang muneng hang kawan pasaran. Hanye haut puang tau nahuruk lagi; biar makai rantai.

⁴Haut gaha pee tanganni narantai, kude kawan rantai yiru eter nasamitus dayani, pada jatang hang peeni napepetni. Hanye tingkas tatuu hampe puang uweng sunah erang kaulun kaule nawan nyamba hanye.

⁵Kaanrau kamalem hanye bakaliaran hang pasaran hang kawan bukit, nelang nantiak-tiak hanye nguris tengani makai watu hampe batan.

⁶Teka lawit dami hanye katantau Yesus hawi, hanye nempat balalu ijuku hang hadapan Yesus.

⁷Anri lengan mehet hanye kaeau, “Yesus, Anak Alatalla sa Pangaambau! Sagar nainun dayanu aku yiti? Demi Alatalla, aku laku, ada hanyu ngahanangen aku!” (

⁸Ulun yiru kaeau kalayiru daya Yesus kaeau ma hanye, “Roh jahat, kaluar teka ulun yiti!”)

⁹Balalu Yesus nunti ma hanye, “Hie ngarannu?” Ulun yiru nuing, “Ngaranku ‘Legiun’ — daya kami yiti rama tatuu!”

¹⁰Hanye kakune bahimat ilaku nampan Yesus ada nunyu kawan roh jahat yiru kaluar teka daerah yiru.

¹¹Rite unengan yiru naan rama tuu iwek rahat ngantilau anakuta hang leba bukit.

¹²Kawan roh jahat yiru ilaku ma Yesus, “Huyu kami masuk mawuang kawan iwek yiru.”

¹³Yesus satuju. Balalu kawan roh jahat yiru kaluar teka ulun yiru balalu masuk mawuang kawan iwek yiru. Sawayan iwek yiru nempat palus mitun teka iring pampang mawuang danau balalu leteng — katuluhni naan kira-kira rueh ribu kaukui iwek.

¹⁴Kawan ulun sa jaga iwek yiru nempat, palus iwara kabar yiru hang tumpuk anri hang desa sakitarni. Balalu ulun rama kaluar neu ninung inun sa haut bakajadian.

¹⁵Here hawi nunung Yesus, balalu kadinung ulun sa udi karasukan roh jahat yiru, rahat maharung hang yiru. Hanye haut bapakaian, nelang pikiranni pada haut waras. Here katuluh balalu takut.

¹⁶Kawan ulun sa haut kadinung raerai kajadian neu ulun yiru anri kawan iwek yiru nyarita inun sa haut bakajadian.

¹⁷Balalu panduduk daerah yiru ilaku nampan Yesus nanan daerah yiru.

¹⁸Tawuk Yesus sungkat mawuang jukung, ulun sa haut udi nakuasai roh jahat yiru ilaku ma Yesus, nampan hanye iyuh umba Yesus.

¹⁹Kude Yesus puang satuju, eauni, “Hulu mudi wara ma kawan kulawarganu inun sa haut natampalus Tuhan ma hanyu nelang kala awe kaehni hanye anri hanyu!”

²⁰Ulun yiru pada balalu tulak, palus mulai nyarita hang daerah Sapuluh Tumpuk inun sa haut naulah Yesus ma hanye. Katuluh ulun wauh karengei saritani.

²¹Yesus mulek lagi ma sabarang danau. Hang pinggir danau yiru, rama ulun hawi ngawariung Yesus.

²²Naan hawi erang kaulun sa bangaran hi Yairus. Hanye erang kaulun pamimpin lewu sumbayang hang tumpuk yiru. Tawuk hanye kadinung Yesus, hanye ijuku hang hadapan Yesus,

²³palus ilaku tatuu, “Pak, anakku wawei sakit bangat tatuu. Hakun hanyu hawi neu hanrapak tangannu hang hanye, nampan hanye ware nelang puang matei!”

²⁴Yesus balalu tulak sinrah hi Yairus. Rama ulun umba naharak hanye nelang mipi hanye teka kawi-kawan.

²⁵Teka ulun rama yiru naan pada erang kaulun wawei sa haut dua walas taun sakit kaluar ira sa bahubungan anri haidni.

²⁶Katuluh panatauni haut galis napakai neu bayar ma kawan dokter, kude angaan uweng isa kaiyuh nyamare hanye, likan panyakitni magin batambah maham.

²⁷Wawei yiru haut wahai karengei neu Yesus. Daya yiru hang penah ulun rama yiru, hanye nyanrite Yesus teka wading wuku,

²⁸daya hanye bapikir, “Asal aku ngawir jubahni, aku sagar ware!”

²⁹Hanye ngawir jubah Yesus, palus tawuk yiru pada irani taduh kaluar. Hanye kaingkam hanye haut ware.

³⁰Hang tawuk yiru pada Yesus kaingkam naan kakuaten sa kaluar teka dirini. Balalu hanye ikulik ma ulun rama yiru palus nunti, “Hie ngawir jubahku?”

³¹Kawan ulun sa umba hanye kaeau, “Hanyu raerai kadinung kala yiru rama ulun sa bakajal ipamipi. Kude hanyu magun nunti, hie ngawir jubahnu?”

³²Kude Yesus tatap ninung ngawariung hanye ngantara hie ulun sa haut ngawir jubahni.

³³Wawei yiru karasa inun sa haut jari anri hanye, anri neter nelang takut hanye ijuku hang hadapan Yesus palus mangaku katuluhni.

³⁴Balalu Yesus kaeau ma wawei yiru, “Anakku, daya hanyu parisaya ma aku, hanyu ware! Hulu tulak anri salamat. Hanyu haut tuu-tuu ware!”

³⁵Tawuk Yesus magun bapaner, papire kaulun saruhan hawi teka lewu Yairus. “Anak wawei Tuan haut matei,” eau here ma hi Yairus. “Puang usah Tuan nyansara Guru lagi.”

³⁶Anri puang nyanrengei inun sa naeau kawan ulun yiru, Yesus kaeau ma hi Yairus, “Ada takut, parisayaleh!”

³⁷Balalu Yesus palus takia, kude hanye puang hamen nginsing sunah erang kaulun umba hanye, ekat hi Petrus anri hi Yakobus baya hi Yohanes here ipulaksanai yiru.

³⁸Tawuk here hampe hang lewu Yairus, Yesus kadinung ulun rawek-rukah, nelang karengei lengan tangis tungkau sa mehet.

³⁹Balalu Yesus masuk palus kaeau ma here, “Wuah inun naun rawek-rukah nelang ngiak-nungkau? Anak yiru puang matei; hanye ekat manre!”

⁴⁰Here kakihi Yesus. Kude hanye balalu nunyu here katuluh kaluar. Hanye nginsing ineh ambah iya yiru anri katelu kawan ulun sa umba hanye masuk mawuang kamar iya yiru.

⁴¹Yesus negei tangan iya yiru balalu kaeau ma hanye, “Talita kum,” sa baarati, “Anak wawei, aku kaeau ma hanyu: ambuan!”

⁴²Iya wawei yiru balalu ambuan, palus takia. (Umurni haut dua walas taun.) Katuluh sa kadinung kajadian yiru tuu-tuu mandam! Wauh!

⁴³Kude Yesus anri bahimat nguring here iwara hal yiru ma hie-hie. Balalu eauni, “Ami anak yiru kuman.”