Read Ma'anyan YOHANES 15 Bible Online

YOHANES 15 - Ma'anyan bible

YOHANES 15

¹Eau Yesus lagi, “Aku kakau anggur sa sajati, nelang Ambahku tukang kabunni.

²Tiap raan hang aku sa puang mua, tetekni, kude tiap raan sa bawua, natangkurang rawenni nelang nabarasisni nampan wuani labis wahai lagi.

³Naun haut barasis daya ajaran sa naamiku ma naun.

⁴Tatapleh ibaya anri aku nelang aku pada sagar tatap ibaya anri naun. Raan raerai puang kaiyuh mua, kasuali amun hanye tatap hang kakauni. Kalayiru pada naun, ekat tau mua amun tatap ibaya anri aku.

⁵Aku yiti kakau anggur, nelang naun kawan raanni. Ulun sa tatap ibaya anri aku nelang aku ibaya anri hanye, sagar mua wahai; daya amun puang ibaya aku, naun puang kaiyuh ngulah inun-inun.

⁶Ulun sa puang tatap ibaya anri aku, sagar naumpe yalah raan, balalu karing. Kawan raan sa kalayiru sagar nakumpul palus naumpe mawuang apui, natutung.

⁷Amun naun tatap ibaya anri aku nelang ajaranku muneng hawuang naun, laku ma Ambah inunleh sa naaheng naun; pilakuan naun yiru sagar naami.

⁸Amun naun mua wahai, Ambahku namulia palus anri kalayiru naun tuu-tuu jari ulun sa umba aku.

⁹Kala Ambah sinta aku, kalayiru pada aku sinta naun. Ware naun tatap welum kala ulun sa nasintaku.

¹⁰Amun naun nampalus kawan parentahku, naun tatap satia ma sintaku, sameh kala aku tatap satia ma sinta Alatalla daya nampalus kawan parentahni.

¹¹Katantuluh yiti nawaraku ma naun, nampan kaaraienku naan hawuang atei naun, nelang kaaraien naun jari paruna.

¹²Iti parentahku: ware naun ipasinta sameh naun, sameh kala aku sinta naun.

¹³Ulun sa tuu-tuu sinta ma kawan hengauni hanyeyiru sa ngami pamelum ma here.

¹⁴Naun yiti kawan hengauku amun naun ngulah inun sa naparentahku ma naun.

¹⁵Aku puang ngantuh naun walah lagi, daya walah puang karasa inun sa rahat nakaraja tuanni. Aku ngantuh naun hengau, daya katuluh inun sa rengeiku teka Ambah, haut nawaraku ma naun.

¹⁶Puang naun sa midi aku. Aku sa midi naun, nelang nunyu naun tulak nampan bawua wahai — kawan wua sa puang tau binasa. Balalu Ambah sagar ngami ma naun inunleh sa nalaku naun teka hanye makai ngaranku.

¹⁷Iti parentahku ma naun: Ware naun ipasinta sameh naun.”

¹⁸“Amun dunia muar naun, itung aku haut labis dahulu nakuar daya dunia.

¹⁹Atikalani naun milik dunia, naun sagar nasinta daya dunia kala milik watni. Kude aku haut midi naun teka dunia yiti, jari naun puang lagi milik dunia. Gana yiru dunia muar naun.

²⁰Itung inun sa haut naeauku ma naun, ‘Walah puang labis hante teka tuanni.’ Amun here haut manyiksa aku, here sagar manyiksa naun pada. Amun here nuu ngalut ajaranku, here sagar nuu ngalut ajaran naun pada.

²¹Katantuluh yiru sagar ulah here ma naun, daya naun ulun sa umba aku, daya here puang kataru hanye sa ngutus aku.

²²Atikalani aku puang hawi nelang iwara katantuluh yiti ma here, here puang badosa. Kude itati here puang uweng tujuan lagi neu dosa here.

²³Ulun sa muar aku, muar pada Ambahku.

²⁴Atikalani hang penah-penah here aku puang ngulah kawan hal sa huan suah naulah ulun lain, here puang badosa. Kude itati here haut kadinung inun sa haut naulahku, here muar aku nelang muar Ambahku pada.

²⁵Kude samula pipatutni kalayiru, nampan tulus inun sa haut nasurat hawuang Buku hukum here, hanyeyiru: ‘Here muar ma aku anri puang uweng sababni.’

²⁶Aku sagar ngutus ma naun Pangarawah sa asalni teka Ambah. Hanye Roh sa iwara kabanaran neu Alatalla. Amun hanye hawi, hanye sagar ngami kasaksian neu aku.

²⁷Nelang naun pada harus ngami kasaksian neu aku, daya naun haut baya aku teka asalni.