Read Ma'anyan LUKAS 21 Bible Online

LUKAS 21 - Ma'anyan bible

LUKAS 21

¹Hang Lewu Tuhan, Yesus kadinung kawan ulun tatau namasuk duit mawuang pati parapah tarima kasih.

²Hanye kadinung naan erang kaulun wawei walu sa paua tatuu, namasuk rueh kadiki duit tambaga.

³Balalu Yesus kaeau, “Rengei: wawei walu yiti namasuk diwi wahai teka katuluh ulun lain.

⁴Daya here katuluh ngami teka kalabihan haratani. Kude wawei walu yiti, biar hanye paua tatuu, haut ngami katuluh sa naan hang hanye sa naparlu dayani pakaini welum.”

⁵Naan kawan ulun sa maner neu kalaawe kaehni Lewu Tuhan sa naampi bungas makai kawan watu sa maeh-maeh pada makai kawan barang sa nasarah ma Alatalla. Balalu Yesus kaeau ma here,

⁶“Yati naan wayahni, katuluh sa dinung naun yiti sagar nasantumbang; puang uweng sunah isa watu hang yiti sa sagar muneng ipasusun hang unenganni!”

⁷Here nunti ma Yesus, “Guru, hantamian hal yiru die tulus? Kamulek inun tandani amun haut hampe wayahni hal yiru die tulus?”

⁸Yesus kaeau, “Hati-hati, ada hampe naun wuah tipu. Rama ulun sagar hawi makai ngaranku, nelang kaeau, ‘Aku yiti Tuhan!’ nelang ‘Wayahni haut hampe.’ Kude ada naun umba here.

⁹Ada pada takut amun naun karengei kabar neu paparangan anri pambaruntakan. Katuluhni yiru harus jari dahulu. Kude yiru puang baarati haut hampe wayahni kiamat.”

¹⁰Balalu Yesus nampalus papaneranni, eauni, “Bangsa saisa sagar baparang nawan bangsa sa lain. Nagara saisa sagar manyarang negara sa lain.

¹¹Hang awe-awe sagar naan gempa bumi sa tamam, juju lau nelang panyakit sampar. Sagar naan kajadian sa maka sanringinen nelang maka tatakut hang langit.

¹²Kude dahulu teka kawan kajadian yiru, naun sagar najamba nelang nasiksa. Naun sagar naadili hang kawan lewu sumbayang nelang natamasuk mawuang panjara. Kamulek naun sagar nainsing ma hadapan kawan raja anri kawan panguasa daya gana naun umba aku.

¹³Yiru kasampatan ma naun nampan iwara Kabar Maeh teka Alatalla.

¹⁴Ampikansing atei naun, naun puang sagar khawatir neu inun sa harus naantuh naun pakai mambela diri.

¹⁵Aku raerai sagar ngami ma naun kawan lengan anri kapintaren yiru, hampe puang sunah erang kaulun teka kawan musuh naun kaiyuh nawan atawa nyual inun sa naeau daya naun.

¹⁶Naun sagar nasarah daya ineh ambah naun, daya kawan pulaksanai naun, daya kulawaraga naun nelang daya kawan hengau naun. Mehe teka naun sagar nawunu daya here.

¹⁷Katuluh ulun muar-marikang anri naun daya gana naun ulun sa umba aku.

¹⁸Kude puang sunah erang kawila wulu teka ulu naun sagar wawai.

¹⁹Amun naun batahan anri sabar, naun sagar nasalamat.”

²⁰“Amun naun kadinung Yerusalem nawariung daya tantara, naun sagar karasa himat tumpuk yiru puang lawah lagi sagar nasamawai.

²¹Hang tawuk yiru kawan ulun sa naan hang Yudea harus nempat hampi gunung. Here sa naan hawuang tumpuk harus nanan tumpuk, nelang here sa naan hang luar tumpuk ada masuk mawuang tumpuk.

²²Daya kawan anrau yiru hanyeyiru ‘Kawan anrau Hukuman Natampalus’, nampan anri kalayiru tulus inun sa haut nasurat hawuang Surat Barasis.

²³Tuu leha maka sanringinenni kawan anrau yiru ma kawan wawei sa mihawuntung, nelang ma ineh sa magun ngampumu genda! Negeri yiti sagar kaingkam kasusahen sa tamam, nelang Tuhan sagar nukum bangsa yiti.

²⁴Naan sa sagar nawunu makai padang, naan pada sa sagar nainsing jari tawanan ma kawan negeri lain; balalu kawan ulun sa puang kataru Alatalla sagar ngiik narah Yerusalem hampe jumpuh wayah sa haut natukas Tuhan ma here.”

²⁵“Yati hang mate anrau, wulan, nelang kawan wawahiang sagar dinung kawan tanda. Hang ambau tane, kawan bangsa sagar takut nelang bingung nadap guhup galumbang laut.

²⁶Murunsia sagar takut tatuu satengah mati nadap inun sa sagar jari hang litar dunia yiti, daya kawan panguasa hang awan sagar jari pasai-pau.

²⁷Hang tawuk yiru Anak Murunsia sagar hawi hawuang rakun makai kuasa anri pihante muliani.

²⁸Amun kawan hal yiru jari, ambuan palus mihangut, daya puang lawah lagi naun sagar nasalamat.”

²⁹Balalu Yesus nyarita ma here rarapisan kalayiti, eauni, “Dinung kakau ara anri katuluh kawan kakau kayu sa lain.

³⁰Amun kawan jangkengni mulai naruk muda, naun karasa himat haut rupak wayah kamarau.

³¹Kalayiru pada amun naun kadinung kawan hal yiru jari, naun sagar karasa himat Alatalla puang lawah lagi sagar marentah yalah Raja.

³²Wuah naun karasa! Kawan hal yiru sagar jari kapihuan kawan ulun sa welum itati matei katuluhni.

³³Langit anri tane sagar wawai mahinam, kude lenganku tatap hampe palus ma kalalawah.”

³⁴“Jaga tenganu, ada hampe naun kajut aur ngulah kawan pesta nelang nguut minuman keras, atawa kajut mamikir kawan sual pamelum naun, hampe naun puang sadia tawuk anrau yiru hawi anri nyalenga.

³⁵Daya anrau yiru sagar hawi kala parangkap ma katuluh ulun hang ambau tane yiti.

³⁶Ware naun bajaga, nelang saratang badoa nampan naun tingkas mangatasi katuluh hal sa sagar jari nelang naun kaiyuh nadap Anak Murunsia.”

³⁷Amun kaanrau Yesus ngajar hang Lewu Tuhan, dami kamalem hanye tulak ma Bukit Zaitun balalu muneng hang yaru.

³⁸Tiap kaiyat katuluh ulun hawi ma Lewu Tuhan neu nyanrengei Yesus ngajar.