Read Ma'anyan YOHANES 19 Bible Online

YOHANES 19 - Ma'anyan bible

YOHANES 19

¹Udiyiru hi Pilatus masuk balalu nunyu ulun malawas Yesus.

²Kawan parajurit balalu ngulah isa mahkota teka kawan jangkeng barunrui, palus namu hang ulu Yesus. Udi hie here nuwe ma hanye jubah bawarna ungu,

³balalu papire kali here hawi nunung hanye nelang kaeau, “Welum raja ulun Yahudi!” Kamulek here nampar hanye.

⁴Udi yiru hinra lagi hi Pilatus kaluar balalu kaeau ma ulun rama yiru, “Dinung! Aku nginsing hanye kaluar nunung naun nampan naun karasa aku budas puang kahaba sunah isa kahalaen hang hanye.”

⁵Yesus kaluar nelang makai mahkota teka runrui nelang makai jubah warna ungu. Hi Pilatus kaeau ma here, “Dinung ulun yiru.”

⁶Tawuk kawan imam kapala anri kawan pangawal yiru kadinung Yesus, here kaeau anri lengan mehet, “Balasangar hanye! Balasangar hanye!” Hi Pilatus kaeau ma here, “Alap hanye, naun raerai sa nyalib hanye, aku paung kahaba sunah isa kahalaen hang hanye.”

⁷Kawan ulun Yahudi nuing, “Manyu hukum kami, hanye harus nahukum mati daya hanye mangaku dirini Anak Alatalla.”

⁸Tawuk hi Pilatus karengei here kaeau kalayiru, hanye magin takut lagi.

⁹Balalu hanye masuk kamulek mawuang istana, dami udi Yesus nainsing masuk, hi Pilatus nunti ma hanye, “Hanyu asalni teka awe?” Kude Yesus puang nuing.

¹⁰Jadi hi Pilatus kaeau lagi, “Hanyu puang hamen bapaner anri aku? Rasanu, aku naan kuasa napas hanyu nelang kuasa pada nyalib hanyu!”

¹¹Yesus nuing, “Amun Alatalla puang ngami kuasa yiru ma hanyu, hanyu budas puang bakuasa anri aku. Daya ulun sa nyarah aku ma hanyu, labis hante dosani teka hanyu.”

¹²Tawuk hi Pilatus karengei kalayiru, hanye ngakali napas Yesus. Kude kawan ulun Yahudi nantiak, “Amun Tuan napas hanye, Tuan puang hengau Kaisar! Ulun sa mangaku dirini raja, hanyeyiru musuh Kaisar!”

¹³Tawuk hi Pilatus karengei kawan lengan yiru, hanye nginsing Yesus kaluar balalu maharung hang karusi pangadilan hang unengan sa bangaran Lantai Watu. (Hawuang basa Ibrani naantuh: Gabata.)

¹⁴Tawuk yiru haut riet pukul dua walas penah anrau, anrau kapihuan Hari Raya Paskah. Hi Pilatus kaeau ma kawan ulun yiru, “Iti raja naun!”

¹⁵Here nantiak, “Wunu hanye! Wunu hanye! Balasangar hanye!” Hi Pilatus nunti, “Inun harus aku nyalib raja naun?” Kawan imam kapala nuing, “Ekat Kaisar erang kaulun raja kami!”

¹⁶Balalu hi Pilatus nyarah Yesus ma here nampan nabalasangar. Here ngalap Yesus balalu nginsing hanye tulak.

¹⁷Yesus kaluar nelang ngantung balasangarni raerai ma unengan sa bangaran “Unengan Kuruwangah”. (Hawuang basa Ibrani naantuh: Golgota.)

¹⁸Hang yaru hanye nabalasangar. Sinrah anri hanye naan pada rueh ulun lain pada nabalasangar; erang kaulun hang tuhi kawi, erang kaulun hang tuhi kawan nelang Yesus hang penah.

¹⁹Hang kayu balasangar Yesus, hi Pilatus nunyu masang tulisan: “Yesus teka Nazaret, Raja ulun Yahudi”.

²⁰Rama ulun Yahudi mambasa tulisan yiru, daya unengan Yesus nabalasangar yiru puang lawit teka tumpuk. Tulisan yiru nasurat hang wuang basa Ibrani, Latin anri Yunani.

²¹Kawan imam kapala kaeau ma hi Pilatus, “Ada nyurat ‘Raja ulun Yahudi’ kude surat, ‘Ulun yiti kaeau, Aku Raja ulun Yahudi.’ ”

²²Kude hi Pilatus nuing, “Inun sa haut nasuratku, tatap tasurat.”

²³Udi kawan parajurit yiru nyalib Yesus, here ngalap pakaianni. Pakaian yiru nabagi epat: maisasaan kaiyuh erang bagian. Here ngalap pada jubahni. Jubah yiru puang uweng jahitanni — natenun teka ambau hampe ma imbe.

²⁴Kawan parajurit yiru kaeau sameh here, “Ada takam netek jubah yiti. Ware takam ngulah undian, pakai nukas hie sa sagar kaiyuh.” Hal kalayiru nampan tulus inun sa haut nasurat hang wuang Surat Barasis, hanyeyiru: “Here magi pakaianku, nelang ngulah undian neu jubahku.” Nelang samula tuu kawan parajurit yiru ngulah kalayiru.

²⁵Hang riet balasangar Yesus minri ineh Yesus, pulaksanai inehni wawei, hi Maria darangan Klopas, anri hi Maria Magdalena.

²⁶Tawuk Yesus kadinung inehni anri ulun sa umba hanye sa nasintani minri hang yiru, hanye kaeau ma inehni, “Ineh, iru anak ineh.”

²⁷Kamulek Yesus kaeau ma kawan ulun sa umba hanye yiru, “Iru ineh naun.” Teka tawuk yiru ulun yiru narime ineh Yesus muneng hang lewuni.

²⁸Yesus karasa bawilah tuu itati katuluhni haut ganap, nelang nampan inun sa haut nasurat hawuang Surat Barasis tau tulus, hanye kaeau, “Aku malah.”

²⁹Hang yiru naan isa mangkok sa penu anri ranu anggur maasem. Balalu here nyusup wunge karang yiru mawuang anggur yiru, balalu natatean makai wila, palus nasurung mawiwi Yesus.

³⁰Yesus nyesep ranu anggur yiru, balalu kaeau, “Haut ganap!” Balalu hanye ngatule uluni palus matei.

³¹Kawan panguasa Yahudi puang hamen bangkai kawan ulun sa nabalasangar yiru tatap naan hang kayu balasangar hampe anrau Sabat, duan sa hinra yiti anrau Sabat yiru Hari Raya sa hulung. Daya anrau tawuk Yesus nabalasangar lawu hang anrau kapihuan anrau Sabat yiru, kawan ulun Yahudi ilaku izin teka hi Pilatus nampan nyantepu pee kawan ulun sa nabalasangar yiru palus ngampinau kawan bangkai yiru teka kayu balasangar.

³²Kawan parajurit yiru tulak balalu nyantepu dahulu pee karueh ulun sa nabalasangar sinrah Yesus.

³³Tawuk here hampe Yesus, here kadinung hanye haut matei. Here balalu puang nyantepu peeni.

³⁴Kude erang kaulun teka kawan parajurit yiru nyuduk hang imbe hengkang Yesus makai tombak balalu kaluar ira anri ranu.

³⁵Ulun sa manyaksi raerai kajadian yiru, hanyeyiru sa iwara neu hal yiru, nampan naun pada parisaya. Nelang kasaksianni yiru bujur daya hanye raerai karasa ala yiru bujur.

³⁶Hal kalayiru nampan tulus inun sa haut nasurat hawuang Surat Barasis hanyeyiru, “Puang sunah isa teka taulangni nasantepu”.

³⁷Hawuang Surat Barasis pada naan nasurat, “Here sagar nantau hanye sa haut nasuduk here”.

³⁸Udi yiru hi Yosef teka Arimatea ilaku izin teka hi Pilatus nampan ngalap bangkai Yesus. (Hi Yosef hanyeyiru erang kaulun ulun sa umba Yesus kude anri sara suni-suni, daya hanye takut ma kawan panguasa Yahudi.) Hi Pilatus ngami izin ma hanye, daya yiru hanye balalu tulak ngalap bangkai Yesus.

³⁹Hi Nikodemus, sa dahulu hie suah hawi nunung Yesus tawuk kamalem, tulak pada baya hi Yosef. Hi Nikodemus nginsing rarampah mur anri garu — katuluhni leu telumpulu kilogram wahaini.

⁴⁰Here rueh ngalap bangkai Yesus balalu mundut hanye makai kain kafan baya anri kawan rarampah marauh enguh manurut adat masar ulun Yahudi.

⁴¹Hang unengan Yesus nabalasangar, naan isa taman. Hawuang taman yiru naan isa pasaran wau, sa huan suah napakai uneng masar ulun.

⁴²Daya pasaran yiru rite, nelang anrau Sabat haut kai mulai, here balalu masar Yesus hang yiru.