Read Ma'anyan LUKAS 11 Bible Online

LUKAS 11 - Ma'anyan bible

LUKAS 11

¹Hang hinra anrau Yesus badoa hang isa unengan. Dami galis badoa, erang kaulun teka kawan ulun sa umba hanye kaeau, “Tuhan, awat ajar kami badoa kala hi Yohanes ngajar kawan ulun sa umba hanye badoa.”

²Balalu Yesus kaeau ma here, “Amun naun badoa, eau kala yiti, ‘Ambah, hanyu Alatalla sa tungkan, Wuah hanyu nasambah nelang nahormat,

³Ami tiap anrau anakuta sa naparlu daya kami.

⁴Ampun kami, sa bakahalaen daya kami pada ngampun tatiap ulun sa hala anri kami. Nelang ada maladar kami kawawaian kaparisayaan hang tawuk kami napurija.’ ”

⁵Yesus kaeau ma kawan ulun sa umba hanye, “Umpamani erang kaulun teka naun tulak ma lewu hengauni tawuk penah malem, nelang kaeau, ‘Sobat, piihau aku rote telu katipak,

⁶daya hengauku sa rahat hang pakiaan, wau tarie hang lewuku nelang aku puang uweng anakuta ma hanye!’

⁷Umpamani hengau sa natunungnu yiru nuing teka wuang lewuni, kala yiti, ‘Ada ngampi aur aku! Wanawang haut bakunsi nelang aku baya kawan anakku haut manre. Aku puang tau ambuan palus ngami inun heneng ma hanyu.’ ”

⁸“Balalu kala awe?” eau Yesus kamulek. “Aku kaeau hiai! Biar hanyu hengauni, hanye puang sagar hakun ambuan palus ngami inun heneng ma hanyu. Kude samula daya hanyu puang kaingkam umangan magun ilaku ma hanye, balalu hanye sagar ambuan jua nelang ngami ma hanyu inun sa naparlu dayanu.

⁹Itung aku kaeau ma naun: Laku, himat sagar naami ma naun; antara, himat naun sagar kahaba; talitik, himat wawanawang sagar nauka ma naun.

¹⁰Daya ulun sa laku sagar narime; ulun sa ngantara sagar kahaba; nelang ulun sa nalitik, wawanawang sagar nauka.

¹¹Hang penah naun inun naan ambah sa ngami kadiawet ma anakni, amun hanye laku kenah?

¹²Atawa ngami alimangu, amun hanye laku antelui?

¹³Biar naun jahat, naun tau pada ngami sa maeh ma anak naun. Duan likan Ambah sa hang surga! Hanye sagar ngami Rohni ma here sa ilaku ma hanye.”

¹⁴Hang hinra anrau Yesus ngusir setan kaluar teka erang kaulun muna. Udi setan yiru kaluar, ulun yiru mulai bapaner. Ulun rama wauh,

¹⁵kude naan sa kaeau, “Hanye tau ngusir setan, daya kuasa Beelzebul, kapala kawan setan.”

¹⁶Naan pada kawan ulun lain sa hamen hanjabak Yesus, here laku hanye ngulah isa kaajaiban umak siri sa hanye hawi teka Alatalla.

¹⁷Kude Yesus karasa bahum here. Balalu hanye kaeau ma here, “Amun isa negara tabagi hawuang papire golongan sa bamusuhan, negara yiru puang sagar tahan lawah. Nelang isa kaluarga sa tabagi-bagi nelang bamusuh isa anri sa lain, kaluarga yiru sagar hansur.

¹⁸Kala yiru pada hawuang karajaan setan; amun isa kalompok babur anri kalompok sa lain, karajaan yiru sagar runtun. Naun kaeau aku ngusir setan makai kuasa Beelzebul.

¹⁹Amun kala yiru, makai kuasa hie kawan ulun sa umba naun ngusir kawan setan yiru? Kawan ulun sa umba naun yiru raerai sa mambukti naun tuu hala!

²⁰Kude aku ngusir setan makai kuasa Alatalla, yiru baarati himat Alatalla haut mulai marentah hang penah naun.

²¹Amun erang kaulun sa tingkas, makai sukup sanjata, nyaga lewuni, katuluh milikni sagar salamat.

²²Kude amun erang kaulun sa labis tingkas manyarang palus nyantalau hanye, ulun sa labis tingkas yiru sagar hanrampas katuluh sanjata sa nakaharapen daya ampun lewu yiru, balalu mambagi-katuluh kawan barangni.

²³Ulun sa puang umba aku, kapinuuni nawan aku, nelang ulun sa puang ngarawah aku, kapinuuni nanrusak pagawianku!”

²⁴“Amun roh jahat nanan ulun, roh yiru bakaliling ma kawan unengan sa karing neu ngantara unengan istirahat, kude hanye puang kahaba. Daya yiru, hanye kaeau, ‘Aku sagar mulek ma lewu sa haut natananku!’

²⁵Tawuk hanye hampe hang yaru, hanye kadinung lewu yiru barasis nelang taatur.

²⁶Balalu hanye tulak palus nginsing pitu roh lain sa labis jahat teka hanye. Udi yiru here masuk mawuang ulun yiru balalu muneng hang yiru. Akhirni kaadaan ulun yiru balalu labis murun teka asalni.”

²⁷Udi Yesus kaeau kala yiru, erang kaulun wawei teka penah ulun rama yiru kaeau ma Yesus, “Tuu sanang marauh wawei sa ngayaan nelang ngampumu hanyu!”

²⁸Kude Yesus nuing, “Labis sanang marauh lagi ulun sa nyanrengei lengan Alatalla nelang nampalusni!”

²⁹Tawuk yiru kawan ulun ngawurundung Yesus, hanye nampalus papaneranni, eauni, “Tuu-tuu jahat kawan ulun jaman yiti. Here laku isa kaajaiban nampan here parisaya ma aku, kude here puang sagar naami sunah isa kaajaiban, kasuali kaajaiban Nabi Yunus.

³⁰Kala Nabi Yunus jari isa kaajaiban ma kawan ulun hang tumpuk Niniwe, kala yiru pada Anak Murunsia sagar jari isa kaajaiban ma kawan ulun jaman yiti.

³¹Hang anrau kiamat, Ratu negeri selatan sagar ambuan sinrah kawan ulun jaman yiti, palus mandawa here. Daya, neu nyanrengei pangajaran Salomo sa pintar, Ratu yiru nampalus pakiaan sa lawit tatuu teka hujung dunia. Kude hang yiti itati naan sa labis hante teka hi Salomo!

³²Hang anrau kiamat, panduduk tumpuk Niniwe sagar ambuan sinrah kawan ulun jaman yiti, palus mandawa here, daya ulun Niniwe yiru batobat teka kawan dosa here tawuk hi Yunus bakhotbah ma here. Kude hang yiti itati naan sa labis hante teka hi Yunus.”

³³“Puang uweng ulun sa nutung palita balalu ninani atawa nutup palita yiru makai gantang. Hanye sagar ngandak palita yiru hang paharungan palita, nampan ulun sa masuk tau kadinung raaini.

³⁴Matei hanyeyiru palita ma tenga. Amun mateinu barasis, katuluh tenganu maraai matalak. Kude amun mateinu kabus, katuluh tenganu jari maieng-maituk.

³⁵Daya sabab yiru ware hati-hati, ada hampe piraai sa naan hang hanyu yiru jari maieng.

³⁶Amun katuluh tenganu maraai, nelang puang sunah meheni sa maieng, himat katuluh tenganu yiru maraai-matalak yalah nasiai daya sahaya palita.”

³⁷Udi Yesus luput bapaner, erang kaulun ulun Farisi nerau hanye kuman hang lewuni. Balalu Yesus tulak kuman hang yiru.

³⁸Ulun Farisi yiru wauh kadinung Yesus kuman puang lagi mui tanganni manurut aturan agama.

³⁹Daya yiru Tuhan kaeau ma hanye, “Samula naun kawan ulun Farisi biasani marasis piring anri mangkok bagian luarni, kude hawuang diri naun raerai penu anri kakarasen nelang kajahaten.

⁴⁰Naun puang kataru! Angneh Alatalla sa ngulah bagian luar yiru, haut ngulah hawuangni pada?

⁴¹Sa naan hawuang piring anri mangkok yiru, yiru sa harus naami naun ma kawan ulun paua. Makai sara yiru, katuluhni sagar jari barasis ma naun.

⁴²Silaka naun, kawan ulun Farisi! Hasil amulean naun umpamani kala salasih anri inggu anri kawan rarampah lainni, naun ngami sapersapuluhni ma Alatalla, kude kaadilan anri sinta ma Alatalla puang naun ngarasa. Padahal yiru sa saharusni naulah naun, anri puang wewung sa lainni pada.

⁴³Silaka naun, kawan ulun Farisi! Naun sindi kawan unengan sa terhormat hawuang lewu sumbayang, nelang sindi nahormat hang kawan pasar.

⁴⁴Silaka naun! Naun kala pasaran sa puang nabatur, sa nararah ulun anri puang nasingaja.”

⁴⁵Erang kaulun teka guru agama kaeau ma Yesus, “Guru, makai kawan lengan yiru, hanyu mahina kami pada!”

⁴⁶Yesus nuing, “Silaka naun pada, kawan guru agama! Naun ilaku kawan hal sa mahadin nelang ngami kawan aturan sa maweat, kude naun raerai puang sunah butit hamen ngarawah ulun nampalusni.

⁴⁷Silaka naun! Naun ngulah pasaran ma kawan nabi, sa sabujurni nawunu daya datu nini naun raerai.

⁴⁸Jari naun raerai mangaku sa naun satuju inun sa haut naulah daya datu nini naun; daya samula here sa munu kawan nabi yiru nelang naun sa ngulah pasaranni.

⁴⁹Yiru sababni Kapintaren Alatalla kaeau, ‘Aku sagar ngirim ma here kawan nabi anri kawan utusanku; meheni sagar nawunu nelang meheni sagar nakahanangen!’

⁵⁰Alatalla nampalus yiru nampan kawan ulun jaman yiti nahukum daya here munu kawan nabi nuku teka dunia natanyari,

⁵¹mulai teka munu hi Habel hampe waktu munu hi Zakaria, sa jari hang helang mezbah anri Lewu Tuhan. Parisayaleh: Kawan ulun jaman yiti himat sagar nahukum daya gana katuluh yiru.

⁵²Silaka naun, kawan guru agama! Kunsi pakai nguka wawanawang kaharatien nasimuh hang naun, kude naun raerai puang hamen masuk mawuang neu ngantara kaharatien yiru. Kabalikanni naun nahalang kawan ulun sa ngakali masuk ma wuangni!”

⁵³Tawuk Yesus nanan unengan yiru, kawan guru agama anri kawan ulun Farisi bahimat mada Yesus. Here mulai hanjabak hanye nampan hanye hamen bapaner neu papire hal.

⁵⁴Nelang hang tawuk yiru here nyanrengei mamaeh neu ngantilau kawan sa hala sa naeau dayani.