Read Ma'anyan MARKUS 8 Bible Online

MARKUS 8 - Ma'anyan bible

MARKUS 8

¹Puang hampe lawah udi yiru, naan lagi erang kalompok ulun rama hawi bakumpul. Daya gana here puang uweng nakuta, Yesus nerau kawan ulun sa umba hanye palus kaeau,

²“Aku malelu ulun rama yiti. Haut telu anrau lawahni here naan baya aku, nelang itati here puang uweng anakuta.

³Amun aku nunyu here mudi anri wuntung lawang, here sagar tariah hang lalan. Maginni hengka here yiru naan sa hawi teka lawit.”

⁴Kawan ulun sa umba Yesus nuing, “Hang unengan suni yiti, hang awe ulun tau kahaba anakuta sukup umak katuluh ulun yiti?”

⁵“Pire wahai rote sa naan hang naun?” tunti Yesus. “Pitu,” tuing here.

⁶Balalu Yesus nunyu ulun rama yiru maharung hang tane, balalu hanye ngalap kapitu rote yiru sinrah ngantuh tarima kasih ma Alatalla. Udi yiru hanye miah rote yiru makai tanganni palus ngamini ma kawan ulun sa umba hanye neu nabagi-bagi ma ulun rama. Balalu kawan ulun sa umba hanye magi rote yiru.

⁷Naan pada wat here papire kaukui kenah rumis. Yesus ngantuh tarima kasih ma Alatalla daya kawan kenah yiru, balalu nunyu kawan ulun sa umba hanye mambagi-bagi kenah yiru pada.

⁸Here ikuta hampe wising — naan leu epat ribu kaulun sa ikuta. Udiyiru kawan ulun sa umba Yesus ngumpul kalabihan anakuta — pitu tampawan penu. Balalu Yesus nunyu ulun rama yiru mudi,

¹⁰hanye anri kawan ulun sa umba hanye palus sungkat ma jukung balalu tulak hampi daerah Dalmanuta.

¹¹Papire kaulun ulun Farisi hawi nunung Yesus, balalu mulai basual anri hanye umak hanjabak hanye. Here laku Yesus ngulah kaajaiban yalah tanda sa hanye hawi teka Alatalla.

¹²Yesus miumeh balalu nuing, “Daya inun kawan ulun hang jaman yiti ilaku aku ngulah kaajaiban? Puang! Aku puang sagar nantarang tanda kalayiru ma here!”

¹³Balalu Yesus nanan here, palus sungkat mawuang jukung; balalu tulak hampi sabarang danau yiru.

¹⁴Kawan ulun sa umba Yesus puang kaitung nginsing sukup rote. Here ekat naan erang katipak rote hang jukung.

¹⁵“Hati-hati anri ragi kawan ulun Farisi anri ragi Herodes,” eau Yesus ma here.

¹⁶Kawan ulun sa umba Yesus yiru balalu bapaner neu hal yiru. Here kaeau, “Hanye kaeau kalayiru, daya takam puang uweng rote.”

¹⁷Yesus karasa inun sa jari papaneran here. Daya yiru hanye nunti ma here, “Wuah inun naun maner neu puang uweng rote? Inun naun puang karasa nelang pagun huan kataru? Kala yiru tumpulni pikiran naun?

¹⁸Naun naan matei — wuah inun naun puang kadinung? Naun naan silu — wuah inun naun puang karengei? Angneh naun kaitung

¹⁹neu dime rote sa napiahku ma dime ribu kaulun? Pire tampawan kalabihan anakuta sa nakumpul daya naun?” “Dua walas tampawan,” tuing here.

²⁰“Kamulek tawuk aku miah pitu rote ma epat ribu kaulun,” tunti Yesus lagi, “pire tampawan kalabihan anakuta yiru sa nakumpul naun?” “Pitu tampawan,” tuing here.

²¹“Nah, magun huan naun kataru?” eau Yesus kamulek.

²²Here hampe hang Betsaida. Hang yiru ulun nginsing erang kaulun pehe nunung Yesus, here laku hanye manjamah ulun pehe yiru nampan nyamare hanye.

²³Yesus balalu negei tangan ulun pehe yiru nganyak hanye hampi luar tumpuk yiru. Udi hie Yesus nura matei ulun yiru. Hanye hanrapak tanganni hang matei ulun yiru, balalu nunti ma hanye, “Inun hanyu itati tau kadinung inun-inun?”

²⁴Ulun yiru ninung ma hadapan, balalu kaeau, “Hiai, aku kadinung ulun takia; kude here dinungku wangunni kala kakau kayu.”

²⁵Yesus hanrapak tanganni lagi hang matei ulun yiru. Hinra yiti ulun yiru bahimat ngakali ninung. Mateini ware, palus hanye kadinung katuluhni lentah tatuu.

²⁶Balalu Yesus kaeau ma hanye, “Hulu mudi, nelang ada hanyu mulek lagi ma tumpuk yiru.”

²⁷Yesus baya kawan ulun sa umba hanye tulak hampi kawan desa hang tiba Kaisarea Pilipi. Hang penah lalan Yesus nunti ma here, “Manurut eau ulun, hie aku yiti?”

²⁸Here nuing, “Naan kaeau: Hi Yohanes Pambaptis; naan pada kaeau hi Elia, nelang sa lain lagi kaeau: hanyu isa teka teka kawan nabi.”

²⁹“Kude manurut naun, aku yiti hie?” tunti Yesus. Hi Petrus nuing, “Hanyu yiti Raja Panyalamat!”

³⁰Balalu Yesus ngampi itung here, nampan puang iwara ma hie-hie neu dirini.

³¹Udi yiru, Yesus mulai ngajar kawan ulun sa umba hanye neu Anak Murunsia musti wahai wuah kahanangen, nelang sagar nalawan daya kawan pamimpin, kawan imam kapala, anri kawan guru agama. Hanye sagar nawunu, kude hang anrau katelu hanye sagar naambuan welum kamulek.

³²Anri bawilah tuu Yesus iwara hal yiru ma kawan ulun sa umba hanye. Balalu hi Petrus nyujut Yesus ma iring, palus nagur hanye.

³³Kude Yesus ikulik ninung kawan ulun sa umba hanye, balalu nagur hi Petrus, “Hulu teka yiti, panggoda! Pikirannu yiru pikiran murunsia; puang pikiran Alatalla!”

³⁴Udi yiru Yesus nerau ulun rama sa naan hang yiru baya anri kawan ulun sa umba hanye. Balalu hanye kaeau ma here, “Ulun sa hamen umba aku, harus puang ngitung kapantinganni raerai, kamulek hanye ngantung balasangarni, palus umba aku.

³⁵Daya ulun sa hamen malihara pamelumni, hanye sagar kawawaian pamelumni. Kude ulun sa manyarah pamelumni daya gana aku nelang daya gana Kabar Maeh teka Alatalla, hanye sagar nyalamatni.

³⁶Inun untungni ma ulun, amun katuluh dunia yiti jari milikni, kude hanye kawawaian pamelumni?

³⁷Inun tau pamelum yiru nasilis makai inun heneng?

³⁸Amun ulun amangan mangaku aku anri kawan ajaranku hang jaman durhaka nelang jahat yiti, Anak Murunsia pada sagar amangan mangaku ulun yiru, hang tawuk hanye hawi hanrian anrau makai kuasa Ambahni, nasinrah kawan malekat sa barasis.”