Read Ma'anyan YOHANES 3 Bible Online

YOHANES 3 - Ma'anyan bible

YOHANES 3

¹Naan erang kaulun tokoh agama teka babuhan ulun Farisi ngaranni hi Nikodemus.

²Hang hinra malem hanye hawi nunung Yesus balalu kaeau, “Guru, kami karasa Guru nautus daya Alatalla. Daya puang uweng sunah erang kaulun sa kaiyuh ngulah kaajaiban kala sa haut naulah guru, amun Alatalla puang nyinrah hanye.”

³Yesus nuing, “Parisayaleh puang uweng sunah erang kaulun sa kaiyuh jari ulun pidian wat Alatalla, amun hanye puang nakayaan kamulek.”

⁴“Kewangun ulun matueh tau nakayaan kamulek,” eau Nikodemus ma Yesus, “Inun tau hanye masuk mulek mawuang wuntung inehni balalu nakayaan kamulek?”

⁵Yesus nuing, “Kapinuuni eauku yiti: amun ulun puang nakayaan daya ranu nelang daya Roh Alatalla ulun yiru puang kaiyuh jari ulun pidian wat Alatalla.

⁶Murunsia manyu daging nakayaan daya ulun matuehni, kude manyu rohani nakayaan daya Roh Alatalla.

⁷Ada wauh amun aku kaeau: naun katuluh harus nakayaan kamulek.

⁸Riwut bagarak maawe bahumni: takam karengei lenganni, kude puang karasa teka awe hawini nelang hampi awe tulakni. Kalayiru pada ulun sa nakayaan daya Roh Alatalla.”

⁹“Kewangun yiru tau jari?” tunti Nikodemus.

¹⁰Yesus nuing, “Hanyu guru hang Israel; puang mudai hanyu puang karasa?

¹¹Parisayaleh: kami iwara ekat neu inun sa rasa kami nelang kami ngami kasaksian ekat neu inun sa haut dinung kami, kude naun puang hamen narime kasaksian kami.

¹²Naun puang parisaya amun aku nyarita ma naun neu kawan hal teka dunia yena; kewangun naun tau parisaya, amun aku nyarita ma naun kawan hal neu surga?

¹³Puang sunah erang kaulun suah mambai ma surga, ekat hanye sa haut minau ma dunia, hanyeyiru Anak Murunsia.

¹⁴Sameh kala hi Moses ngagueng anipe tambaga hang padang gurun witu erang kawila kayu, kalayiru pada Anak Murunsia harus nagagueng,

¹⁵nampan katuluh ulun sa parisaya mahanye kaiyuh pamelum sajati palus ma kalalawah.”

¹⁶Daya kalayiru Alatalla sinta ma murunsia hang dunia yena, hampe hanye ngami anakni sa tungkan, nampan katuluh ulun sa parisaya ma hanye puang binasa, malengkan kaiyuh pamelum sa sajati palus ma kalalawah.

¹⁷Daya Alatalla ngutus Anakni puang nampan manghakimi dunia yiti, kude nampan nyalamat dunia yiti.

¹⁸Ulun sa parisaya ma hanye puang nahukum. Kude ulun sa puang parisaya haut na hukum daya Alatalla, daya gana hanye puang parisaya ma Anak Alatalla sa tungkan.

¹⁹Hanye nahukum daya gana hal yiti: Piraai yiru haut hawi ma dunia, kude murunsia labis sindi piieng teka piraai, daya pagawian here jahat.

²⁰Katuluh ulun sa ngulah jahat, rigat ma piraai; hanye puang hamen hawi nunung piraai, nampan pagawianni sa jahat puang dinung.

²¹Kude ulun sa nampalus kabahumen Alatalla, hawi ma piraai nampan bawilah inun sa naulahni yiru manyu kala kabahumen Alatalla.

²²Udi yiru Yesus baya kawan ulun sa umba hanye tulak ma Yudea. Hanye muneng hang yaru papire tawuk lawahni baya here nelang mambaptis.

²³Tawuk yiru hi Yohanes huan masuk panjara. Hanye mambaptis ulun hang Ainon, puang lawit teka Salem, daya hang yaru wahai ranu. Rama ulun hawi nunung hanye balalu hanye mambaptis here.

²⁵Papire kaulun ulun sa umba Yohanes mulai basual anri ulun Yahudi neu hadat ibarasis.

²⁶Here tulak nunung hi Yohanes balalu kaeau, “Guru, inun hanyu pagun kaitung ulun sa baya hanyu hang sabarang Hungei Yordan yiru, sa tutuinu ma kami tawuk hie? Hanye itati mambaptis pada nelang rama ulun hawi nunung hanye!”

²⁷Hi Yohanes nuing, “Murunsia puang tau uweng ala inun-inun amun puang Alatalla ngami ma hanye.

²⁸Naun haut karengei aku kaeau, ‘Aku puang Raja Panyalamat. Aku nautus nahuluan hanye.’

²⁹Pangantin wawei samula wat pangantin upu. Panggapit pangantin upu yiru ekat minri nengau nelang nyanrengei balalu hanye sanang amun karengei lengan pangantin upu. Kala yiru pada aku. Itati aku arai tatuu.

³⁰Hanyeyiru sa harus magin penting kude aku magin puang penting.”

³¹Sa hawi teka ambau diwi teka ala katantuluh. Sa hawi teka dunia tamasuk ulun dunia nelang bapaner neu kawan hal dunia. Hanye sa hawi teka ambau diwi teka alakatantuluh.

³²Hanye bapaner neu inun sa haut nadinungni nelang sa rengeini, kude puang uweng sunah erang kaulun sa parisaya ma kasaksianni.

³³Ulun sa parisaya ma kasaksianni mangaku himat Alatalla benar.

³⁴Daya ulun sa nautus neu nampe kawan lengan Alatalla, Roh Alatalla haut penu naami ma hanye.

³⁵Ambah sinta ma Anakni nelang haut ngami katuluh kuasa ma hanye.

³⁶Ulun sa parisaya ma Anak yiru sagar kaiyuh pamelum sajati palus makalalawah. Kude ulun sa puang ngalut nuu ma Anak yiru puang kaiyuh pamelum. Hanye nahukum Alatalla palus makalalawah.