Read Ma'anyan YOHANES 11 Bible Online

YOHANES 11 - Ma'anyan bible

YOHANES 11

¹Erang kaulun bangaran hi Lazarus muneng hang Betania baya kawan pulaksanaini hi Maria anri hi Marta.

²Hi Maria hanyeyiru wawei sa nalui minyak marauh enguh ma pee Tuhan, balalu muhut minyak yiru makai wuluni. Hang hinra tawuk hi Lazarus sakit.

³Karueh pulaksanaini ipesen nampe Yesus, “Tuhan, pulaksanai kami sa nasinta Tuhan yiru sakit.”

⁴Tawuk Yesus karengei kabar yiru, hanye kaeau, “Panyakitni puang hampe nampatei hanye. Kajadian yiti nampan Alatalla natawat nahormat, nelang nampan daya hal yiru Anak Alatalla tau natawat nahormat pada.”

⁵Yesus sinta ma hi Marta, hi Maria anri hi Lazarus.

⁶Kude tawuk kaiyuh kabar hi Lazarus sakit, hanye sangaja muneng hang unenganni rueh anrau lagi lawahni.

⁷Udi yiru wau hanye kaeau ma kawan ulun sa umba hanye, “Hayu takam tulak, miulek ma Yudea.”

⁸Here nuing, “Guru, wau tuu kawan ulun Yahudi ngunu medak hanyu makai watu inun itati hanyu ngaheng mulek mayaru lagi?”

⁹“Angneh hang erang anrau naan dua walas jam lawahni?” eau Yesus. “Ulun sa takia tawuk kaanrau, puang katapian daya hanye kadinung raai dunia yiti.

¹⁰Kude ulun sa takia tawuk kamalem, hanye katapian daya puang uweng piraai hang hanye.”

¹¹Kalayiru eau Yesus. Udi hie hanye kaeau lagi, “Hengau takam hi Lazarus haut manre, kude aku sagar tulak lepuh ngele hanye.”

¹²Kawan ulun sa umba Yesus kaeau, “Tuhan, amun hi Lazarus manre die hanye sagar ware.”

¹³Maksud Yesus hanyeyiru, hi Lazarus haut matei, kude here minda maksud Yesus hanyeyiru hi Lazarus manre biasa.

¹⁴Daya yiru Yesus kaeau ma here anri tarang tarus, “Hi Lazarus haut matei.

¹⁵Kude aku sika arai, aku puang uweng hang yaru, daya labih maeh ma naun, nampan naun tau parisaya. Hayu takam tulak itati nunung hi Lazarus.”

¹⁶Hi Tomas sa naherau “Hi aruangan” kaeau ma kawan hengauni ulun sa umba Yesus, “Hayu takam umba, elah takam matei sinrah hanye!”

¹⁷Tawuk Yesus hampe ma unengan yiru, hi Lazarus haut epat anrau lawahni napasar.

¹⁸Betania puang lawit teka Yerusalem, lawitni leu telu kilometer.

¹⁹Rama ulun Yahudi haut hawi nunung hi Maria anri hi Marta lepuh ngarariu here gana pampatei pulaksanai here.

²⁰Tawuk hi Marta karengei Yesus hawi, hanye kaluar lepuh manalu Yesus, kude hi Maria muneng hang lewu.

²¹Eau Marta ma Yesus, “Tuhan, jaka Tuhan naan hang yiti tawuk yiru, himat pulaksanaiku yiru puang matei.

²²Kude biar kalayiru, aku karasa batantu itati jua Alatalla ngami inunleh sa nalaku Tuhan teka hanye.”

²³“Pulaksanainu sagar welum mulek,” eau Yesus ma hi Marta.

²⁴Hi Marta nuing, “Aku karasa hi Lazarus sagar welum mulek amun ulun matei naele hang anrau Kiamat.”

²⁵“Aku yiti sa ngami pamelum nelang ngele ulun matei,” eau Yesus ma hi Marta. “Ulun sa parisaya ma aku sagar welum, biar hanye haut matei.

²⁶Kamulek ulun welum sa parisaya ma aku, kalalawahni hanye puang sagar matei. Inun hanyu parisaya neu hal yiru?”

²⁷“Tuhan,” tuing Marta, “aku parisaya Tuhan Anak Alatalla, Raja Panyalamat sa hawi ma dunia yiti.”

²⁸Udi hi Marta kaeau kalayiru, hanye tulak nerau hi Maria, pulaksanaini balalu ikeneh ma hanye, “Guru naan hang yiti, hanye nunti hanyu.”

²⁹Karengei yiru, hi Maria iwawansit minri balalu tulak manalu Yesus.

³⁰Tawuk yiru, Yesus huan masuk mawuang tumpuk. Hanye pagun hang unengan Marta manalu hanye.

³¹Kawan ulun Yahudi sa rahat ngarariu hi Maria hang lewu, kadinung hi Maria minri palus iwawansit tulak kaluar, here pada balalu tulak naharak hi Maria, daya inda here hi Maria tulak lepuh nungkau ma pasaran.

³²Tawuk hi Maria hampe hang unengan Yesus nelang kadinung hanye, hi Maria balalu ileku hang hadapan Yesus palus kaeau, “Tuhan, jaka Tuhan naan hang yiti tawuk yiru, himat pulaksanaiku puang matei.”

³³Tawuk Yesus kadinung hi Maria nungkau anri kawan ulun Yahudi sa hawi sinrah hi Maria pada nungkau, ateini lenuh nelang wangunni tuu tamuwe.

³⁴Hanye balalu nunti ma here, “Hang awe naun masar hanye?” “Dinung ma yati, Tuhan,” tuing here.

³⁵Balalu Yesus nungkau.

³⁶Balalu kawan ulun Yahudi kaeau, “Dinung, bukan main sintani ma hi Lazarus!”

³⁷Kude naan teka here sa kaeau, “Hanye ngulah ulun pehe kadinung, wuah inun hanye puang tau nyangkilah nampan hi Lazarus puang matei?”

³⁸Yesus tamuwe hinra lagi, balalu tulak ma pasaran Lazarus. Pasaran yiru hanyeyiru isa gua natutup anri watu hante.

³⁹“Idar watu yiru,” eau Yesus. Hi Marta, pulaksanai ulun sa matei yiru, nuing, “Kude, Tuhan, hanye haut epat anrau napasar. Batantu haut maenguh!”

⁴⁰Yesus kaeau ma hi Marta, “Angneh aku haut kaeau mahanyu: Amun hanyu parisaya, hanyu sagar kadinung kewangun hante kuasa Alatalla!”

⁴¹Here balalu ngidar watu yiru. Udi hie Yesus balalu mihangut ma langit balalu kaeau, “Tarima kasih, Ambah, daya hanyu haut nyanrengei aku.

⁴²Aku karasa hanyu saratang nyanrengei aku, kude aku kaeau yiti neu ma ulun rama sa naan hang yiti; nampan here parisaya sa hanyu ngutus aku.”

⁴³Udi hanye kaeau kalayiru, anri lengan mehet Yesus kaeau; “Lazarus, kaluar!”

⁴⁴Balalu ulun matei yiru palus kaluar, pee anri tanganni pagun tabungkus makai kain kafanni, kalayiru pada uruwawani. “Uka kawan kain yiru nampan hanye kaiyuh bebas takia,” eau Yesus ma kawan ulun sa naan hang yiru.

⁴⁵Rama teka kawan ulun Yahudi sa hawi nunung hi Maria, parisaya ma Yesus dami here kadinung kajadian yiru.

⁴⁶Kude papire teka here balalu tulak nunung ulun Parisi palus malapor inun sa haut naulah daya Yesus.

⁴⁷Daya yiru kawan ulun Parisi anri kawan imam kapala ngulah rapat anri Pangadilan Agama. Here kaeau, “Takam harus ngulah inun? Ulun yiti wahai ngulah kaajaiban!

⁴⁸Amun takam mambiar hanye tarus kalayiti, katuluh ulun sagar parisaya ma hanye. Nelang akhirni panguasa teka Roma sagar hawi ngampi hansur Lewu Alatalla anri katuluh bangsa takam!”

⁴⁹Erang kaulun teka here bangaran hi Kayafas, Imam Hante hang taun yiru, kaeau, “Naun puang karasa inun-inun.

⁵⁰Inun puang tapikir daya naun neu ma rakyat, labis maeh erang kaulun matei teka katuluh bangsa hansur?”

⁵¹Sabujurni hi Kayafas kaeau kalayiru, puang teka pikiranni raerai. Kude yalah Imam Hante taun yiru hanye nujum neu Yesus sagar matei ma ulun Yahudi.

⁵²Nelang puang ekat ma bangsa Yahudi, kude pada nampan ngumpul nelang namaya kawan anak Alatalla sa pasai-pau.

⁵³Mulai anrau yiru kawan panguasa Yahudi mupakat ngunu munu Yesus.

⁵⁴Daya yiru Yesus puang kaluar lagi hang hadapan umum hang kalangan ulun Yahudi. Hanye nanan Yudea balalu tulak ma tumpuk bangaran Efraim rite padang gurun. Hang yaru hanye muneng baya kawan ulun sa umba hanye.

⁵⁵Tawuk yiru haut riet Hari Raya Paskah Yahudi. Rama kawan ulun teka kawan desa haut tulak ma Yerusalem neu nampalus upasara ngabarasis tenga kapihuan parayaan yiru.

⁵⁶Here ngantara Yesus, nelang tawuk bakumpul hang Lewu Tuhan, here bapaner sameh here, “Kewangun pandapat naun? Tau pada hanye puang hawi hang parayaan yiti.”

⁵⁷Here kaeau kalayiru daya kawan imam kapala anri kawan ulun Parisi haut ngaluar parintah hie ulun sa karasa hang awe Yesus naan, harus malapor nampan hanye tau najamba.