Read Ma'anyan YOHANES 12 Bible Online

YOHANES 12 - Ma'anyan bible

YOHANES 12

¹Enem anrau kapihuan Hari Raya Paskah, Yesus tulak ma Betania. Hang unengan yiru hi Lazarus sa haut naele Yesus teka pampatei muneng.

²Hang yaru Yesus nasarungan daya here, nelang hi Marta sa malayanni. Hi Lazarus anri kawan tamu maharung kuman sameh-sameh baya Yesus.

³Udi hie hi Maria hawi nginsing leu satengah liter minyak marauh enguh narwastu sa rarang haragani. Hanye nalui minyak yiru ma pee Yesus, balalu muhut makai wuluni. Katuluh ruang lewu yiru penu enguh marauh enguh daya minyak marauh enguh yiru.

⁴Kude hi Yudas Iskariot, erang kaulun teka kawan ulun sa umba Yesus — sa hanrian anrau makhianat Yesus — kaeau,

⁵“Wuah inun minyak marauh enguh yiru puang naari anri haraga telu jatuh duit perak nelang duitni naami ma ulun paua?”

⁶Hi Yudas kaeau kalayiru puang daya hanye maahi ulun paua, kude daya hanye erang kaulun pangalat. Hanye gaha ngalat duit teka kas ulun rama sa nasimuh hang hanye.

⁷Kude Yesus kaeau, “Elahnileh wawei yiru! Inun sa naulahni yiru, hanyeyiru neu ma anrau aku napasar.

⁸Ulun paua santar naan hang penah naun, kude aku puang.”

⁹Rama ulun Yahudi karengei Yesus naan hang Betania, here balalu tulak ma yaru. Here tulak ma yaru puang ekat daya gana Yesus, kude pada daya here hamen ninung hi Lazarus sa nasamelum kamulek teka pampatei daya Yesus.

¹⁰Yiru sababni kawan imam kapala ngunu munu hi Lazarus pada;

¹¹daya hanye ngulah rama ulun Yahudi nanan here nelang parisaya ma Yesus.

¹²Hang kaiyat uni anrauni ulun rama sa haut hawi lepuh maraya Paskah karengei Yesus rahat naan hang pakiaan nuju Yerusalem.

¹³Balalu here ngutik kawan rawen palam balalu nahalu Yesus, nelang basurak mihewu, “Nawat Alatalla! Naberkat hanye sa hawi hawuang ngaran Tuhan. Naberkat Raja Israel!”

¹⁴Yesus kaiyuh erang kaukui keledai muda, balalu nunggang kaledai yiru, balalu tulus inun sa haut nasurat hawuang Surat Barasis:

¹⁵“Ada takut, putri Sion! Dinung Raja naun hawi, nunggang erang kaukui kaledai muda!”

¹⁶Tawuk yiru kawan ulun sa umba Yesus huan kataru ala katantuluh yiru. Kude udi Yesus naampihante mitah pampateini wau here kaitung inun sa haut naulah ulun rama ma hanye haut nasurat hang Surat Barasis neu hanye.

¹⁷Kawan ulun sa naan hang tawuk Yesus nerau hi Lazarus kaluar teka wuang pasaran nelang nyamelum hanye teka pampatei, saratang ngami kasaksian neu hal yiru.

¹⁸Gana yiru ulun rama yiru tulak nunung Yesus daya here karengei hanye haut ngulah kaajaiban yiru.

¹⁹Balalu kawan ulun Parisi bapaner sameh here, “Takam puang kaiyuh ngulah inun-inun! Dinung, litar dunia tulak umba hanye!”

²⁰Teka kawan ulun sa tulak ma Yerusalem lepuh sumbayang hang tawuk parayaan yiru naan pada papire ulun Yunani.

²¹Here hawi ma hi Pilipus nelang kaeau, “Pulaksanai, amun iyuh, kami hamen panalu anri Yesus.” (Hi Filipus baasal teka Betsaida hang Galilea.)

²²Hi Filipus balalu tulak iwara neu hal yiru ma hi Andreas, balalu udi hie here rueh tulak nampeni ma Yesus.

²³Yesus kaeau ma here, “Haut hampe wayahni Anak Murunsia namulia.

²⁴Samula tuu eauku: Amun erang kadiki gandum puang naamule mawuang tane nelang patei, hanye tatap ekat erang kadiki. Kude amun diki gandum yiru patei, wau hanye sagar mahasil wahai gandum.

²⁵Ulun sa sinta pamelumni sagar kawawaian pamelumni. Kude ulun sa muar pamelumni hang dunia yena, sagar maliharani ma pamelum sajati palus ma kalalawah.

²⁶Ulun sa hamen malayanni aku, harus umba aku; nampan palayanku naan baya aku hang awe aku naan. Ulun sa malayanni aku sagar nahormat Ambahku.”

²⁷“Ateiku balisah; inun sa harus naeauku itati? Inun harus aku kaeau, ‘Ambah, sanawit aku teka wayah yiti’? Kude samula neu kaingkam wayah pandaritaan yiti aku hawi.

²⁸Ambah, ngarannu natawat nelang nahormat!” Balalu naan lengan teka langit sa kaeau, “Aku haut ngampi mulia hanye nelang aku sagar ngampi mulia hanye lagi.”

²⁹Ulun rama sa naan hang yiru karengei lengan yiru. Here kaeau, “Yiru nanyu!” Kude naan pada sa kaeau, “Puang! Malekat puntane ma hanye!”

³⁰Balalu Yesus kaeau ma here, “Lengan yiru rengei naun, puang neu kapantinganku, kude neu kapantingan naun.

³¹Itati haut hampe wayahni dunia yiti naadili, itati panguasa dunia yena nasantumbang.

³²Kude aku yiti, amun aku haut naenat naampambau hang ambau dunia yiti, aku sagar nginsing katuluh ulun nunung aku.”

³³Hanye kaeau kalayiru pakai iwara kewangun sarani hanye sagar matei.

³⁴Ulun rama yiru kaeau ma hanye, “Manurut Buku Hukum kami, Raja Panyalamat sagar welum palus ma kalalawah. Kewangun hanyu tau kaeau Anak Murunsia harus naenat naampambau hang ambau dunia? Hie Anak Murunsia yiru?”

³⁵Yesus nuing, “Ekat erang pitus piraai yiru naan hang penah naun. Jadi, ware naun takia nganue piraai yiru pagun naan, nampan naun puang iengen. Ulun sa takia hawuang piieng puang karasa maawe hanye tulak.

³⁶Parisayaleh ma piraai yiru, salawah piraai yiru magun naan baya naun, nampan naun jari kawan anak piraai.” Udi Yesus kaeau kala yiru, hanye balalu tulak teka yiru nelang puang hamen nantarang tengani ma here.

³⁷Biar haut wahai kaajaiban sa naulah Yesus hang hadapan here, here puang parisaya ma hanye.

³⁸Balalu tulus, inun sa naeau daya Nabi Yesaya, “Tuhan, hie sa parisaya ma kabar sa nawara kami? Ma hie kuasa Tuhan natantarang?”

³⁹Gana yiru here puang tau parisaya, daya hi Yesaya haut kaeau pada, “Alatalla kaeau,

⁴⁰‘Aku nampehe matei here, ngampi kape atei here; nampan matei here puang tau kadinung, pikiran here ada kataru. Nampan here ada mulek nunung aku, balalu aku nyamare here.’ ”

⁴¹Hi Yesaya kaeau kalayiru daya hanye haut kadinung pihante Yesus nelang bapaner neu hanye.

⁴²Biar kalayiru, rama ulun, likan teka kawan panguasa Yahudi parisaya ma Yesus. Kude here puang heei mangaku anri tarang tarus, daya here takut kawan ulun Parisi nguring here masuk mawuang lewu sumbayang.

⁴³Daya here labis sindi natawat daya murunsia teka nahargai daya Alatalla.

⁴⁴Balalu Yesus kaeau anri lengan mehet, “Ulun sa parisaya ma aku, puang hanye ekat parisaya ma aku, kude ma hanye sa ngutus aku.

⁴⁵Nelang ulun sa kadinung aku, kadinung hanye sa ngutus aku.

⁴⁶Aku hawi ma dunia yena jari piraai, nampan katuluh ulun sa parisaya ma aku puang muneng hawuang piieng.

⁴⁷Ulun sa nyanrengei ajaranku, kude puang makaini — puang aku sa nukum hanye. Daya aku hawi puang lepuh mangadili dunia yena, kude nampan nyalamat dunia yena.

⁴⁸Ulun sa puang narime aku nelang puang nyanrengei lenganku, haut naan sa pakai mangadili hanye. Lengan sa natahampeku, yiru sa sagar mangadili hanye hang anrau Kiamat.

⁴⁹Daya aku puang bapaner teka kabahumenku raerai; Ambah sa ngutus aku, hanye sa marentah aku inun sa napanerku nelang sa natahampeku.

⁵⁰Nelang aku karasa parentahni yiru ngami pamelum sajati palus ma kalalawah. Jadi inun sa natahampeku sameh kala inun sa nafirman daya Ambah ma aku.”