Read Ma'anyan YOHANES 16 Bible Online

YOHANES 16 - Ma'anyan bible

YOHANES 16

¹Katuluhni yiru nawaraku ma naun nampan naun ada murtad.

²Naun sagar nakaluar teka kawan lewu sumbayang. Nelang sagar hampe wayahni sa ulun munu naun minda hanye nampalus kabahumen Alatalla.

³Here ngulah kala yiru ma naun, daya here huan kataru Ambah atawa aku.

⁴Kude itati aku iwara yiru ma naun, nampan amun yiru tulus yati, naun kaitung aku haut iwara hal yiru ma naun.” “Aku puang iwara hal yiti ma naun hengka dahulu daya aku magun baya anri naun.

⁵Kude itati aku ngunu tulak nunung hanye sa ngutus aku; nelang puang uweng sunah erang kaulun teka naun sa nunti maawe aku tulak.

⁶Itati likan atei naun mahanang, daya aku iwara hal yiru ma naun.

⁷Kude aku iwara hal sa bujur ma naun: Labis maeh ma naun, amun aku tulak; daya amun aku puang tulak, Pangarawah yiru puang sagar hawi ma naun. Kude amun aku tulak aku sagar ngutus Pangarawah yiru ma naun.

⁸Amun hanye hawi, hanye sagar iwara ma dunia yiti arati dosa sa kapinuuni, neu inun sa bujur, nelang neu hukuman Alatalla.

⁹Hanye sagar iwara amun puang parisaya ma aku hanyeyiru dosa;

¹⁰nelang aku bujur, daya aku tulak nunung Ambah balalu naun puang sagar kadinung aku lagi;

¹¹nelang Alatalla haut mulai nukum, daya panguasa dunia yiti haut nahukum.

¹²Wahai lagi sa hamen nawaraku ma naun, kude itati naun huan sanggup narimeni.

¹³Kude amun Roh yiru hawi, hanyeyiru hanye sa iwara kapinuu neu Alatalla, naun sagar nakarawah dayani nampan mantaru katuluh kapinuu. Hanye puang sagar bapaner neu dirini raerai kude iwara inun sa haut rengeini nelang hanye sagar iwara ma naun inun sa sagar jari hanrian anrau.

¹⁴Hanye sagar ngampi mulia aku daya inun sa natahampeni ma naun, natarimeni teka aku.

¹⁵Katuluh sa naan hang Ambah, yiru milikku. Gana yiru aku kaeau inun sa natahampe daya Roh ma naun, natarimeni teka aku.”

¹⁶“Ekat erang pitus lagi naun sagar puang kadinung aku lagi, nelang pada ekat erang pitus lagi naun sagar kadinung aku.”

¹⁷Papire ulun sa umba Yesus mulai ipanunti sameh here: “Inun maksud hanye kaeau ma takam: ‘Ekat erang pitus lagi naun puang sagar kadinung aku nelang ekat erang pitus lagi naun sagar kadinung aku’? Inun pada sa namaksudni anri: ‘Aku tulak nunung Ambah’?”

¹⁸Here magun nunti, “Inun aratini: ‘erang pitus’? Takam puang kataru hanye napanerni neu inun?”

¹⁹Yesus karasa here hamen nunti ma hanye. Balalu hanye kaeau, “Hunien aku kaeau, ‘Erang pitus lagi naun puang sagar kadinung aku nelang erang pitus lagi naun sagar kadinung aku’. Yiru sa pagun napaner naun?

²⁰Parisayaleh, naun sagar nangis nelang nungkau, kude dunia sagar arai. Naun sagar mahanang atei, kude kasusahen naun yiru sagar baubah jari kaaraien.

²¹Amun erang kaulun wawei kai bagenda, hanye gugup atei, daya hampe wayahni hanye ngaret kahanangen. Kude dami anak nakayaan, wawei yiru puang kaitung lagi kahanangenni daya hanye arai erang kaulun genda haut nakayaan mawuang dunia.

²²Kalayiru pada naun: Itati naun mahanang atei, kude aku sagar panalu lagi anri naun, balalu atei naun sagar arai; nelang puang uweng sunah erang kaulun sa kaiyuh ngalap kaaraien yiru teka atei naun.

²³Hang anrau yiru naun puang sagar nunti inun-inun lagi ma aku. Parisayaleh; Inun sa nalaku naun ma Ambah makai ngaranku, yiru sagar napulur daya Ambah ma naun.

²⁴Hampe itati naun huan ilaku inun-inun makai ngaranku. Laku, maka naun sagar narime, nampan kaaraien naun penu.”

²⁵“Katuluh yiti naeauku ma naun makai rarapisan. Kude sagar naan wayahni aku puang lagi makai rarapisan, kude bapaner tarang tarus ma naun neu Ambah.

²⁶Hang tawuk yiru naun sagar ilaku makai ngaranku; wuah naun karasa, aku puang sagar ilaku teka Ambah ma naun,

²⁷daya Ambah sinta naun. Hanye sinta naun daya naun sinta aku, nelang parisaya sa aku hawi teka Alatalla.

²⁸Samula asalku teka Ambah, nelang haut hawi mawuang dunia. Kude itati aku nanan dunia mulek ma Ambah.”

²⁹Balalu kawan ulun sa umba Yesus kaeau ma hanye, “Itati Tuhan bapaner anri tarang tarus nelang puang makai rarapisan,

³⁰nelang kami karasa Tuhan karasa ala katantuluh. Puang sunah erang kaulun sa parlu nunti inun-inun ma Tuhan. Daya yiru kami parisaya Tuhan hawi teka Alatalla.”

³¹Yesus nuing here, “Jari inun itati naun parisaya?

³²Itung! Wayahni sagar hawi, likan haut hawi, naun sagar natampisah. Naun sagar mudi ma lewu maisasaan palus nanan aku raerai. Kude aku puang raerai daya Ambah naan baya aku.

³³Katuluh yiti nawaraku nampan naun kaiyuh kasanangen daya ibaya anri aku. Hang dunia naun sagar ngaret kahanangen. Kude ampikansing atei naun! Aku haut nyantalau dunia!”