Read Ma'anyan YOHANES 13 Bible Online

YOHANES 13 - Ma'anyan bible

YOHANES 13

¹Erang anrau kapihuan Hari Raya Paskah, Yesus karasa haut hampe wayahni hanye nanan dunia yiti, mulek nunung Ambahni. Hanye sinta kawan ulun sa jari milikni hang dunia yiti, nelang hanye tatap sinta ma here hampe pijumpuhanni.

²Yesus anri kawan ulun sa umba hanye rahat kuman. Iblis haut namasuk niatni mawuang atei Yudas anak Simon Iskariot nampan makhianat Yesus.

³Yesus karasa Ambahni haut nyarah katantuluh kakuasaan ma hanye. Hanye karasa pada sa hanye hawi teka Alatalla nelang sagar mulek ma Alatalla.

⁴Daya yiru hanye minri, nguka jubahni palus nuruk handuk hang pinggangni.

⁵Udi yiru hanye balalu nalui ranu mawuang waskum, balalu mulai ngabarasis (mui) pee kawan ulun sa umba hanye balalu nangkaring makai handuk sa nahuruk hang pinggangni.

⁶Tawuk hampe giliran Simon Petrus, hi Simon kaeau, “Tuhan, puang tau Tuhan sa ngabarasis peeku?”

⁷Yesus nuing, “Itati hanyu puang kataru inun sa naulahku yiti, kude yati hanyu sika sagar kataru.”

⁸“Ada, Tuhan,” eau Petrus ma Yesus, “ada budas Tuhan ngabarasis peeku!” Kude Yesus kaeau, “Amun aku puang ngabarasisni, hanyu puang uweng hubungan anri aku.”

⁹Hi Simon Petrus kaeau, “Amun kalayiru Tuhan, ada ekat peeku kude tangan nelang uluku pada!”

¹⁰“Ulun sa haut manrus, hanye haut barasis katuluhni,” eau Yesus ma hi Petrus. “Hanye puang usah nabarasis lagi; saperlu ekat peeni. Naun yiti haut barasis, kude puang katuluh naun.” (

¹¹Yesus haut karasa hie sa sagar makhianat hanye. Daya yiru hanye kaeau, “Naun haut barasis, kude puang katuluhni.”)

¹²Udi Yesus ngabarasis pee here, hanye namu lagi jubahni palus maharung lagi. Balalu hanye kaeau ma here, “Kataru naun inun sa wau naulahku ma naun?

¹³Naun nerau aku Guru nelang Tuhan. Nelang samula kalayiru.

¹⁴Amun aku Guru nelang Tuhan naun ngabarasis pee naun, naun wajib pada ipamui pee sameh naun.

¹⁵Aku ngami suntu yiti ma naun, nampan naun ngulah pada inun sa haut naulahku ma naun.

¹⁶Himat tuu eauku yiti: erang kaulun walah puang labis hante teka tuanni nelang erang kaulun utusan puang labis hante teka sa ngutus hanye.

¹⁷Amun naun haut karasa katuluh yiti, salamat naun amun nampalusni.

¹⁸Inun sa naeauku yiti puang neu naun katuluh. Aku karasa hie-hie sa haut napidiku. Kude inun sa haut nasurat hawuang Surat Barasis, musti tulus, hanyeyiru, ‘Ulun sa kuman baya aku, sagar nawan aku.’

¹⁹Hal yiru natahampeku ma naun itati, kapihuan yiru tarjadi, nampan amun hal yiru tarjadi yati, naun sagar parisaya aku yiti hanye sa naantuh AKU NAAN.

²⁰Kapinuuni eauku yiti: Hie sa narime ulun sa nautusku, narime aku. Nelang hie sa narime aku, narime hanye sa ngutus aku.”

²¹Udi Yesus kaeau kalayiru, hanye tuu saneuen. Balalu Yesus kaeau, “Kapinuuni eauku yiti: isa teka naun sagar makhianat aku.”

²²Kawan ulun sa umba hanye ipaninung nelang wauh tatuu daya puang karasa hie sa namaksudni.

²³Kawan ulun sa umba hanye sa nasinta Yesus maharung hang tuhi Yesus.

²⁴Hi Simon Petrus ngami isarat ma hanye, nampan hanye nunti ma Yesus hie sa namaksudni.

²⁵Balalu ulun sa umba hanye yiru barupit anri Yesus palus nunti, “Hie hanye, Tuhan?”

²⁶Yesus nuing, “Ulun sa amiku rote sa nasulupku mawuang mangkok, hanye ulunni.” Balalu Yesus ngalap erang katipak rote, nyulup mawuang mangkok; balalu ngami ma hi Yudas anak Simon Iskariot.

²⁷Udi hi Yudas narime rote yiru, Iblis masuk mawuang ateini. Balalu Yesus kaeau ma hanye, “Ulah hinang inun sa hamen naulahnu.”

²⁸Puang uweng sunah erang kaulun teka here sa maharung kuman hang yiru kataru wuah inun Yesus kaeau kalayiru ma hi Yudas.

²⁹Naan sa minda Yesus nunyu hi Yudas midi ala sa naparlu ma pesta yiru, atawa ngami duit babutit ma kawan ulun paua — daya hi Yudas yiru panegei duit kas here.

³⁰Udi hi Yudas narime rote yiru, hanye balalu palus kaluar. Anrau haut kamalem.

³¹Dami udi hi Yudas tulak, Yesus kaeau, “Itati Anak Murunsia namulia, nelang Alatalla namulia itetei hanye.

³²Amun Alatalla namulia itetei hanye, hanye pada sagar namulia daya Alatalla itetei dirini raerai. Likan Alatalla sagar ngampi hante mulia hanye anri hinang.

³³Anak-anakku, aku puang lawah lagi muneng baya naun. Naun sagar ngantara aku, kude kala sa haut naeauku ma kawan panguasa Yahudi, kalayiru pada neauku ma naun; ma unengan aku tulak, naun puang kaiyuh hampe.

³⁴Parentah sa wau naamiku ma naun: Ware naun ipasinta anri sameh naun, sameh kala aku sinta ma naun, kalayiru pada ware naun ipasinta.

³⁵Amun naun ipasinta, katuluh ulun sagar kataru naun ulun sa umba aku.”

³⁶“Tuhan, Tuhan hamen tulak maawe?” tunti Simon Petrus ma Yesus. Tuing Yesus, “Maawe aku tulak, hanyu puang kaiyuh umba itati. Hanyu sagar umba aku hanrian.”

³⁷“Tuhan, wuah inun aku puang kaiyuh umba Tuhan itati?” tunti Petrus lagi. “Aku rela matei ma Tuhan!”

³⁸Yesus nuing, “Tuu hanyu rela matei ma aku? Wuah hanyu karasa, kapihuan manu nanru die, hanyu haut telu kali kaeau hanyu puang kataru aku!”