Read Ma'anyan LUKAS 7 Bible Online

LUKAS 7 - Ma'anyan bible

LUKAS 7

¹Dami udi iwara kawan hal yiru ma ulun rama, Yesus tulak ma Kapernaum.

²Hang yaru naan parwira Roma sa uweng walah sa sanasintani tatuu. Walah yiru sakit kai matei.

³Hang tawuk parwira yiru karengei neu Yesus, hanye nunyu papire pamimpin ulun Yahudi tulak nunung hanye lepuh ilaku nampan hanye hawi nyamare walahni.

⁴Tawuk here hampe Yesus, kawan ulun yiru ilaku tatuu nampan hanye ngarawah parwira yiru. “Parwira yiti patut nakarawah dayanu,” eau here ma Yesus,

⁵“daya hanye sinta bangsa takam nelang haut ngambuan lewu sumbayang ma kami.”

⁶Balalu Yesus tulak sinrah baya here. Tawuk Yesus haut riet hampe hang lewu parwira yiru, parwira yiru ngutus kawan hengauni nunung hanye lepuh iwara, “Puang usah hanyu uyuh-uyuh ma lewuku. Aku puang patut narime hanyu hang lewuku.

⁷Yiru sababni aku raerai puang heei manalu hanyu. Amileh parentah nampan palayanku ware.

⁸Daya aku pada tunduk ma parentah atasan nelang hang imbe aku naan pada kawan parajurit sa harus tunduk ma parentahku. Amun aku nunyu erang kaulun parajurit, ‘Hulu!’ hanye balalu tulak; nelang amun aku kaeau ma sa lain, ‘Hayu ma yati!’ hanye balalu hawi. Nelang amun aku marentah walahku, ‘Ulah yiti!’ hanye balalu ngulahni.”

⁹Yesus wauh karengei kalayiru. Hanye ikulik palus kaeau ma ulun rama sa ganjah umba hanye, “Bukan main ulun yiti. Hang padang ulun Israel sika huan suah aku kahaba hanteni kaparisayaan kala yiti!”

¹⁰Tawuk kawan ulun sa nahuyu yiru mulek malewu parwira yiru, walah yiru haut ware.

¹¹Puang lawah udi yiru, Yesus tulak ma tumpuk Nain. Kawan ulun sa umba hanye anri ulun rama tulak pada nyinrah hanye.

¹²Tawuk Yesus hampe hang riet pintu gerbang tumpuk, ulun rama ganjah ngatet bangkai ma luar tumpuk. Sa matei yiru hanyeyiru iya upu, anak tungkan erang kaulun wawei walo. Rama ulun tumpuk nyinrah inehni yiru.

¹³Tawuk Yesus kadinung wawei yiru, hanye palelu anri hanye balalu kaeau, “Ada hanyu nungkau!”

¹⁴Udi yiru Yesus nyanrite gantungan bangkai yiru palus nyambeni. Balalu kawan ulun sa ngantung bangkai yiru tarie. Yesus kaeau, “O pamuda, aku nunyu hanyu ambuan!”

¹⁵Pamuda sa haut matei yiru ambuan maharung balalu mulai bapaner. Balalu Yesus manyarah hanye ma inehni.

¹⁶Katuluh ulun takut nelang mulai nawat Alatalla. Here kaeau, “Erang kaulun nabi sa hante haut hawi hang penah takam! Alatalla haut hawi neu nyalamat umatni!”

¹⁷Kabar neu Yesus yiti tasiar hang litar tane Yudea anri hang daerah sakitarni.

¹⁸Kawan ulun sa umba Yohanes iwara ma hi Yohanes katuluh kajadian yiru. Balalu hi Yohanes nerau rueh kaulun ulun sa umba hanye

¹⁹balalu nunyu here tulak nunung Tuhan Yesus lepuh nunti, “Inun hanyu ulun sa sagar hawi manyu janji Alatalla, atawa inun kami harus nganrei ulun sa lain?”

²⁰Kararueh ulun sa umba Yohanes yiru tulak nunung Yesus balalu kaeau, “Hi Yohanes pambaptis nunyu kami nunti ma hanyu, inun hanyu ulun sa sagar hawi manyu janji Alatalla, atawa kami harus nganrei ulun lain?”

²¹Tawuk yiru Yesus nyamare rama ulun, nelang ngusir wahai roh jahat nelang ngulah rama ulun pehe tau kadinung.

²²Yesus nuing, “Hulu mulek nunung hi Yohanes nelang wara inun sa rengei nelang dinung naun: ulun pehe kadinung, ulun lumpuh takia, ulun kadanen ware, ulun marengen karengei, ulun matei welum kamulek, nelang Kabar Maeh teka Alatalla nawara ma kawan ulun paua.

²³Tuu sanang marauh ulun sa puang uweng tujuan pakai manulak aku.”

²⁴Dami udi kawan ulun sa umba Yohanes yiru tulak, Yesus mulai pantane ma ulun rama neu hi Yohanes, eauni, “Naun tulak ma padang gurun lepuh ninung inun? Erang kakau rikut sa natampuh riwut?

²⁵Naun tulak lepuh ninung inun? Erang kaulun sa bapakaian maeh? Kawan ulun sa bapakaian kala yiru nelang sa marauh welum naan hang istana!

²⁶Jari, naun kaluar neu ninung inun? Neu ninung erang kaulun nabi? Kapinuu, likan labis teka erang kaulun nabi.

²⁷Daya hi Yohanes yiru sa nabahum hawuang ayat Surat Barasis yiti, ‘Iti utusanku,’ eau Alatalla, ‘Aku sagar ngutus hanye labis dahulu teka hanyu, nampan hanye nawah lalan ma hanyu!’ ”

²⁸“Itung,” eau Yesus kamulek, “hang dunia yiti puang suah naan ulun sa labis hante teka hi Yohanes Pambaptis. Kude ulun sa pangarumisni hang penah umat Alatalla, labis hante teka hi Yohanes Pambaptis.”

²⁹Katuluh ulun pada-tamput kawan tukang tagis pajak-nyanrengei Yesus iwara hal yiru; here yiru kawan ulun sa haut nampalus kawan kabahumen Alatalla nelang hamen nabaptis daya Yohanes.

³⁰Kude kawan ulun Farisi anri kawan guru agama puang hamen narime ransana Alatalla ma diri here. Here puang hamen nabaptis daya Yohanes.

³¹Balalu Yesus pantane lagi, eauni, “Makai inun aku harus ngintur kawan ulun jaman yiti? Kala inun here?

³²Here kala kawan iya sa maharung hang pasar; erang kalompok nerau kalompok sa lain, ‘Kami ngampeau lagu kaaraien ma naun, kude naun puang hamen nanrik! Kami manyanyi lagu hanang atei, kude naun puang nungkau!’

³³Hi Yohanes Pambaptis hawi-hanye puasa nelang puang nguut anggur — kude naun kaeau, ‘Hanye karasukan setan!’

³⁴Anak Murunsia hawi-hanye kuman nelang nguut-balalu naun kaeau, ‘Dinung ulun yiru! Mauruh, ekat ulah tukang mahamui, hengau ulun tukang tagis pajak nelang hengau ulun badosa.’

³⁵Biar kala yiru, kaharatien kapintaren Alatalla babukti teka katuluh ulun sa narimeni.”

³⁶Erang kaulun Farisi, bangaran hi Simon, nerau Yesus kuman. Yesus tulak ma lewuni balalu maharung kuman.

³⁷Hang tumpuk yiru naan pada erang kaulun wawei sa welum hawuang dosa. Tawuk hanye karengei Yesus rahat kuman hang lewu ulun Farisi yiru, hanye hawi nelang nginsing isa bakam pualam mahuang minyak marauh enguh.

³⁸Hanye minri hang wading punggung Yesus rite peeni nelang nungkau palus nyamehu pee Yesus makai riu mateini. Udi yiru hanye muhut pee Yesus makai wuluni balalu hanye nyiuk nelang nalui minyak marauh enguh.

³⁹Tawuk ulun Farisi sa nerau Yesus kadinung hal yiru, hanye kaeau hawuang ateini, “Amun ulun yiti nabi, batantu hanye karasa hie wawei yiru sa pahangku hanye, nelang wawei yiru welum hawuang dosa!”

⁴⁰Balalu Yesus kaeau ma hi Simon, “Simon, naan sa hamen naeauku ma hanyu.” “Hiai, Guru,” tuing Simon, “wara eleh.”

⁴¹Yesus kaeau, “Naan rueh kaulun sa bautang ma ulun sa piihau duit. Erang kaulun bautang dime jatuh duit perak, nelang erang kaulun lagi dimem pulu duit perak.

⁴²Kararuehni puang kaiyuh bayar utang yiru, balalu utang here naempas dayani. Nah, hie teka rueh kaulun yiru sa sagar labis sinta anri ulun sa piihau duit yiru?”

⁴³“Aku minda ulun sa panga wahai utang naempas dayani!” tuing Simon. “Bujur eaunu,” tuing Yesus.

⁴⁴Balalu Yesus ninung ma wawei yiru nelang kaeau ma hi Simon, “Hanyu kadinung wawei yiti? Aku hawi ma lewunu, hanyu puang nyadia ranu pakai mui peeku; kude wawei yiti haut ngabarasis peeku makai riu mateini, nelang hanye muhutni makai wuluni.

⁴⁵Hanyu puang nyambut aku makai siuk, kude wawei yiti puang taduh haut nyiuk peeku teka dami aku hawi ma yiti.

⁴⁶Hanyu puang nalui minyak ma uluku, kude wawei yiti haut nalui minyak marauh enguh hang peeku.

⁴⁷Tuu kapinuu: sintani sa hante yiru nantarang himat dosani sa wahai yiru haut naampun! Amun ulun naampun butit, hanye sagar butit sinta pada.”

⁴⁸Balalu Yesus kaeau ma wawei yiru, “Kawan dosanu haut naampun.”

⁴⁹Kawan ulun lain sa maharung kuman baya Yesus balalu kaeau ma sameh here, “Hie ulun yiti hampe tau ngampun dosa?”

⁵⁰Kude Yesus kaeau ma wawei yiru, “Daya hanyu parisaya ma aku, hanyu nasalamat. Hulu tulak anri damai!”