Read Ma'anyan LUKAS 17 Bible Online

LUKAS 17 - Ma'anyan bible

LUKAS 17

¹Yesus kaeau ma kawan ulun sa umba hanye, “Kawan hal sa ngulah sabab ulun badosa himat sagar naan. Kude silaka ulun sa ngulah sababni!

²Labis maeh amun watu gilingan nagagueng hang diungni, balalu hanye naumpe mawuang laut, teka hanye ngulah sabab erang kaulun hengka kawan ulun rumis yiti badosa.

³Daya yiru ware naun waspada! Amun pulaksanainu badosa, tagur hanye. Amun hanye manyasal, ampun hanye.

⁴Amun hanye badosa ma hanyu pitu kali erang anrau nelang tiap kali hawi nunung hanyu palus kaeau, ‘Aku laku maaf,’ ampun hanye.”

⁵Kawan rasul kaeau ma Tuhan Yesus, “Tuhan, ampikansing iman kami.”

⁶Tuhan nuing, “Amun naun uweng iman kala hante diki sasawi, naun tau kaeau ma kakau murbei yiti, ‘Pabunat hanyu palus pataria hang laut,’ himat kakau yiti sagar nuu parentahnu.”

⁷“Umpamani erang kaulun teka naun uweng palayan sa bagawi hang ume atawa makatik babiri. Amun palayan yiru mudi, inun hanye kaeau ma palayanni, ‘Hayu hinang kuman’?

⁸Batantu puang! Kabalikanni hanye sagar kaeau ma palayan yiru, ‘Sadia anakuta ma aku. Pakai pakaian sa barasis nelang saga aku padingian aku kuman nguut; udi yiru hanyu iyuh kuman.’

⁹Angneh? Palayan yiru puang parlu natawat daya haut nuu parentah tuanni.

¹⁰Kala yiru pada naun. Amun naun haut nampalus katuluh sa naparentah ma naun, eauleh, ‘Kami ekat palayan biasa; kami ekat nampalus kawajiban kami.’ ”

¹¹Hawuang pakiaan ma Yerusalem, Yesus mitah daerah perbatasan Samaria anri Galilea.

¹²Tawuk masuk isa tumpuk, hanye natunung daya sapuluh kaulun bakadan. Here minri teka lawit

¹³nelang nanterau, “Yesus! Tuan! Palelu kami!”

¹⁴Tawuk Yesus kadinung here, hanye kaeau, “Hulu tunung kawan imam, laku here mariksa tenga naun.” Ganjah here takia, panyakit here wawai.

¹⁵Tawuk erang kaulun teka here kaingkam hanye haut ware, hanye miulek nelang basurak nawat Alatalla.

¹⁶Balalu hanye ijuku hang hadapan Yesus, ngantuh tarima kasih ma hanye. Ulun yiru erang kaulun Samaria.

¹⁷Balalu Yesus kaeau, “Angneh naan sapuluh kaulun sa nasamare? Hang awe sa suei kaulun lagi?

¹⁸Wuah inun ekat ulun asing yiti sa miulek ngantuh tarima kasih ma Alatalla?”

¹⁹Balalu Yesus kaeau ma ulun yiru, “Ambuan, hulu tulak. Daya hanyu parisaya ma aku hanyu ware.”

²⁰Papire ulun Farisi nunti ma Yesus hantamian Alatalla hawi nampan marentah. Yesus nuing, “Pamarentahan Alatalla puang mulai anri kawan tanda sa tau nadinung ulun,

²¹hampe ulun tau kaeau, ‘hayu dinung, iti hanye!’ atawa ‘Hang yaru hanye!’ Daya Alatalla haut mulai marentah hang penah-penah naun.”

²²Udi yiru Yesus kaeau ma kawan ulun sa umba hanye, “Sagar hawi wayahni naun sindi kadinung isa anrau teka kawan anrau Anak Murunsia, kude naun puang kaiyuh ninungni.

²³Yati ulun sagar kaeau ma naun, ‘Dinung, hang yiru!’ atawa ‘Dinung, hang yiti!’ Kude ada naun kaluar ngantilau hanye.

²⁴Kala wangun kelat wawereu hang langit, nelang basahaya teka langit tuhi ma tuhi langit, kala yiru pada die kaadaan Anak Murunsia hang anrau watni.

²⁵Kude pamulaanni hanye harus wahai kaingkam kahanangen nelang puang natarime daya kawan ulun jaman yiti.

²⁶Hang anrau Anak Murunsia nalalea yati, kaadaanni kala hang jaman Nuah sadi.

²⁷Ulun kuman nguut, kawin; tarus kalayiru hampe hi Nuah masuk mawuang kapal balalu baah hawi nelang nampatei kawan ulun katuluh yiru.

²⁸Pada kala hang jaman Lot. Ulun kuman nguut, miarian, miamulean nelang ngambuan lewu.

²⁹Kude tawuk hi Lot kaluar teka Sodom, hang anrau yiru apui anri balirang minau teka langit palus ngabinasa here katuluh.

³⁰Kala yiru kaadaanni yati hang anrau Anak Murunsia nalalea.

³¹Hang anrau yiru ulun sa rahat naan hang ambau hapau lewuni ada minau neu ngalap kawan barangni sa naan hawuang lewu. Kala yiru pada ulun sa rahat hang ume ada mudi ma lewuni.

³²Itung inun inun sa haut wuah darangan Lot!

³³Ulun sa ngakali nyalamat pamelumni, sagar kawawaian pamelumni. Kude ulun sa kawawaian pamelumni sagar nyalamat pamelumni.

³⁴Parisayaleh: Hang malem yiru, rueh kaulun rahat manre hang isa ranjang, erang kaulun sagar nainsing, erang kaulun natanan.

³⁵Rueh kaulun wawei rahat manggiling gandum, erang kaulun sagar nainsing, erang kaulun sagar natanan. [

³⁶Rueh kaulun rahat bagawi hang ume, erang kaulun sagar nainsing, erang kaulun natanan.]”

³⁷Kawan ulun sa umba Yesus nunti, “Hang awe hal yiru sagar jari Tuhan?” Yesus nuing, “Hang awe naan bangkai, hang yiru naan wurung panguta bangkai.”