Read Ma'anyan LUKAS 14 Bible Online

LUKAS 14 - Ma'anyan bible

LUKAS 14

¹Hang hinra anrau Sabat Yesus tulak lepuh kuman hang lewu erang kaulun tokoh Farisi. Hang yiru kawan ulun naniuh Yesus anri bahimat.

²Naan hawi nunung Yesus erang kaulun sa babadus nelang pee anri tanganni bakah.

³Balalu Yesus nunti ma kawan guru agama anri kawan ulun Farisi sa naan hang yiru, “Manurut hukum agama takam, inun iyuh takam nyamare ulun sakit hang anrau Sabat atawa puang?”

⁴Kawan guru agama anri kawan ulun Farisi yiru suni. Balalu Yesus nerau ulun yiru palus nyamare hanye, udi yiru nunyu hanye tulak.

⁵Udi yiru Yesus kaeau ma ulun rama, “Paribasani erang kaulun teka naun uweng erang kaulun iya atawa erang kaukui sapi sa lawu mawuang sumur hang anrau Sabat, inun hanye puang sagar iwawansit nyujut iya yiru atawa sapi yiru ma luar anrau yiru pada?”

⁶Kude puang sunah erang kaulun tau nuing lengan Yesus neu hal yiru.

⁷Yesus kadinung naan kawan tamu sa midi kawan unengan sa panga maeh. Daya yiru hanye ngami pangajaran yiti ma here katuluh.

⁸“Amun naun naundang ma pesta kawin, ada maharung hang karusi kahormatan. Daya tau naan erang kaulun lain sa labis tamam teka hanyu haut naundang pada,

⁹hampe ampun lewu yiru sa haut nerau naun rueh yiru, tapaksa hawi ma hanyu palus kaeau, ‘Maaf, unengan yiti haut nasadia ma tamu yiru.’ Balalu anri umangan tatuu hanyu tapaksa maharung hang unengan sa pangahawading hang balakang.

¹⁰Daya yiru, amun naun naundang, pidi unengan sa pangahawading, nampan ampun lewu sagar hawi palus kaeau ma hanyu, ‘Tangke, hayu maharung hang unengan sa labis maeh.’ Anri kalayiru naun nahormat hang hadapan katuluh tamu sa lain.

¹¹Daya tatiap ulun sa ngampambau diri sagar naampirandah, kude sa nyanrandah diri sagar naampambau.”

¹²Balalu Yesus kaeau ma ampun lewu, “Amun hanyu nerau ulun ma pesta kuman kaanrau atawa kuman kamalem, ada nerau hengau atawa pulaksanai, atawa kulawaraga, atawa tatangganu sa tatau. Daya die here sagar nerau hanyu pada, balalu anri kalayiru hanyu narime walehan pagawiannu.

¹³Jari, amun hanyu ngulah pesta, undangleh kawan ulun paua, ulun cacat, ulun lumpuh, anri ulun pehe.

¹⁴Hanyu sagar naberkat, daya kawan ulun yiru puang sagar kaiyuh iwaleh pikaehnu. Pikaehnu sagar nawaleh daya Alatalla hang tawuk kawan ulun sa maeh naele kamulek teka pampatei.”

¹⁵Hang tawuk erang kaulun teka sa umba kuman baya hang yiru karengei lengan Yesus, hanye kaeau, “Untung tuu ulun sa sagar kuman baya anri Alatalla amun hanye hawi yalah Raja!”

¹⁶Kude Yesus kaeau ma ulun yiru, “Hang hinra tawuk naan erang kaulun ngulah pesta sa hante nelang nerau ulun rama.

¹⁷Tawuk hampe wayahni mulai pesta, ulun yiru nunyu palayanni tulak nunung kawan undangan nelang kaeau, ‘Hayu hawi, katuluhni haut sadia!’

¹⁸Kude here katuluh isa mangisa mulai laku maaf. Sa palanungkai kaeau ma palayan yiru, ‘Aku wau tuu midi erang kalamar tane, parlu tulak mariksani. Aku laku maaf.’

¹⁹Sa lain kaeau, ‘Aku wau udi midi dime pasang sapi, nelang ngunu mansuba kawan sapi yiru. Aku laku maaf.’

²⁰Sa lain lagi kaeau, ‘Aku wau udi kawin, daya yiru aku puang tau hawi.’

²¹Palayan yiru mudi balalu iwara hal yiru ma tuanni. Tuan yiru sangit tuu, balalu kaeau ma palayanni, ‘Wansit kia ma kawan lalan anri kawan gang hang tumpuk. Insing ma yiti ulun paua, ulun cacat, ulun pehe anri ulun lumpuh.’

²²Udi hie palayan yiru kaeau, ‘Tuan, parentah tuan haut natampalusku, kude unengan magun wahai.’

²³Balalu tuan yiru kaeau, ‘Hulu ma kawan lalan hante anri lalan rumis hang luar tumpuk, nelang dasak kawan ulun nampan hawi, nampan lewuku penu.

²⁴Itung! Puang sunah erang kaulun teka penah kawan tamu sa haut naundang yiru kaingkam kutaen pestaku yiti!’ ”

²⁵Rama ulun umba takia sinrah Yesus. Yesus ikulik palus kaeau ma here,

²⁶“Amun ulun hawi nunung aku, kude hanye diwi sinta inehni, ambahni, daranganni, kawan anakni, kawan pulaksanaini, likan dirini raerai, hanye puang tau jari ulun sa umba aku.

²⁷Ulun sa puang hakun ngantung balasangarni palus umba aku, puang tau jari ulun sa umba aku.

²⁸Amun erang kaulun teka naun ngunu ngapinri isa manara, batantu hanye sagar maharung hanreken biayani dahulu nampan hanye karasa inun duitni sukup pakai nyanyari manara yiru atawa puang.

²⁹Daya amun bawilah hanye puang kaiyuh nyanyarini, padahal pondasini haut naulah, himat katuluh ulun sa kadinung pagawian yiru sagar kakihi hanye.

³⁰Here sagar kaeau, ‘Heh, ulun yiti ngulah bangunan, kude puang kaiyuh nyanyarini!’

³¹Amun erang kaulun raja sa naan sapuluh ribu tantara ngunu baparang anri raja lain sa naan ruampulu ribu tantara, batantu raja yiru sagar maharung duluni ngakira inun hanye kaule nawan musuhni yiru.

³²Amun hanye karasa hanye puang kaule, batantu tawuk musuhni yiru lagi lawit, hanye sagar ngirim utusanni nampan ilaku badamai.”

³³Akhirni Yesus kaeau, “Kalayiru pada anri naun. Puang sunah erang kaulun teka naun tau jari ulun sa umba aku, amun hanye puang ngurban ala katantuluhni.”

³⁴“Rangi yiru maeh, kude amun jari mapahe, inun tau naampierang lagi?

³⁵Puang uweng riranni lagi, hau ma ume atawa ma pupuk. Ekat neu naumpe. Amun naan silu ware sanrengei!”