Read Ma'anyan YOHANES 18 Bible Online

YOHANES 18 - Ma'anyan bible

YOHANES 18

¹Udi Yesus badoa kalayiru, hanye baya kawan ulun sa umba hanye tulak ma sabarang Hungei Kidron. Hang yiru naan isa taman, balalu Yesus anri kawan ulun sa umba hanye masuk ma taman yiru.

²Hi Yudas pangkhianat yiru, karasa unengan yiru; daya Yesus haut gaha bakumpul hang yiru anri kawan ulun sa umba hanye.

³Daya yiru hi Yudas tulak ma unengan yiru, nginsing erang kapasukan tantara Romawi anri papire pangawal Lewu Tuhan sa nahuyu daya kawan imam kapala anri kawan ulun Parisi. Here nginsing sanjata, palita anri suluh.

⁴Yesus karasa katuluh sa sagar wuah ma tenga dirini raerai. Balalu hanye nyanrite kawan ulun yiru palus nunti, “Naun ngantara hie?”

⁵“Yesus, ulun Nazaret,” tuing here. “Aku yiti hanye,” eau Yesus. Hi Yudas pangkhianat yiru minri hang yiru baya here.

⁶Tawuk Yesus kaeau ma here, “Aku yiti hanye,” katuluh here balalu mundur palus tumbang ma tane.

⁷Hinra lagi Yesus nunti ma here, “Naun ngantara hie?” “Yesus ulun Nazaret,” tuing here.

⁸“Haut aku kaeau aku yiti hanye,” eau Yesus. “Nelang amun samula aku sa naantara naun, elahni here sa lain yiti tulak.” (

⁹Anri kalayiru, tulus inun sa haut naeau Yesus kapihuanni: “Ambah, teka kawan ulun sa naami Ambah ma aku, puang uweng sunah erang kaulun sa wawai.”)

¹⁰Hi Simon Petrus sa nginsing erang kawila pedang, nyintak pedang yiru palus nampek walah imam hante hampe silu tuhi kawanni witus. Ngaran walah yiru hi Malkus.

¹¹Balalu Yesus kaeau ma hi Petrus, “Tamasuk mulek pedangnu ma lundanni! Inun indanu aku sagar puang nguut piala kahanangen sa naami Ambah ma aku?”

¹²Balalu kawan parajurit Romawi anri komandanni baya kawan pangawal Yahudi nyamba palus nuruk Yesus.

¹³Mulani here nginsing Yesus mangadap hi Hanas, matueh kasian Kayafas. Hi Kayafas hanyeyiru imam hante hang taun yiru.

¹⁴Nelang hanye sa haut ngami nasehat ma kawan panguasa Yahudi, labis maeh erang kaulun matei neu ma katuluh bangsa.

¹⁵Hi Simon Petrus baya erang kaulun ulun sa umba Yesus sa lain naharak Yesus. Ulun sa umba Yesus sa lain yiti taru imam hante; balalu hanye umba masuk ma natat lewu imam hante yiru sinrah anri Yesus,

¹⁶kude hi Petrus nganrei hang luar, hang wanawang. Udi yiru ulun yiru kaluar balalu bapaner anri palayan wawei sa jaga wanawang yiru, balalu nginsing hi Petrus masuk mawuang.

¹⁷Palayan wawei sa jaga wanawang yiru kaeau ma hi Petrus, “Ha, angneh hanyu pada erang kaulun ulun sa umba ulun yiru?” “Puang,” tuing Petrus.

¹⁸Hang tawuk yiru malem marisak tatuu, jadi kawan palayan anri kawan pangawal haut nyamelum apui makai areng balalu here minrus hang yiru. Hi Petrus tulak mayaru balalu minri minrus baya here.

¹⁹Imam hante nunti Yesus neu kawan ulun sa umba hanye nelang neu ajaranni.

²⁰Yesus nuing, “Aku saratang bapaner anri tarang tarus hang hadapan ulun rama. Aku saratang ngajar hang kawan lewu sumbayang anri hang Lewu Alatalla, unengan ulun Yahudi lanani bakumpul. Puang suah aku kaeau inun-inun anri suni-suni.

²¹Jari wuah inun Tuan nunti aku? Tuntileh ma here sa haut karengei aku ngajar. Himat here karasa inun sa naeauku.”

²²Tawuk Yesus kaeau kalayiru, erang kaulun pangawal hang yiru nampar hanye nelang kaeau, “Tuu heei hanyu kaeau kalayiru ma imam hante!”

²³Yesus nuing, “Amun lenganku yiru hala, wara hang yiti inun sa hala! Kude amun lenganku yiru samula bujur, wuah inun hanyu nampar aku?”

²⁴Udiyiru hi Hanas nunyu ulun nginsing Yesus nelang narantai nunung hi Kayafas imam hante.

²⁵Hi Petrus magun minri minrus hang yiru. Kawan ulun kaeau ma hanye, “Angneh hanyu pada ulun sa umba ulun yiru?” Kude hi Petrus ngidim, eauni, “Puang!”

²⁶Erang kaulun walah imam hante, hanyeyiru kula ulun sa siluni rawis Petrus, kaeau, “Angneh aku kadinung hanyu hang taman yiru baya anri hanye?”

²⁷Balalu hi Petrus ngidim lagi, “Puang,” — pada pas hang tawuk yiru, manu nanru.

²⁸Kaayat subuh here nginsing Yesus teka lewu Kayafas ma istana Gubernur. Kawan ulun Yahudi puang umba masuk mawuang istana, nampan here puang najis manyu agama, daya here ngunu umba parjamuan Paskah.

²⁹Daya yiru hi Pilatus tulak maluar nunung here balalu nunti, “Inun pangaduan naun neu ulun yiti?”

³⁰Here nuing, “Atikalani hanye puang uweng kahalaen, kami puang sagar nginsing hanye ma Bapak Gubernur.”

³¹Hi Pilatus kaeau ma here, “Alap hanye nelang adili hanye manurut hukum naun raerai!” Kude kawan ulun Yahudi yiru nuing, “Kami puang iyuh nyanawu hukuman mati ma ulun.” (

³²Kalayiru nampan tulus inun sa haut naeau Yesus neu sarani hanye matei.)

³³Hi Pilatus masuk lagi mawuang istana balalu nerau Yesus, palus hanye nunti, “Inun hanyu yiti raja ulun Yahudi?”

³⁴Yesus nuing, “Inun tuntian yiru teka hanyu raerai atawa naan ulun lain sa haut iwara ma hanyu neu aku?”

³⁵Hi Pilatus nuing, “Inun hanyu yiti ulun Yahudi? Sa nyarah hanyu maaku hanyeyiru bangsanu raerai anri kawan imam kapala. Inun sa haut naulahnu?”

³⁶Yesus kaeau, “Karajaanku puang teka dunia yiti. Atikala karajaanku teka dunia yiti, kawan ulun watku sagar ngakali nampan aku puang nasarah ma kawan panguasa Yahudi. Kude samula karajaanku puang teka dunia yiti!”

³⁷Balalu hi Pilatus nunti ma hanye, “Amun kalayiru, hanyu raja?” Yesus nuing, “Hanyu sa kaeau aku yiti raja. Aku nakayaan nelang hawi ma dunia anri isa tujuan, hanyeyiru ngami kasaksian neu kapinuu. Ulun sa teka kapinuu yiru nyanrengei aku.”

³⁸Hi Pilatus nunti ma hanye, “Inun aratini kapinuu?” Balalu hi Pilatus kaluar lagi teka istana palus kaeau ma kawan ulun Yahudi, “Aku puang kahaba sunah isa kahalaen hang hanye.

³⁹Kude manyu kabiasaan naun, aku saratang napas erang kaulun tahanan hang Hari Raya Paskah. Inun hamen naun amun aku napas raja ulun Yahudi ma naun?”

⁴⁰Anri mehet lengan here nuing, “Puang, ada hanye, kude hi Barabas!” (Hi Barabas hanyeyiru erang kaulun parampok.)