Read Ma'anyan LUKAS 19 Bible Online

LUKAS 19 - Ma'anyan bible

LUKAS 19

¹Tawuk Yesus hampe hang Yerikho, hanye palus takia mitah tumpuk yiru.

²Hang tumpuk yiru naan erang kaulun kapala panagis pajak sa tatau. Ngaranni hi Zakheus.

³Hanye sindi kadinung hie Yesus yiru, kude daya ulun rama tatuu nelang tengani imbe, balalu hanye puang kaiyuh kadinung Yesus.

⁴Balalu, hanye nempat nahuluan ulun rama, mambai kakau kayu, nampan kaiyuh ninung Yesus sa puang lawah lagi sagar mitah hang yiru.

⁵Tawuk Yesus hampe hang kakau kayu yiru, hanye mihangut ma ambau balalu kaeau, “Zakheus, hinang minau! Daya aku harus ganta ma lewunu anrau yiti.”

⁶Hi Zakheus iwawansit minau palus nahalu Yesus anri arai atei.

⁷Katuluh ulun sa kadinung hal yiru mulai mangomel. Here kaeau, “Seh! Hanye ganta hang lewu ulun sa puang maeh!”

⁸Dami haut hang lewuni, hi Zakheus minri palus kaeau ma Yesus, “Tuhan, saparu teka harataku sagar na sadakahku ma ulun paua; nelang hie sa suah wuah tipuku, aku sagar bayar kamulek ma hanye epat kali lipat!”

⁹Balalu eau Yesus, “Hang anrau yiti hanyu anri katuluh kulawaraganu nasalamat daya Alatalla nelang naami pamelum sa wau, daya hanyu pada katurunan Abraham.

¹⁰Anak Murunsia hawi lepuh ngantara nelang nyalamat ulun sa tawang.”

¹¹Ganjah ulun nyanrengei Yesus bapaner, hanye nyarita isa rarapisan. Daya, tawuk yiru hanye haut rupak Yerusalem, nelang ulun minda himat Alatalla puang lawah lagi sagar marentah yalah Raja hang dunia.

¹²Yesus kaeau, “Naan erang kaulun bangsawan sa tulak ma negeri lawit neu nadudus jari raja, udi yiru hanye mudi lagi.

¹³Kapihuan tulak, hanye nerau sapuluh kaulun palayanni, balalu ngami ma here tiap tenga erang kadiki duit amas. ‘Badagang makai duit yiti padingian aku tulak,’ eauni ma here.

¹⁴Kude panduduk negerini yiru marikang anri hanye. Dami hanye haut tulak, here ngirim utusan nampan iwara, ‘Kami puang hamen ulun yiti jari raja kami.’

¹⁵Kude bangsawan yiru nadudus jari raja, udi yiru hanye mulek lagi ma negerini. Balalu hanye nerau kawan palayanni mangadap, nampan ngarasa pire kauntungan sa haut iyuh here.

¹⁶Palayan palanungkai hawi palus kaeau, ‘Tuan, isa duit amas sa naami tuan ma aku yiru, haut aku kaiyuh jari sapuluh.’

¹⁷‘Maeh,’ eau tuan yiru, ‘hanyu palayan sa maeh! Daya hawuang kawan hal sa rumis hanyu tau naparisaya, aku sagar ngulah hanyu jari panguasa sapuluh tumpuk.’

¹⁸Palayan sa karueh hawi palus kaeau, ‘Tuan, isa duit amas sa naami Tuan ma aku yiru, haut aku kaiyuh jari dime.’

¹⁹Ma palayan yiru raja yiru kaeau, ‘Hanyu sagar jari panguasa dime tumpuk.’

²⁰Palayan isa lain hawi palus kaeau, ‘Tuan, iti duit Tuan; simuhku hang sapu tangan.

²¹Aku takut anri Tuan, daya Tuan ulun karas. Tuan ngalap inun sa puang wat Tuan, nelang Tuan ngutik hasil hang unengan sa puang naamule daya Tuan.’

²²Raja yiru kaeau ma hanye, ‘Hanyu palayan sa jahat! Sarurui anri kawan lengannu raerai aku sagar nukum hanyu. Hanyu karasa aku ulun karas; Aku ngalap inun sa puang watku nelang ngutik hasil hang unengan sa puang aku ngamule.

²³Amun kalayiru wuah inun hanyu puang namasuk duit yiru ma bank nampan amun aku mudi aku tau narime duit yiru baya bungani?’

²⁴Kamulek raja yiru kaeau ma kawan ulun sa minri hang yiru, ‘Alap duit yiru teka hanye palus ami ma palayan sa uweng sapuluh duit amas yiru.’

²⁵Kude kawan ulun yiru kaeau, ‘Tuan, hanye haut uweng sapuluh.’

²⁶Raja yiru nuing, ‘Itung: ulun sa haut uweng, ma hanye sagar naami labis wahai lagi. Kude ulun sa angaan uweng inun-inun, inun sa naan hang hanye sagar naalap pada teka hanye.

²⁷Itati insing ma yiti kawan musuhku yiru sa puang hamen aku jari rajani. Wunu here katuluh hang hadapan aku!’ ”

²⁸Udi Yesus iwara katuluhni yiru hanye takia dahulu hang hadapan here nuju Yerusalem.

²⁹Tawuk hampe rupak Betfage anri Betania hang Bukit Zaitun, hanye nunyu rueh kaulun kawan ulun sa umba hanye tulak badahulu.

³⁰“Hulu ma tumpuk sa hang hadapan yiru,” eau Yesus ma here, “amun naun masuk hang yaru, naun sagar kadinung erang kaukui anak kaledai nahuruk. Kaledai yiru huan suah natunggang daya ulun. Uka hurukan kaledai yiru balalu insing ma yiti.

³¹Amun ulun nunti naun, ‘Wuah inun naun nguka hurukan kaledai yiru?’ wara, ‘Tuhan parlu makaini.’ ”

³²Karueh kaulun ulun sa umba Yesus yiru tulak, balalu panalu katuluhni kala sa naeauni.

³³Rahat here nguka hurukan anak kaledai yiru, ampun kaledai yiru kaeau ma here, “Wuah inun naun nguka hurukan kaledai yiru?”

³⁴Here nuing, “Tuhan parlu makaini.”

³⁵Balalu here nginsing anak kaledai yiru ma Yesus. Udi hie here nambik jubah here hang ambau kaledai yiru palus ngarawah Yesus sungkat ma ambauni.

³⁶Tawuk hanye mitah makai kaledai yiru, kawan ulun merang jubah here hang lalan.

³⁷Tawuk Yesus kai hampe hang Yerusalem, hang lalan sa minau hang Bukit Zaitun, katuluh kawan ulun rama umba hanyeyiru mulai nawat Alatalla nelang ngantuh tarima kasih ma hanye daya katuluh kaajaiban sa haut nasaksi here.

³⁸Here nanterau, “Naberkat Raja sa hawi hawuang ngaran Tuhan! Sanang marauh hang surga, nelang tawat ma Alatalla!”

³⁹Papire ulun Farisi teka penah ulun rama yiru kaeau ma Yesus, “Guru, huyu kawan ulun sa umba hanyu suni.”

⁴⁰Yesus nuing, “Parisayaleh! Amun here suni, kawan watu yiti sagar nantiak.”

⁴¹Tawuk Yesus magin rupak Yerusalem, nelang kadinung tumpuk yiru, hanye nangis tumpuk yiru.

⁴²Eauni, “U Ahinu, leha kaehni jaka anrau yiti hanyu karasa inun sa tau nginsing pidamai! Kude itati hanyu puang tau kadinung hanye.

⁴³Hanyu sagar kaingkam hinra tawuk, kawan musuhnu ngulah punte-walewe hang kaliling hanyu; here sagar ngawariung hanyu nelang mukah hanyu teka katuluh unengan.

⁴⁴Here sagar ngampi hansur hanyu baya katuluh panduduknu; nelang puang sunah erang kawuding watu sagar napaladar here ipasusun hang unenganni, daya gana hanyu puang mantaru tawuk Alatalla hawi neu nyalamat hanyu!”

⁴⁵Yesus masuk ma Lewu Tuhan balalu palus ngunur kawan padagang hang yiru.

⁴⁶“Hawuang Surat Barasis,” eauni ma here, nasurat kalayiti, “Alatalla kaeau, ‘Lewuku sagar jari lewu unengan badoa.’ Kude naun ngulahni jari hanai parampok!”

⁴⁷Tiap anrau Yesus ngajar hang Lewu Tuhan. Kawan imam kapala anri kawan guru agama, baya kawan pamimpin Yahudi ngaheng munu hanye.

⁴⁸Kude puang kahaba lalan neu nampalus hal yiru, daya katuluh ulun tatap nyanrengei hanye, nelang tapikat ma kawan lenganni.