Read Ma'anyan LUKAS 2 Bible Online

LUKAS 2 - Ma'anyan bible

LUKAS 2

¹Hang tawuk yiru Kaisar Agustus marentah nampan katuluh waraga nagara Karajaan Roma mandaftar diri neu sensus.

²Sensus sa palanungkai yiti natampalus tawuk hi Kirenius jari gubernur daerah Siria.

³Katuluh ulun hang tawuk yiru tulak hampi tumpukni maisasaan, nampan nadaftar.

⁴Hi Yosef pada tulak teka Nazaret hang Galilea, ma Betlehem hang Yudea, unengan Raja Dawid nakayaan; daya hi Yosef teka turunan Dawid.

⁵Hi Yosef mandaftar diri sinrah hi Maria tunanganni, sa rahat mihawuntung.

⁶Tawuk here hang Betlehem hampe wayahni ma hi Maria kayaan.

⁷Hanye ngayaan erang kaulun iya upu, anakni sa taraulu. Anak yiru nabungkusni makai kain, balalu naelahni hawuang dulang sa mahuang riumi; daya here puang kahaba unengan manginap.

⁸Hang malem yiru naan kawan pakatik rahat nyaga kawan babirini hang padang rikut hang daerah yiru.

⁹Salenga malekat Tuhan nantarang tenga ma here, nelang sahaya maraai teka Tuhan nyiar ngampi raai here, balalu here takut tatuu.

¹⁰Kude malekat yiru kaeau, “Ada takut! Daya aku hawi nginsing kabar maeh ma naun — kabar sa tuu-tuu ngampi raai katuluh ulun.

¹¹Anrau yiti hang tumpuk Dawid haut nakayaan Raja Panyalamat naun hanyeyiru Kristus, Tuhan.

¹²Iti tandani: Naun sagar panalu erang kaulun genda nabungkus makai kain, nelang mangkading hawuang dulang.”

¹³Salenga malekat yiru nasinrah rama malekat lain, sa nawat Alatalla. Here kaeau,

¹⁴“Tawat Alatalla hang langit sapanga ambau! Nelang kasanangen ma murunsia hang ambau tane sa ngampi sanang atei Tuhan!”

¹⁵Dami udi kawan malekat nanan here nelang mulek ma surga, kawan pakatik yiru kaeau anri sameh here, “Mara takam hampi Betlehem lepuh ninung kajadian sa jari yiru, sa nawara Tuhan ma takam.”

¹⁶Here hinang tulak, balalu panalu hi Maria anri hi Yosef, baya genda yiru sa rahat mangkading hawuang dulang.

¹⁷Tawuk kawan pakatik kadinung genda yiru, here nyarita inun sa nawara kawan malekat neu genda yiru.

¹⁸Katuluh ulun mandam karengei sarita kawan pakatik yiru.

¹⁹Kude hi Maria nyimuh katuluh yiru hawuang ateini nelang ngunuanni.

²⁰Kawan pakatik yiru mulek hampi padang rikut nelang nawat nante Alatalla, daya katuluh sa haut rengei nelang dinung here, pas kala sa nawara daya malekat.

²¹Dami haut baumur walu anrau, iya yiru nasunat. Palus here ngampi ngaran hanye Yesus, ngaran sa naami malekat ma hanye dahulu teka hanye naihuwuntung daya inehni.

²²Hampe wayahni hi Yosef anri hi Maria nampalus hadat ibarasis manyu hukum Moses. Jari here nginsing iya yiru ma Yerusalem neu nasarah ma Tuhan.

²³Daya hawuang hukum Tuhan nasurat kala yiti, “Tatiap iya upu sa taraulu harus nasarah ma Tuhan.”

²⁴Here pada bamaksud nyarah parapah, hanyeyiru erang pasang burung kuku atawa rueh kaukui wurung dara sa muda, kala sa haut natukas hawuang Hukum Tuhan.

²⁵Hang tawuk yiru hang Yerusalem naan erang kaulun bangaran hi Simeon. Hanye ulun maeh, sa takut ma Alatalla nelang ganjah nganrei wayahni Alatalla nyalamat Israel. Roh Alatalla nyinrah hanye,

²⁶nelang Roh Alatalla haut iwara ma hanye himat hanye puang sagar matei amun huan kadinung Raja Panyalamat sa najanji daya Tuhan.

²⁷Hi Simeon naayak daya Roh Alatalla, masuk ma Lewu Tuhan. Hang tawuk yiru hi Yosef anri hi Maria nginsing Yesus sa lagi rumis yiru masuk neu nampalus upasara sa naparentah daya hukum agama.

²⁸Maka hi Simeon ngalap iya yiru palus ngantung hanye, balalu nawat Alatalla,

²⁹“Itati, Tuhan, hanyu haut nampalus janjinu. Elahni walahnu yiti matei anri ranai.

³⁰Daya makai mateiku raerai aku haut kadinung Panyalamat sa teka hanyu.

³¹Panyalamat yiru haut nasadianu ma katantuluh bangsa:

³²kala piraai sa ngampi raai lalan ma kawan bangsa sa lain, nampan hawi nunung hanyu; hanyeyiru piraai sa nginsing kahormatan ma ulun Israel.”

³³Ambah anri ineh iya yiru mandam karengei inun sa naeau daya Simeon neu iya here.

³⁴Hi Simeon mamberkat here nelang kaeau ma hi Maria, ineh iya yiru, “Iya yiti haut napidi daya Alatalla pakai ngabinasa anri pakai nyalamat rama ulun Israel. Hanye sagar jari tanda teka Alatalla, sa sagar nalawan daya ulun rama,

³⁵maka daya kala yiru uras tabungkar inun sa hawuang atei here. Kahanangen atei sagar namatan ateinu kala nasuduk makai padang.”

³⁶Naan pada erang kaulun nabi wawei sa haut matueh tatuu. Ngaranni hi Hana, anak Fanuel, teka bubuhan Asyer. Udi narangan pitu taun,

³⁷hi Hana walo, nelang itati hanye baumur walumpulu epat taun. Hanye puang suah nanan Lewu Tuhan. Kaanrau kamalem hanye sumbayang hang yiru ma Alatalla anri badoa nelang puasa.

³⁸Pas hang tawuk yiru pada hanye hawi, balalu nawat Alatalla nelang pantane kaeau neu iya yiru ma katantuluh ulun sa nganrei wayahni Alatalla mambebas Yerusalem.

³⁹Udi hi Yosef anri hi Maria nampalus katuluh sa nawajib daya Hukum Tuhan, here mudi ma Nazaret hang Galilea.

⁴⁰Iya yiru magin batambah hante nelang tingkas. Nelang hanye pintar maharati nelang tuu-tuu nasinta daya Alatalla.

⁴¹Tiap taun ulun matueh Yesus tulak ma Yerusalem lepuh umba Pesta Paskah.

⁴²Tawuk Yesus baumur dua walas taun, here tulak ma pesta yiru kala biasa.

⁴³Dami pesta yiru luput here mudi, kude Yesus, iya yiru, magun muneng hang Yerusalem, ineh ambahni puang karasa.

⁴⁴Here minda hanye haut umba baya anri rombongan. Haut erang anrau here takia, dami kariwe wau here ngantilau hanye hang padang kula waraga nelang kawan ulun kapatuhen here.

⁴⁵Kude here puang kahaba hanye, balalu here mulek ma Yerusalem ngantilau hanye.

⁴⁶Udi telu anrau ngantilau, here kahaba hanye hawuang Lewu Tuhan. Hanye rahat maharung nyanrengei kawan guru agama nelang nuing wahai tuntian.

⁴⁷Katuluh ulun sa karengei hanye wauh daya kapintarenni nuing.

⁴⁸Ulun matuehni pada wauh kadinung hanye. Inehni kaeau ma hanye, “U anak, wuah inun hanyu ngulah kala yiti anri kami? Ambahnu anri inehnu gupuh ngantilau hanyu!”

⁴⁹Yesus nuing, “Wuah inun hi ambah anri hi ineh ngantilau aku? Inun hi ambah anri hi ineh puang karasa sa aku harus naan hawuang Lewu Ambahku?”

⁵⁰Kude here puang kataru lengan tuing Yesus yiru.

⁵¹Udi yiru Yesus mudi sinrah here ma Nazaret, nelang ngalut nuu ma here. Katuluh hal yiru nasangkeleh daya inehni hawuang ateini.

⁵²Yesus magin batambah hante nelang batambah pintar maharati, nelang nasinta daya Alatalla pada nakasinnien daya murunsia.