Read Ma'anyan LUKAS 15 Bible Online

LUKAS 15 - Ma'anyan bible

LUKAS 15

¹Hang hinra anrau, rama panagis pajak anri kawan ulun sa naanggap puang maeh daya masyarakat, hawi nyanrengei Yesus.

²Kawan ulun Farisi anri kawan guru agama mulai mangomel. Here kaeau, “Seh, ulun yiti narime kawan ulun sa puang maeh likan kuman baya anri here!”

³Daya sabab yiru Yesus nyarita ma here rarapisan yiti,

⁴“Umpamani erang kaulun teka naun naan jatuh kaukui babiri, balalu hanye kawawaian erang kaukui-inun sa sagar naulahni? Himat hanye sagar nanan babiri sa suei pulu suei kaukui yiru hang padang rikut balalu tulak ngantilau sa wawai yiru hampe haba.

⁵Dami babirini yiru habani, hanye arai tatuu balalu nagantungni babiri yiru hang papaleni,

⁶balalu nginsingni mudi. Udi hie hanye nerau kawan hengau anri kawan tatanggani, nelang kaeau, ‘Hayu takam arai mihewu. Babiriku sa wawai haut habaku!’

⁷Nah, kalayiru pada hang surga naan kaaraien sa labis hante daya erang kaulun badosa sa batobat, hengka daya suei pulu suei kaulun sa haut maeh nelang puang parlu batobat.”

⁸“Atawa umpamani erang kaulun wawei naan sapuluh kadiki duit perak, balalu kawawaian erang kadiki-inun sa sagar naulahni? Hanye sagar nutung palita balalu mapas lewuni nelang ngantilau hang awe-awe hampe hanye kahaba duit yiru.

⁹Hang tawuk hanye kahaba duit yiru, hanye nerau kawan hengau nelang kawan tatanggani, balalu kaeau, ‘Aku sanang tatuu haut kahaba kamulek duitku sa wawai. Hayu takam arai mihewu!’

¹⁰Kalayiru pada malekat Alatalla arai mihewu amun naan erang kaulun jahat batobat teka kawan dosani. Parisayaleh!”

¹¹Yesus kaeau lagi, “Naan erang kaulun ambah sa uweng rueh kaulun anak upu.

¹²Sa bunsu kaeau ma hanye, ‘Ambah, ami ma aku itati bagianku teka panatau takam.’ Balalu ammahni mambagi panatauni yiru ma kararueh anakni.

¹³Papire anrau udi yiru anak bunsu yiru ngari warisan bagianni yiru balalu tulak ma negeri sa lawit. Hang yaru hanye ngawilanja duitni anri welum egah-embung.

¹⁴Tawuk katuluh duitni haut galis, salenga hang negeri yiru timbul juju lau sa tamam, hampe hanye mulai welum susah.

¹⁵Balalu hanye tulak bagawi baya erang kaulun panduduk hang yiru, sa nunyu hanye ma ume nyaga iwekni.

¹⁶Hanye ngunu ngisi wuntungni makai kutaen kawan iwek yiru. Biar hanye kajuju tatuu, kude puang sunah erang kaulun ngami anakuta ma hanye.

¹⁷Akhirni hanye sadar balalu kaeau, ‘Kawan ulun sa bagawi baya hi ambah kutaen here balabihan, kude aku hang yiti kai matei kalauan!

¹⁸Aku sagar tulak lepuh nunung ambahku, balalu kaeau ma hanye, Ambah, aku haut badosa ma Alatalla nelang ma hi Ambah.

¹⁹Aku puang patut lagi naantuh anak Ambah. Anggapleh aku erang kaulun upaan Ambah.’

²⁰Balalu hanye tulak nunung ambahni. Lagi lawit teka lewu, ambahni haut katantau hanye. Anri kasungu ambahni nempat nahalu hanye, balalu maluk nelang nyiuk hanye.

²¹‘Ambah’, eau anak yiru, ‘aku haut badosa ma Alatalla nelang ma hi Ambah. Aku puang patut lagi naantuh anak Ambah.’

²²Kude ambahni nerau kawan palayanni palus kaeau, ‘Hinang! Alap pakaian sa panga maeh, palus huwe ma hanye. Tamu utas hang kingkingni, nelang sapatu hang peeni.

²³Udi yiru alap anak sapi sa munuk palus samalis. Takam sagar kuman nelang arai mihewu.

²⁴Daya anakku yiti haut matei, itati welum mulek; hanye haut wawai, itati haba lagi.’ Here balalu mulai bapesta.

²⁵Parahatan yiru, anak sa taraulu naan hang ume. Tawuk hanye mudi dami hampe rite lewu, hanye karengei lengan papaluan nelang tanrik-tampak.

²⁶Hanye nerau erang kaulun teka kawan palayanni, balalu nunti, ‘Inun ulah hang lewu yiti?’

²⁷Palayan yiru nuing, ‘Andi Tuan hawi mulek! Nelang ambah Tuan haut nunyu nyamalis anak sapi sa munuk, daya hanye haut panalu mulek anakni hawuang kaadaan salamat!’

²⁸Anak sa taraulu yiru sangit tuu hampe hanye puang hamen mambai ma lewu. Balalu ambahni minau ngatau hanye nampan mambai.

²⁹Kude hanye kaeau, ‘Bataun-taun lawahni aku bagawi bahimat ma hi ambah. Puang suah aku nawan parentah ambah. Kude inun sa naami ambah ma aku? Huan suah sunah erang kaukui kambing hi ambah ngami ma aku nampan aku bapesta anri kawan hengauku!

³⁰Anak Ambah yiru haut nangalis panatau ambah baya wawei pandayangan, kude kalayiru hanye hawi, hi Ambah nyamalis anak sapi sa munuk ma hanye!’

³¹‘Anakku,’ tuing ambahni, ‘hanyu saratang naan hang yiti baya aku. Katuluh sa milikku yiru pada miliknu.

³²Kude takam patut bapesta anri arai mihewu, daya andinu yiru haut matei, kude itati welum mulek; hanye haut wawai, kude itati haut haba lagi.’ ”