Read Ma'anyan YOHANES 21 Bible Online

YOHANES 21 - Ma'anyan bible

YOHANES 21

¹Udi yiru hinra lagi Yesus nantarang tengani hang danau Tiberias ma kawan ulun sa umba hanye. Kajadianni kala yiti:

²Hinra anrau hi Simon Petrus, hi Tomas sa naantuh hi aruangan, hi Natanael teka Kana hang Galilea, kawan anak Zebedeus, anri rueh kaulun ulun sa umba Yesus sa lainni, rahat bakumpul.

³Eau Simon Petrus ma here lain, “Aku hamen tulak lepuh ngaiyuh kenah.” “Kami umba,” eau here ma hanye. Balalu here palus tulak sungkat jukung. Kude tungkas erang malem yiru here puang kaiyuh sunah erang kaukui kenah.

⁴Tawuk mate anrau hulet, Yesus minri hang iring danau, kude here puang kataru hanyeyiru Yesus.

⁵Yesus kaeau mahere, “U kawan anakku, inun naun naan kenah?” “Puang uweng,” eau here.

⁶Yesus kaeau ma here, “Timbai lunta naun ma tuhi kawan jukung, die naun kaiyuh kenah.” Balalu here nimbai lunta yiru, kude here puang kaule narik lunta yiru daya kalayiru rama kenah hawuangni.

⁷Ulun sa nasinta Yesus kaeau ma hi Petrus, “Yiru Tuhan!” Tawuk hi Simon karengei hanyeyiru Tuhan, hanye nuwe bajuni (tawuk yiru hanye puang babaju) balalu mitun ma ranu.

⁸Kawan ulun sa umba Yesus sa lain ngapung nuju pampang makai jukung, nelang narik lunta sa penu anri kenah. Here puang lawit teka pampang, leu jatuh meter lawitni.

⁹Tawuk here minau teka jukung, here kadinung naan waye apui hang yaru baya kenah hang ambauni baya rote.

¹⁰Yesus kaeau ma here, “Suba insing ma yati kenah sa wau iyuh naun.”

¹¹Hi Simon Petrus sungkat mawuang jukung, balalu narik luntani ma pampang. Lunta yiru penu kawan kenah hante; katuluhni naan jatuh dimempulu telu kaukui. Biar kalayiru wahaini, luntani puang sitat.

¹²Yesus kaeau mahere, “Hayu takam ikuta”. Puang uweng sunah erang kaulun teka kawan ulun sa umba hanye yiru sa heei nunti, “Hanyu hie?” Daya here karasa, hanye Tuhan.

¹³Yesus nyanrite here, ngalap rote yiru, balalu ngami ma here. Kalayiru pada hanye ngami kenah.

¹⁴Iti sa katelu kalini Yesus nantarang tengani ma kawan ulun sa umba hanye, udi hanye kaelan teka pampatei.

¹⁵Udi here ikuta, Yesus kaeau ma hi Simon Petrus, “Simon anak Yona, inun hanyu labis sinta ma aku teka here yiti sinta aku?” “Tuu Tuhan,” tuing Petrus, “Tuhan karasa aku sinta ma Tuhan.” Yesus kaeau ma hanye, “Palihara kawan anak babiriku.”

¹⁶Ma karueh kalini Yesus nunti ma hanye, “Simon anak Yona, inun hanyu sinta maaku?” “Tuu Tuhan,” tuing Petrus, “Tuhan karasa aku sinta Tuhan.” Yesus kaeau ma hanye, “Palihara kawan anak babiriku.”

¹⁷Ma katelu kalini Yesus nunti ma hanye, “Simon anak Yona, inun hanyu sinta aku?” Hi Petrus mahanang atei daya Yesus nunti ma hanye hampe hantelu kali. Balalu hi Petrus nuing lagi, “Tuhan, Tuhan karasa ala katantuluhni. Tuhan karasa aku sinta Tuhan!” Balalu Yesus kaeau ma hanye, “Palihara kawan babiriku.

¹⁸Himat tuu eauku yiti: Tawuk hanyu lagi iya, hanyu raerai nuruk pinggangnu balalu tulak maawe hanyu hamen. Kude amun hanyu haut matueh yati, hanyu nyurung tangannu, balalu ulun lain sa nuruk hanyu palus nginsing hanyu maawe hanyu puang hamen tulak.”

¹⁹(Anri kaeau kalayiru, Yesus iwara kewangun hi Petrus sagar matei yati nampan ngampi mulia Alatalla.) Udi yiru Yesus kaeau ma hi Petrus, “Umba aku!”

²⁰Tawuk hi Petrus ikulik, hanye kadinung hang wadingni naan ulun sa umba sa nasinta Yesus. (Hanye sa maharung rite Yesus tawuk ikuta balalu nunti ma hanye, “Tuhan, hie sa sagar makhianat Tuhan?”)

²¹Kadinung hanye, hi Petrus nunti ma Yesus, “Tuhan, kewangun anri hanye yiti?”

²²Yesus nuing, “Atikala aku hamen hanye tatap welum hampe aku hawi, yiru puang urusannu. Kude hanyu, umba naharak aku!”

²³Balalu tasiar kabar hang padang kawan ulun sa umba Yesus himat ulun yiru puang sagar matei. Kude Yesus puang kaeau himat ulun sa umba yiru puang sagar matei, malengkan: “Atikala aku hamen hanye tatap welum hampe aku hawi, yiru puang urusannu.”

²⁴Hi Yohanes sa ngami kasaksian neu kajadian yiti. Hanye pada sa haut nyuratni. Nelang takam karasa batantu inun sa naeauni yiru kapinuu.

²⁵Magun wahai hal lain sa naulah daya Yesus. Atikala yiru nasurat isa mangisa, indaku puang uweng sukup unengan hang dunia yiti neu nuwe katantuluh buku sa sagar nasurat yiru.