Read Ma'anyan LUKAS 16 Bible Online

LUKAS 16 - Ma'anyan bible

LUKAS 16

¹Yesus kaeau ma kawan ulun sa umba hanye, “Naan erang kaulun tatau. Hanye uweng erang kaulun pagawai kauangan sa ngurus panatauni. Ulun tatau yiru kaiyuh laporan neu pagawai kauanganni ngawilanja duitni.

²Balalu hanye nerau pagawai kauangan yiru palus kaeau, ‘Inun yiti sa rengeiku neu hanyu? Itati, sarah ma aku laporan lengkap neu pagawianu ngurus panatauku. Hanyu puang iyuh lagi jari pagawai kauanganku.’

³Balalu pagawai kauangan yiru bapikir, ‘Inun sa harus naulahku itati? Tuanku ngunu nyantaduh aku. Manyangkul, aku puang kaule, laku sadakan aku umangan.

⁴Aku naan akal; amun aku haut nasantaduh, aku harus uweng rama hengau sa hamen nampung aku hang lewu here!’

⁵Balalu pagawai kauangan yiru nerau katuluh ulun sa naan utang anri tuanni. Ma sa palanungkai, hanye kaeau, ‘Pire utangnu ma tuanku?’

⁶Ulun yiru nuing, ‘Jatuh balanai minyak zaitun.’ Pagawai yiru kaeau ma hanye, ‘Iti surat utangnu. Maharung hinang surat; dimempulu.’

⁷Udi yiru hanye kaeau ma ulun sa karueh, ‘Pulaksanai, pire utang pulaksanai?’ Ulun yiru nuing, ‘Sakuyan karung gandum.’ Pagawai kauangan yiru kaeau ma hanye, ‘Iti surat utangnu. Surat walu jatuh.’

⁸Balalu majikan teka pagawai kauangan sa puang jujur yiru nawat pagawaini yiru daya tindakanni sa pintar yiru; daya kawan ulun dunia yiti diwi pintar ngatur urusan here teka kawan ulun sa welum hawuang piraai.”

⁹Balalu Yesus pantane lagi, eauni, “Rengei! Pakaileh panatau dunia yiti pakai ngaiyuh hengau, nampan amun panatau dunia yiti haut puang baharaga lagi, naun sagar natarime hang unengan muneng sa kalalawah.

¹⁰Ulun sa tau naparisaya hawuang kawan hal rumis, tau naparisaya pada hawuang kawan hal hante. Kude ulun sa puang tau naparisaya hawuang kawan hal rumis, puang tau naparisaya pada hawuang kawan hal hante.

¹¹Jari, amun neu panatau dunia yiti naun haut puang tau naparisaya, hie hamen ngami kaparisayaan ma naun panatau rohani?

¹²Nelang amun neu barang sa namiliki ulun lain, naun bawilah tuu puang tau naparisaya, hie hamen ngami ma naun inun sa jari haratanu?

¹³Puang sunah erang kaulun tau bagawi ma rueh kaulun majikan; daya hanye sagar diwi sinta saisa teka sa lain, atawa hanye sagar diwi satia ma majikan saisa teka sa lain. Kalayiru pada anri naun. Naun puang tau bagawi ma Alatalla nelang ma harata banda pada.”

¹⁴Kawan ulun Farisi karengei katuluh sa naeau daya Yesus. Balalu here kakihi hanye, daya here sindi duit.

¹⁵Kude Yesus kaeau ma here, “Naun ulun sa hang hadapan ulun lain nadinung bujur, kude Alatalla karasa hawuang atei naun. Daya inun sa naanggap ambau daya murunsia, nadinung imbe daya Alatalla.

¹⁶Hukum sa naami daya Moses nelang ajaran kawan nabi, magun napakai hampe hang tawuk hi Yohanes Pambaptis. Hengka tawuk yiru Kabar Maeh neu kala awe Alatalla marentah yalah Raja santar nawara. Nelang ulun maksa dirini nampan jari ulun pidian wat Alatalla.

¹⁷Kude diwi murah langit anri tane wawei, teka isa huruf hawuang Hukum Alatalla nasamawai.

¹⁸Hie sa sarak anri daranganni balalu kawin anri wawei lain, ulun yiru ibela. Nelang ulun sa kawin anri wawei sa haut nasansarak, pada ibela.”

¹⁹“Naan erang kaulun tatau. Pakaianni uras rarang haragani, tiap anrau hanye welum dirak dirai.

²⁰Hang hadapan wanawang lewuni naandak erang kaulun paua bangaran hi Lazarus. Tengani penu purat.

²¹Hanye ngunu ngisi wuntungni makai tawurehan rote sa lawu teka meja ulun tatau yiru. Antahu likan hawi nilap puratni.

²²Udi hie ulun paua yiru matei balalu nainsing malekat ma unengan tahormat hang tuhi hi Abraham hang surga. Ulun tatau yiru pada matei balalu napasar.

²³Hang dunia ulun matei hanye bahimat ngaret kahanangen. hang tawuk hanye mihangut nantau teka yiru ma ambau, hanye kadinung hi Abraham hang unengan sa lawit baya hi Lazarus naan hang tuhi hi Abraham.

²⁴‘Bapak Abraham!’ herau ulun tatau yiru. ‘Palelo aku. Huyu hi Lazarus nyusup kingkingni mawuang ranu balalu hawi nyamehu lelaku. Aku sangsara tuu hawuang apui yiti!’

²⁵Kude hi Abraham nuing, ‘Itung anakku: salawah hanyu welum hanyu haut kaiyuh kawan sa maeh, kude hi Lazarus kaiyuh kawan sa puang maeh. Itati hanye sanang hang yiti, kude hanyu sangsara.

²⁶Kamulek, hang helang hanyu anri kami haut naulah isa labak sa lalem nelang laga, nampan ulun teka yiti puang tau mayaru nelang ulun teka yaru puang tau ma yiti!’

²⁷‘Amun kalayiru, Bapak,’ eau ulun tatau yiru, ‘aku ilaku tatuu hanyu ngutus hi Lazarus ma lewu ambahku.

²⁸Naan dime pulaksanaiku hang yaru. Huyu hi Lazarus ngampi itung here, nampan ada hampe here pada lawu ma unengan siksaan yiti.’

²⁹Hi Abraham nuing, ‘Hang here haut uweng kawan buku Moses anri buku kawan nabi! Elahni here nampalus inun sa nasurat hawuang kawan buku yiru!’

³⁰Kude ulun tatau yiru nuing, ‘Yiru puang sukup, Bapak Abraham. Kude amun naan ulun matei welum mulek nelang hawi nunung here, here sagar batobat teka kawan dosa here.’

³¹Kude hi Abraham kaeau, ‘Amun here puang paraduli parentah Moses anri kawan nabi, himat here puang sagar parisaya jua, walaupun naan ulun matei welum mulek.’ ”