Read Ma'anyan MARKUS 7 Bible Online

MARKUS 7 - Ma'anyan bible

MARKUS 7

¹Erang kalompok ulun Farisi anri papire guru agama teka Yerusalem, hawi nunung Yesus.

²Here kadinung papire kaulun ulun sa umba Yesus kuman makai tangan puang barasis manyu agama, hanyeyiru puang dahulu mui tangan manyu aturan agama.

³Kawan ulun Farisi, kalayiru pada katuluh ulun Yahudi, satia tuu nampalus adat istiadat datu-nini here. Here puang sagar kuman, kapihuan mui tangan manyu hadat.

⁴Inun sa nawidi hang pasar puang sagar nakuta, amun huan nabarasis dahulu nelang wahai aturan lain teka datu-nini here nategei mansing daya here, paribasani kala aturan mui galas, mangkok, anri kawan parakakas teka tambaga.

⁵Daya yiru kawan ulun Farisi anri kawan guru agama yiru nunti ma Yesus, “Wuah inun kawan ulun sa umba hanyu yiru kuman makai tangan puang nawui? Inun sababni here puang makai adat istiadat datu-nini takam?”

⁶Yesus nuing, “Naun kawan ulun sa pura-pura! Bujur kala inun sa natujum daya Yesaya neu naun, hanyeyiru, ‘Kalayiti lengan Alatalla, Kawan ulun yiru ekat nyambah aku makai wawa, kude atei here lawit teka aku.

⁷Puang bariran here nyambah aku, daya aturan murunsia sa naajar here yalah yiru aturan teka aku!’

⁸Kawan parentah Alatalla puang naun ngatawani, kude kawan aturan murunsia sa nategei naun mamansing.”

⁹Balalu Yesus kaeau kamulek, “Naun apik bangat nampik parentah Alatalla nampan tau nampalus ajaran naun raerai.

¹⁰Hi Moses haut ngami parentah kalayiti, ‘Hormat ambah anri ineh naun’, ‘Hie-hie sa ngeau nangkurun ambah inehni, harus nahukum mati.’

¹¹Kude naun ngajar: Amun ulun kaeau ma ulun matuehni, ‘Inun sa harus naamiku ma hi ambah anri hi ineh, haut nasarahku umak parapah ma Alatalla,’

¹²balalu naun ngampi bebas ulun yiru hengka kawajibanni, ngarawah ambah inehni.

¹³Jari makai lengan ajar naun raerai sa naami naun ma ulun lain, naun nyamawai lengan Alatalla. Magun wahai hal sa kalayiti natampalus naun.”

¹⁴Balalu Yesus nerau ulun rama yiru hinra lagi nelang kaeau ma here, “Rengei nampan naun kataru!

¹⁵Puang uweng sunah isa teka luar sa masuk mawuang ulun tau ngulah ulun yiru najis. Kabalikanni, sa kaluar teka ulun, yiru ngulah ulun najis. [

¹⁶Jari, amun uweng silu, ware sanrengei.]”

¹⁷Tawuk Yesus nanan ulun rama yiru palus masuk ma lewu, kawan ulun sa umba hanye nunti ma hanye neu maksud rarapisan yiru.

¹⁸Balalu Yesus kaeau ma here, “Inun naun pada huan kataru? Inun naun puang tau kataru sa masuk mawuang ulun puang tau ngulah ulun yiru najis?

¹⁹Daya sa masuk yiru puang mitah atei, kude mitah wuntung, udi yiru kaluar lagi.” Makai lengan yiru Yesus iwara ala katuluh makuta uras halal.

²⁰Balalu Yesus kaeau kamulek, “Sa kaluar teka ulun, sayiru ngulah hanye najis.

²¹Daya teka wuang, hanyeyiru teka wuang atei, hulet kawan pikiran jahat sa ngulah ulun nampalus puang sanunuh, ngalat, munu ulun,

²²ibela, nipu-ngakal, muntaka, sinrah nampalus katuluh sa jahat, jari mauring, puang kataru umangan, pibahiri, sakah nelang puang masuk naajar.

²³Katuluh sa jahat yiru hulet teka wuang, atei nelang yiruleh sa ngulah ulun balalu najis.”

²⁴Udi yiru Yesus nanan unengan yiru, palus tulak hampi daerah rite tumpuk Tirus. Hanye masuk mawuang isa lewu nelang puang hamen rasa ulun hanye naan hang yiru. Kude hanye puang kaiyuh nyadina tengani.

²⁵Erang kaulun wawei naan anakni wawei pada naasuk roh jahat, karengei neu Yesus. Hanye hawi nunung Yesus balalu ijuku hang hadapan hanye,

²⁶nelang ilaku nampan Yesus ngusir roh jahat teka anakni yiru. Wawei yiru puang ulun Yahudi, hanye nakayaan hang daerah Fenisia hang Siria.

²⁷Yesus kaeau ma hanye, “Kawan iya harus naami kuman labis dahulu. Puang maeh ngalap anakuta kawan iya neu natawut ma antahu.”

²⁸“Tuan,” tuing wawei yiru, “Kawan antahu hang kapit meja sika nguta kawan lee sa nasanawu kawan iya!”

²⁹Balalu Yesus kaeau ma hanye, “Daya lengan tuingnu yiru, hulu hanyu mudi, roh jahat haut kaluar teka anaknu!”

³⁰Wawei yiru mudi. Hang lewu, hanye kadinung anakni rahat mangkading hang paanrean, nelang roh jahat tuu-tuu haut kaluar teka anak yiru.

³¹Udi yiru Yesus nanan daerah Tirus, nampalus pakiaanni mitah Sidon nuju Danau Galilea. Hanye ngalap lalan mitah daerah Sapuluh Tumpuk.

³²Hang yaru ulun nginsing ma hanye erang kaulun muna nelang marengen. Here laku Yesus hanrapak tanganni hang ambau ulun yiru.

³³Yesus nginsing ulun yiru ngaraerai pisah teka ulun rama, balalu ngajuk kingkingni mawuang kararueh silu ulun yiru. Balalu Yesus irura, palus ninjek lela ulun yiru.

³⁴Udi yiru Yesus mihangut ma langit, balalu nyipa hewuk palus kaeau ma ulun yiru, “Efata,” sa baarati, “Tauka!”

³⁵Silu ulun yiru tauka nelang lelani balalu maleme kamulek, palus hanye nuku marauh bapaner.

³⁶Balalu Yesus nguring here katuluh neu nyarita hal yiru ma hie-hie. Kude magin Yesus nguring, maginhie here iwara kabar yiru.

³⁷Katuluh ulun sa karengei yiru wauh tatuu. Here kaeau, “Katuluh yiru naulahni anri maeh! Likan hanye ngulah ulun marengen karengei, ulun muna tau bapaner!”