Read Ma'anyan YOHANES 17 Bible Online

YOHANES 17 - Ma'anyan bible

YOHANES 17

¹Udi Yesus kaeau kala yiru, Yesus mihangut ma langit balalu kaeau, “Ambah, itati haut hampe wayahni. Ampimulia Anaknu, nampan Anaknu pada ngampi mulia Ambah.

²Ambah haut ngami kuasa ma Anak, hang ambau katuluh umat murunsia, nampan hanye ngami pamelum sajati palus kalalawah ma katuluh ulun sa naami Ambah ma hanye.

³Iti pamelum sajati palus ma kalalawah; nampan ulun kataru Ambah, satu-satuni Alatalla sa kapinuu, nelang kataru Yesus Kristus sa nautus daya Ambah.

⁴Aku haut ngampi mulia Ambah hang dunia yiti anri nyanuput panan gawian sa natugas daya Ambah ma aku.

⁵Ambah! Ampimulia aku itati hang Ambah anri pihante mulia sa namilikiku baya Ambah kapihuan dunia yiti nasanyari.

⁶Aku haut mamperkenal Ambah ma kawan ulun teka dunia yiti sa haut naami Ambah ma aku. Here yiru wat Ambah, nelang Ambah haut ngami here ma aku. Here haut nuu ngalut lengan Ambah.

⁷Itati here karasa ala katantuluh sa naami Ambah ma aku, asalni teka Ambah.

⁸Haut waraku ma here lengan sa naami Ambah ma aku; nelang here haut narimeni. Here karasa sa aku tuu-tuu hawi teka Ambah nelang here parisaya samula Ambah sa ngutus aku.

⁹Aku badoa ma here, aku puang badoa ma dunia, malengkan ma kawan ulun sa haut naami Ambah ma aku, daya here yiru milik Ambah.

¹⁰Katuluh milikku, yiru pada milik Ambah; nelang katuluh milik Ambah, yiru pada milikku. Aku namulia hang penah here.

¹¹Itati aku hawi nunung Ambah. Aku puang muneng hang dunia lagi; kude here naan hang dunia. Ambah sa barasis! Palihara here makai kuasa ngaran Ambah, hanyeyiru ngaran sa haut naami Ambah ma aku — nampan here jari isa, sameh kala Ambah anri aku pada isa.

¹²Tawuk aku pagun baya here, aku haut malihara here makai kuasa ngaran Ambah — ngaran sa naami Ambah ma aku. Aku haut malihara here nelang puang uweng sunah erang kaulun teka here wawai, ekat hanye sa samula haut saharusni wawai; nampan anri kalayiru tulus inun sa haut nasurat hawuang Surat Barasis.

¹³Itati aku hawi nunung Ambah. Aku kaeau katuluh yiti katimpulu aku magun naan hang dunia; nampan here tuu penu kaingkam kaaraienku.

¹⁴Aku haut nampe ma here lengan Ambah, balalu dunia muar here, daya here puang milik dunia, sameh kala aku pada puang milik dunia.

¹⁵Aku puang ilaku nampan Ambah ngalap here teka dunia yiti, kude aku ilaku nampan Ambah malihara here teka hi jahat.

¹⁶Sameh halni kala aku puang milik dunia, here pada puang milik dunia.

¹⁷Ulah here jari milik sa hulung wat Ambah itetei kapinuu; lengan Ambah yiru kapinuu.

¹⁸Kala Ambah haut ngutus aku ma dunia, kalayiru pada aku ngutus here ma dunia.

¹⁹Neu kapantingan here, aku nyarah diriku yalah milik hulung wat Ambah, nampan here pada jari milik hulung wat Ambah itetei kapinuu.

²⁰Puang ekat ma here yiti aku badoa, aku pada badoa ma kawan ulun sa sagar parisaya ma aku daya gana kasaksian here yiti.

²¹Ambah, aku ilaku nampan here katuluh jari isa, kala Ambah isa anri aku nelang aku isa anri Ambah. Mudahan here ibaya anri takam nampan dunia parisaya hi Ambah sa ngutus aku.

²²Aku haut ngami ma here pihante mulia sa naami Ambah ma aku, nampan here jari isa, sameh kala takam pada isa;

²³aku anri here nelang Ambah anri aku; nampan here tuu-tuu isa. Balalu dunia sagar karasa samula Ambah sa ngutus aku, nelang Ambah sinta here kala Ambah sinta aku.

²⁴Ambah, aku hamen nampan here sa naami Ambah ma aku, naan mira baya aku hang unengan aku naan, nampan here kadinung pihante mulia; hanyeyiru pihante mulia sa naami Ambah ma aku, daya Ambah sinta aku kapihuan dunia yiti nasanyari.

²⁵Ambah sa adil! Dunia puang kataru Ambah; nelang kawan ulun yiti karasa samula Ambah sa ngutus aku.

²⁶Aku haut ngalalea ngaran Ambah ma here; nelang aku sagar saratang ngulah kalayiru, nampan sinta Ambah ma aku tatap hang wuang atei here nelang aku isa anri here.”