Read Ma'anyan YOHANES 14 Bible Online

YOHANES 14 - Ma'anyan bible

YOHANES 14

¹“Ada galisah ateinu,” eau Yesus ma here. “Parisayaleh ma Alatalla nelang parisayaleh ma aku pada.

²Hang lewu Ambahku wahai unengan muneng. Aku tulak ma yaru neu nyadia unengan ma naun. Aku puang sagar kaeau kalayiru ma naun, atikalani yiru puang kalayiru.

³Udi aku tulak nyadia unengan ma naun, aku sagar mulek palus ngalap naun, nampan hang awe aku naan, hang yiru pada naun naan.

⁴Ma unengan aku tulak naun karasa lalanni.”

⁵Balalu hi Tomas kaeau ma Yesus, “Tuhan, kami puang karasa maawe Tuhan tulak, kewangun kami karasa lalanni?”

⁶Yesus nuing, “Aku yiti lalan neu mantaru Alatalla nelang kaiyuh pamelum. Puang uweng sunah erang kaulun kaiyuh hawi nunung Ambah, amun puang itetei aku.

⁷Atikalani naun kataru aku, himat naun sagar kataru Ambahku pada. Itati naun haut kataru hanye, nelang haut kadinung hanye.”

⁸Balalu hi Filipus kaeau ma Yesus, “Tuhan, tutui Ambah yiru ma kami, nampan kami puas.”

⁹Kude Yesus nuing, “Haut lawah aku baya naun magun huan jua hanyu kataru aku, Filipus? Ulun sa haut kadinung aku, haut kadinung Ambah. Kewangun hanyu tau kaeau, ‘Tutui Ambah yiru ma kami’?

¹⁰Filipus! Angneh hanyu parisaya, sa aku isa anri Ambah nelang Ambah isa anri aku? Inun sa naeauku ma hanyu, yiru puang kaluar teka diriku raerai. Ambah sa tatap isa anri aku, hanye sa ngaraja katantuluh yiru.

¹¹Parisayaleh ma aku, sa aku isa anri Ambah nelang Ambah isa anri aku. Atawa satida-tidani, parisayaleh daya kawan ala sa haut naulahku.

¹²Kapinuuni eauku yiti: Ulun sa parisaya ma aku, sagar ngulah inun sa haut naulahku, — likan hanye sagar ngulah sa labis hante lagi — daya aku tulak nunung Ambah.

¹³Nelang inun sa nalaku naun makai ngaranku, yiru sagar ulahku ma naun, nampan Ambah namulia itetei Anak.

¹⁴Inunleh sa nalaku naun makai ngaranku, yiru sagar naulahku ma naun.”

¹⁵“Amun naun sinta aku, naun sagar nampalus kawan parentahku.

¹⁶Aku sagar ilaku ma Ambah, nelang hanye sagar ngami ma naun Pangarawah lain, sa muneng baya naun palus ma kalalawahni.

¹⁷Hanyeyiru Roh Alatalla sa sagar iwara kabanaran neu Alatalla. Dunia puang kaiyuh narime hanye, daya puang kadinung atawa puang kataru hanye. Kude naun kataru hanye, daya hanye muneng baya naun nelang sagar jari isa anri naun.

¹⁸Aku puang sagar nanan naun ngaraerai kala anule pahatu. Aku sagar mulek ma naun.

¹⁹Ekat erang pitus lagi dunia sagar puang kadinung aku lagi. Kude naun sagar kadinung aku. Nelang daya aku welum, naun pada sagar welum.

²⁰Amun anrauni yiru haut hampe, naun sagar karasa tuu aku jari isa anri Ambah, naun jari isa anri aku nelang aku jari isa anri naun.

²¹Ulun sa narime kawan parentahku nelang nampalusni, hanye yiru sa sinta aku. Ambahku sagar sinta ulun sa sinta aku. Aku pada sagar sinta ulun yiru nelang nantarang tengaku ma hanye.”

²²Hi Yudas (lain hi Yudas Iskariot) nunti ma Yesus, “Tuhan, wuah inun Tuhan hamen nantarang tenga ma kami kude puang ma dunia?”

²³Yesus nuing, “Ulun sa sinta aku, sagar ngalut ajaranku, Ambahku sagar sinta hanye. Ambah anri aku sagar hawi ma hanye palus muneng baya hanye.

²⁴Ulun sa puang sinta aku, puang nuu ngalut ajaranku. Ajaran sa nasanrengei naun yiru puang teka aku, malainkan teka Ambah sa ngutus aku.

²⁵Katuluh yiru neauku ma naun salawah aku magun baya naun.

²⁶Kude Roh Alatalla, Pangarawah sa sagar nautus Ambah makai ngaranku, hanyeyiru sa sagar ngajar naun alakatantuluh nelang ngampi itung naun neu katantuluh sa haut nawara ma naun.

²⁷Kasanangen tananku ma naun. Kasanangenku raerai sa naamiku ma naun. Sa naamiku yiru puang kala inun sa naami dunia yena ma naun. Ada gelisah, ada takut.

²⁸Naun haut karengei aku kaeau, ‘Aku sagar tulak, kude aku sagar hawi lagi nunung naun!’ Amun naun sinta aku, naun sagar sanang daya aku tulak nunung Ambah, daya Ambah labis hante teka aku.

²⁹Aku iwara yiru ma naun itati, kapihuan katuluhni jari, nampan amun yiru die jari, naun sagar parisaya.

³⁰Aku puang sagar bapaner wahai lagi ma naun, daya haut hampe wayahni panguasa dunia yiti hawi. Kude hanye puang bakuasa hang ambau diriku.

³¹Kude ala katantuluh yiru harus jari nampan dunia kataru sa aku sinta Ambah nelang nampalus katantuluh sa naparentah Ambah ma aku. Nah, hayu takam tulak teka yiti.”