Read Ma'anyan YOHANES 2 Bible Online

YOHANES 2 - Ma'anyan bible

YOHANES 2

¹Rueh anrau udi yiru, naan pesta kawin hang tumpuk Kana, hang Galilea, nelang ineh Yesus naan hang yaru.

²Yesus anri kawan ulun sa umba hanye, naundang pada ma pesta yiru.

³Tawuk anggur haut galis, ineh Yesus kaeau ma Yesus, “Here kagalisan anggur.”

⁴Yesus nuing, “Ineh ada nunyu aku. Huan hampe wayahni aku nantarang tengaku.”

⁵Kude ineh Yesus kaeau ma kawan palayan, “Ulah inun sa naeauni ma naun.”

⁶Hang yiru naan enem balanai sa nasadia pakai iwui ibarasis manurut adat Yahudi. Tiap balanai, isini leu jatuh liter.

⁷Yesus kaeau ma kawan palayan yiru, “Isi ranu ma kawan balanai yiru.” Here balalu ngisi balanai yiru hampe penu.

⁸Balalu Yesus kaeau ma here, “Itati sabuk babutit ranu yiru, palus ami ma pamimpin pesta.” Here balalu nginsing ranu yiru ma pamimpin pesta,

⁹palus hanye ngingkam ranu sa haut baubah jari anggur. (Hanye puang karasa teka awe anggur yiru, ekat kawan palayan sa nalui ranu yiru sa karasa.) Balalu Pamimpin pesta yiru nyanrite pangantin upu,

¹⁰balalu kaeau ma hanye, “Biasani ulun nyarungan anggur sa pangamaeh dahulu. Amun kawan tamu haut puas nguut, wau anggur sa biasa. Kude hanyu nyimuh anggur sa pangamaeh hampe itati!”

¹¹Yiru kaajaiban sa palanungkai naulah Yesus witu Kana, hang Galilea. Makai tanda yiru hanye nantarang pihante muliani, nampan kawan ulun sa umba hanye parisaya ma hanye.

¹²Udiyiru Yesus tulak ma Kapernaum baya inehni, pulaksanaini anri kawan ulun sa umba hanye. Here muneng hang yaru papire anrau lawahni.

¹³Tawuk Hari Raya Paskah ulun Yahudi haut riet, Yesus tulak ma Yerusalem.

¹⁴Hang Lewu Tuhan hang Yerusalem, hanye kasasat kawan padagang sapi, babiri, wurung dara, kawan tukang hurup duit maharung hang yiru.

¹⁵Yesus balalu ngulah piweweh teka tadi, balalu ngusir kawan satua yiru, sapi atawa babiri teka wuang Lewu Tuhan. Kawan meja wat kawan tukang hurup duit, walengni hampe kawan duit here pahambur maaru-maati.

¹⁶Balalu hanye kaeau mapangari wurung dara, “Enat katuluhni teka yiti. Ada ngulah Lewu Ambahku jari unengan badagang!”

¹⁷Kawan ulun sa umba Yesus kaitung ma ayat Surat Barasis, sa kaeau, “Sintaku ma Lewunu, U Alatalla, nampanas ateiku.”

¹⁸Kawan panguasa Yahudi manantang Yesus, here kaeau, “Suba ulah kaajaiban pakai tanda ma kami sa hanyu naan hak bartindak kalayiru.”

¹⁹Yesus nuing, “Sanruntun Lewu yiti, aku ngambuanni lagi hawuang waktu telu anrau.”

²⁰Balalu here kaeau, “Epat pulu enem taun lawahni ngulah Lewu Tuhan yiti, salenga hanyu sagar ngambuanni lagi ekat hang wuang waktu telu anrau?”

²¹Kude Lewu Tuhan sa namaksud daya Yesus, hanyeyiru tengani raerai.

²²Hanrian, udi Yesus kaelan teka pampateini, kawan ulun sa umba hanye balalu kaitung inun sa suah naeauni. Here parisaya ma inun sa haut nasurat hawuang Surat Barasis nelang pada ma inun sa haut naeau daya Yesus.

²³Tawuk Yesus naan hang Yerusalem hang pesta Paskah, rama ulun parisaya ma hanye daya kawan kaajaiban sa haut naulahni.

²⁴Kude Yesus raerai puang parisaya anri here, daya hanye kataru katuluh ulun.

²⁵Puang parlu ulun ngami katarangan ma hanye neu hie-hie, daya hanye karasa inun sa naan hawuang atei murunsia.