Read Ma'anyan MARKUS 9 Bible Online

MARKUS 9 - Ma'anyan bible

MARKUS 9

¹“Wuah naun karasa!” eau Yesus. “Hengka padang naun hang yiti naan sa puang sagar matei, kapihuan kadinung Alatalla marentah anri kuasa!”

²Enem anrau udi yiru Yesus nginsing hi Petrus anri hi Yakobus baya pulaksanaini hi Yohanes, ngaraerai hampi isa gunung sa ambau. Hang hadapan matei here Yesus baubah wangun.

³Pakaianni jari mahilak mamilau. Puang uweng sunah erang kaulun tukang panatau hang dunia yiti sa tau ituhun hampe mahilak hengai kala yiru.

⁴Udi yiru katelu kaulun ulun sa umba Yesus yiru kadinung Yesus bapaner anri hi Elia here rueh hi Moses.

⁵Balalu hi Petrus kaeau ma Yesus, “Guru, marauh tuu takam hang yiti. Maeh amun kami ngapinri telu punduk: isa ma hanyu, isa ma hi Moses, nelang isa lagi ma hi Elia.”

⁶Sabujurni hi Petrus puang karasa inun sa harus napantaneni, daya hanye anri kararueh hengauni rahat takut tatuu.

⁷Udi yiru rakun nyalehup here balalu teka wuang rakun yiru naan rengei lengan kaeau, “Iti Anakku sa nasintaku. Rengei hanye!”

⁸Here balalu hinang ninung ma kalilingan here, kude puang kadinung hie-hie lagi hang yiru baya anri here, kasuali Yesus.

⁹Tawuk here minau teka gunung yiru, Yesus ngampi itung here, “Ada iwara ma hie-hie inun sa dinung naun hunien kapihuan Anak Murunsia naele welum teka pampateini.”

¹⁰Here ngalut nuu ma pesenan yiru, kude hang sameh here raerai here mulai mander neu inun maksud Yesus anri naele welum mulek teka pampateini.

¹¹Here nunti ma Yesus, “Wuah inun kawan guru agama kaeau hi Elia musti hawi labis dahulu?”

¹²Yesus nuing, “Hi Elia samula hawi labis dahulu nampan ngampi beres ala katantuluh. Kude kala awe halni anri Anak Murunsia? Inun sababni hawuang Surat Barasis nasurat hanye sagar wahai wuah kahanangen nelang nahina daya ulun?

¹³Kude aku kaeau ma naun: Hi Elia haut hawi, kude kawan ulun rama nampalus ma hanye manyu bahum here. Yiru tuu susuk anri sa haut nasurat hawuang Surat Barasis neu dirini.”

¹⁴Tawuk Yesus anri katelu kaulun ulun sa umba hanye haut bakumpul mulek baya kawan ulun sa umba hanye sa lain, here kadinung rama ulun hang yiru. Papire guru agama rahat basual anri kawan ulun sa umba Yesus yiru.

¹⁵Dami kawan ulun yiru kadinung Yesus, here wauh, balalu nempat nahalu hanye.

¹⁶“Inun sa nasual naun anri kawan guru agama yiru?” tunti Yesus ma kawan ulun sa umba hanye.

¹⁷Erang kaulun teka ulun rama yiru nuing, “Guru, aku nginsing anakku nunung hanyu. Hanye muna daya karasukan roh jahat.

¹⁸Amun roh yiru manyarang hanye, hanye mihampas tenga ma tane, mulutni iwure, dipenni gagiret palus katuluh tengani balalu kait. Aku laku kawan ulun sa umba hanyu ngusir roh jahat yiru, kude here puang tau nampalusni.”

¹⁹Balalu Yesus kaeau ma here, “Tuu leha naun yiti! Naun tuu-tuu ulun sa puang parisaya. Hampe awe aku harus muneng baya naun nelang basabar anri naun? Insing iya yiru ma yati!”

²⁰Here balalu nginsing iya yiru nunung Yesus. Dami roh jahat yiru kadinung Yesus, hanye ngampi kait tenga iya yiru hampe iya yiru tumbang pagulang-galing ma tane. Mulutni iwure.

²¹Balalu Yesus nunti ma ambahni, “Haut kalaawe lawahni hanye kala yiti?” “Hengka kalemah hanye lagi rumis!” tuing ambahni.

²²“Haut gaha roh jahat yiru ngunu munu hanye anri nyantumbang hanye ma matei apui atawa mawuang ranu. Kude amun hanyu tau ngarawah, hamen hanyu malelo kami nelang ngarawah kami!”

²³“Inun eaunu? Amun aku tau?” tuing Yesus. “Ala katantuluhni uras tau, asal ulun parisaya!”

²⁴Palus ambah iya yiru anri lengan mehet kaeau, “Tuhan, aku parisaya, kude imanku kurang. Karawah nampan aku labis parisaya lagi!”

²⁵Tawuk Yesus kadinung ulun rama mulai hawi nguruwundung, hanye marentah roh jahat yiru anri kaeau, “Roh marengen nelang muna, aku marentah hanyu kaluar teka iya yiti nelang ada budas hanyu masuk lagi mawuang hanye!”

²⁶Roh jahat yiru nantiak, balalu ngulah tenga iya yiru kait-kejang, udi hie hanye kaluar teka iya yiru. Iya yiru nadinung wangunni kala bangkai hampe katuluh ulun kaeau, “Hanye haut matei!”

²⁷Kude Yesus negei tanganni nelang ngarawah hanye ambuan. Iya yiru balalu ambuan.

²⁸Dami Yesus haut hang lewu, kawan ulun sa umba hanye hawi suni-suni nunung hanye palus nunti, “Daya inun kami puang tau ngusir roh jahat yiru?”

²⁹Yesus nuing, “Roh jahat samasam yiru puang tau nausir makai sara lain, amun puang makai badoa.”

³⁰Yesus anri kawan ulun sa umba hanye nanan unengan yiru nampalus pakiaan here mitah Galilea. Yesus puang hamen rasa ulun hang awe hanye muneng,

³¹daya hanye rahat ngajar kawan ulun sa umba hanye. “Anak Murunsia sagar nasarah ma kakuasaan murunsia,” kala yiru Yesus kaeau, “nelang hanye sagar nawunu, kude hang anrau katelu hanye sagar naele welum kamulek!”

³²Kawan ulun sa umba hanye puang kataru kawan sa naajar Yesus, kude here takut nunti ma hanye.

³³Here hampe hang Kapernaum. Dami haut hang lewu, Yesus nunti ma kawan ulun sa umba hanye, “Inun sa nasual naun tawuk takia hang lalan hunien?”

³⁴Here puang nuing, daya tawuk takia hang lalan here basual neu hie sa panga tamam.

³⁵Yesus maharung, balalu nerau kadua walas kaulun ulun sa umba hanye yiru. Hanye kaeau ma here, “Ulun sa hamen jari nomor satu, hanye harus jari panga akhir nelang harus jari palayan ulun katuluh.”

³⁶Udi yiru Yesus ngalap erang kaulun iya rumis, palus ngapinri iya yiru hang hadapan here katuluh. Yesus maluk iya yiru nelang kaeau ma kawan ulun sa umba hanye,

³⁷“Ulun sa narime erang kaulun iya kala yiti daya gana aku, baarati hanye narime aku. Kamulek ulun sa narime aku, hanye puang ekat narime aku, kude pada narime hanye sa ngutus aku.”

³⁸Balalu hi Yohanes kaeau ma Yesus, “Guru, kami naan kadinung ulun ngusir setan makai ngarannu. Kami nguring hanye daya hanye puang teka ulun umba takam.”

³⁹Kude Yesus kaeau, “Ada nguring hanye, daya puang sunah erang kaulun sa ngulah kaajaiban makai ngaranku, palus kaiyuh nangkurun aku.

⁴⁰Daya ulun sa puang nawan takam, baarati umba hengka takam.

⁴¹Itung! Ulun sa ngami ranu uut ma naun daya naun ulun sa umba Raja Panyalamat, hanye himat sagar narime upani.”

⁴²“Hie sa ngulah hal hampe isa teka kawan ulun sa rumis yiti puang parisaya lagi ma aku, labis maeh amun watu panggilingan naawet hang diungni, balalu hanye naumpe mawuang laut.

⁴³Amun tangannu ngulah hanyu badosa, tetek tangan yiru! Labis maeh hanyu welum baya Alatalla anri puang batangan tuhi teka hanyu anri kararueh tangannu masuk ma naraka, hanyeyiru apui sa kalalawah. [

⁴⁴Hang yaru apui puang tau pare, nelang ulet puang tau matei.]

⁴⁵Kamulek amun peenu ngulah hanyu badosa, tetek pee yiru. Labis maeh hanyu welum baya Alatalla anri angaan bapee tuhi, teka hanyu anri kararueh peenu naumpe mawuang naraka. [

⁴⁶Hang yaru apui puang tau pare nelang ulet puang tau matei.]

⁴⁷Amun mateinu ngulah hanyu badosa, garuit matei yiru! Labis maeh hanyu masuk Dunia Wau wat Alatalla anri puang uweng matei tuhi, teka hanyu anri kararueh mateinu naumpe mawuang naraka.

⁴⁸Hang yaru apui puang tau pare nelang ulet puang tau matei.

⁴⁹Tatiap ulun sagar nabarasis makai apui, sameh kala parapah nabarasis makai rangi.

⁵⁰Rangi yiru maeh, kude amun jari mapahe, inun tau naampierang kamulek? Jari, wuah naun jari kala rangi — welum baya mira anri maeh pakat.”