Read Ma'anyan LUKAS 6 Bible Online

LUKAS 6 - Ma'anyan bible

LUKAS 6

¹Hang hinra anrau Sabat, tawuk Yesus mitah isa umme gandum, kawan ulun sa umba hanye nguteh gandum. Here ngurukusuk gandum yiru makai tangan, balalu ngutani.

²Papire ulun Farisi kaeau, “Wuah inun naun malangar kawan hukum agama takam anri ngulah sa nauring hang anrau Sabat?”

³Yesus nuing, “Huan suah naun mambasa neu sa naulah daya Dawid, tawuk hanye anri kawan ulun watni kajuju?

⁴Hanye masuk mawuang Lewu Tuhan balalu ngalap rote sa haut nasarah ma Alatalla, balalu ngutani. Kamulek naamini pada rote yiru ma kawan ulun watni. Padahal manyu hukum agama takam, ekat kawan imam sa iyuh nguta rote yiru.”

⁵Balalu Yesus kaeau, “Anak Murunsia bakuasa hang ambau anrau Sabat!”

⁶Hang hinra anrau Sabat sa lain, Yesus tulak ngajar hang lewu sumbayang. Hang yiru naan ulun sa tuhi tanganni lumpuh.

⁷Papire guru agama anri ulun Farisi hamen ngantilau kahalaen Yesus nampan tau mangadu hanye. Balalu here bahimat mambidik inun hanye sagar nyamare ulun hang anrau Sabat.

⁸Kude Yesus karasa pikiran here. Balalu hanye kaeau ma ulun sa tanganni lumpuh yiru, “Hayu minri hang penah yiti!” Ulun yiru ambuan, balalu minri hang yiru.

⁹Udi yiru Yesus nunti ma kawan ulun sa naan hang yiru, “Manurut agama, inun sa iyuh naulah takam hang anrau Sabat? Ngulah sa maeh atawa ngulah sa jahat? Nyalamat ulun atawa nyilaka hanye?”

¹⁰Yesus ikulik ninung kaliling ma here katuluh, balalu kaeau ma ulun yiru, “Surung tangannu.” Ulun yiru nyurung tanganni, palus tanganni balalu ware.

¹¹Kude kawan guru agama anri kawan ulun Farisi yiru sangit tuu, balalu mulai bagurayang neu inun sa tau naulah here nadap Yesus.

¹²Hang tawuk yiru Yesus mambai ma isa bukit lepuh badoa. Hang yiru hanye badoa ma Alatalla tungkas erang malem.

¹³Tawuk anrau haut maraai, hanye nerau kawan ulun sa umba hanye, balalu midi dua walas kaulun teka here. Hanye ngampungaran kadua walas kaulun yiru kawan rasul. Here hanyeyiru:

¹⁴Hi Simon (sa naantuh pada Petrus), anri hi Andreas pulaksanai Simon; hi Yakobus anri hi Yohanes, hi Filipus anri hi Bartolomeus,

¹⁵hi Matius anri hi Tomas, hi Yakobus anak Alfeus, anri hi Simon (sa naantuh Patriot),

¹⁶hi Yudas anak Yakobus anri hi Yudas Iskariot sa hanrian jari panghianat.

¹⁷Udi yiru Yesus minau teka bukit yiru sinrah baya kawan rasul yiru, balalu tarie minri hang isa unengan sa datar. Hang yiru naan pada rama kawan ulun sa umba hanye sa lain nelang rama pada ulun sa hawi teka maaru-maati hang litar Yudea, Yerusalem, pada kawan tumpuk Tirus anri Sidon sa hang pingir laut.

¹⁸Here hawi neu nyanrengei Yesus, nelang nampan nasamare teka kawan panyakit here. Here sa karasukan roh jahat hawi pada palus nasamare.

¹⁹Katuluh ulun ngakali ngawir Yesus, daya naan kuasa sa kaluar teka dirini neu nyamare here katuluh.

²⁰Yesus nantau kawan ulun sa umba hanye balalu kaeau, “Tuu sanang naun kawan ulun paua, daya naun ulun wat Alatalla!

²¹Tuu sanang naun sa itati kajuju; naun sagar natamising! Tuu sanang naun sa itati nungkau; naun sagar kakihi!

²²Tuu sanang naun amun nakuar, natampik, nahina nelang napuntaka daya gana Anak Murunsia!

²³Kawan nabi hang jaman sadi naulah kala yiru pada. Amun hal yiru naulah pada manaun, wuah naun sanang atei nelang nanrik anri arai, daya hante upa sa nasadia ma naun hang surga.

²⁴Kude silaka naun sa tatau wayah itati; daya naun haut kaingkam kasanangen!

²⁵Silaka naun sa itati wising; daya naun sagar kajuju! Silaka naun sa itati kakihi; daya naun sagar mahanang atei nelang nungkau!

²⁶Silaka naun, amun katuluh ulun nawat naun; daya kala yiru pada datu nini here nawat kawan nabi palasu jaman sadi.”

²⁷“Kude ma naun sa nyanrengei aku itati, aku ipesen kala yiti: sinta kawan musuh naun, nelang ulah sa maeh ma ulun sa marikang naun.

²⁸Berkat ulun sa nyapa naun nelang badoa ma ulun sa jahat anri naun.

²⁹Amun ulun nampar pahunu saisa, elahni hanye nampar pahunu sa tuhi pada. Amun jubahnu narampas, ami pada bajunu.

³⁰Amun ulun laku ala inun-inun teka hanyu, ami yiru ma hanye; nelang amun miliknu narampas, ada laku naampudi.

³¹Ulah ma ulun lain kala inun sa sanabahum naun naulah daya here ma naun.

³²Amun naun ekat sinta kawan ulun sa sinta naun, inun jasa naun? Ulun badosa pada sinta kawan ulun sa sinta anri here!

³³Kamulek amun naun ngulah ala maeh ekat ma kawan ulun sa ngulah maeh anri naun, inun jasa naun? Ulun badosa ngulah kala yiru pada!

³⁴Nelang amun naun piihau duit ekat ma kawan ulun sa tau ngampudini, inun jasa naun? Ulun badosa pada piihau duit ma ulun badosa, balalu laku kamulek naampudi!

³⁵Saharusni puang kala yiru! Kabalikni naun harus sinta musuh naun nelang ngulah sa maeh ma here. Naun harus piihau, nelang ada harap tau naampudi. Amun kala yiru, upa naun sagar hante nelang naun sagar jari anak Alatalla Sa Panga Ambau. Daya Alatalla maeh atei anri ulun sa puang karasa batarima kasih, nelang anri ulun sa jahat pada.

³⁶Wuah naun uweng ahi lelu kala Ambah naun pada paahi palelu!”

³⁷“Ada mahakimi ulun lain, nampan naun pada ada nahakimi daya Alatalla. Ada nukum ulun lain, nampan naun pada ada nahukum daya Alatalla. Ampun ulun lain, nampan Alatalla pada ngampun naun.

³⁸Ami ma ulun lain, nampan Alatalla pada ngami ma naun; naun sagar narime pangamian jubung sa haut natakar nagunsang pisit ma naun. Daya takaran sa napakai naun ma ulun lain sagar napakai daya Alatalla ma naun.”

³⁹Udi yiru Yesus nyarita ma here rarapisan kala yiti, “Amun ulun pehe nganyak ulun pehe sa lain, himat kararuehni sagar lawu mawuang parit.

⁴⁰Puang uweng ulun sa umba sa labis hante teka guruni. Kude ulun sa umba sa haut tamat paajar, sagar jari sameh kala guruni.

⁴¹Wuah inun naun kadinung huai hang matei pulaksanainu, kude balok sa hang mateinu raerai puang naun ngarasa?

⁴²Kalaawe naun tau kaeau ma pulaksanai naun, ‘Hayu, pulaksanai, aku ngaluar huai yiru teka mateinu yiru,’ kude hang mateinu raerai naan balok sa puang naun kadinung? O ulun sa pura-pura! Kaluar duluni balok sa naan hang mateinu raerai. Wau naun tau kadinung anri tarang balalu tau ngaluar huai teka matei pulaksanainu.”

⁴³“Kakau sa nenak puang mua wua sa buruk. Kala yiru pada kakau sa puang nenak puang mua wua sa maeh.

⁴⁴Tatiap kakau taru teka wuani. Jumpun sa barunrui puang sagar mua wua ara, nelang jubut sa barunrui puang sagar mua wua anggur.

⁴⁵Ulun sa maeh ngaluar kawan hal sa maeh daya ateini jubung anri pikaeh. Ulun sa jahat ngaluar kawan hal sa jahat daya ateini penu kajahaten. Karana inun sa naantuh daya wawa yiru sa limpar teka atei.”

⁴⁶“Wuah inun naun nerau aku, ‘Tuhan, Tuhan,’ kude naun puang nampalus inun sa naeauku ma naun?

⁴⁷Anri hie tau takam ngintur ulun sa hawi nunung aku, nelang nyanrengei lenganku, nelang nampalusni? — Hayu aku nutuini ma naun — .

⁴⁸Hanye kala ulun sa tawuk ngambuan lewu ngadi tane lalem-lalem, balalu ngulah pondasini teka watu. Hang tawuk naan baah nelang ranu hungei mipi lewu yiru, lewu yiru puang tau gaguyuh, daya haut naambuan hang ambau pondasi sa maeh.

⁴⁹Kude ulun sa nyanrengei lenganku nelang puang nampalusni, hanye kala erang kaulun sa ngambuan lewu anri puang bapondasi. amun hebu baah, lewu yiru hinang tumbang; nelang rusakni tamam tatuu!”