Read Ma'anyan YOHANES 4 Bible Online

YOHANES 4 - Ma'anyan bible

YOHANES 4

¹Kawan ulun Parisi karengei Yesus kaiyuh nelang mambaptis ulun labis rama teka hi Yohanes. (

²Sabujurni, Yesus raerai puang mambaptis, kude kawan ulun sa umba hanye.)

³Tawuk Yesus karasa kawan ulun Farisi haut karengei neu hal yiru, hanye tulak teka Yudea mulek ma Galilea.

⁴Hang pakiaanni yiru hanye harus mitah Samaria.

⁵Yesus hampe hang isa tumpuk hang Samaria bangaran Sikhar, puang lawit teka tane sa sadi naami Yakub ma hi Yosef anakni.

⁶Hang yiru naan sumur wat Yakub. Daya kauyuhen takia, Yesus balalu tarie maharung hang pingir sumur. Tawuk yiru leu pukul dua walas penah anrau,

⁷kawan ulun sa umba Yesus haut tulak ma tumpuk lepuh ngantara kutaen. Tawuk yiru hawi erang kaulun wawei Samaria lepuh nyauk ranu. Yesus kaeau ma hanye, “Bu, inun iyuh aku laku ranu neu nauut?”

⁸

⁹Wawei Samaria yiru nuing, “Tuan ulun Yahudi, aku ulun Samaria. Wuah inun Tuan laku ranu uut teka aku?” (Daya ulun Yahudi puang uweng hubungan anri ulun Samaria.)

¹⁰Yesus kaeau, “Atikala hanyu karasa pangamian Alatalla nelang hie sa laku ranu uut teka hanyu, himat hanyu raerai laku ranu uut teka hanye nelang hanye sagar ngami ma hanyu ranu welum.”

¹¹Eau wawei yiru, “Tuan puang uweng pisabuk nelang sumur yena tuu lalem. Teka awe Tuan kaiyuh ranu welum yiru?

¹²Hi Yakub, datu nini kami, ngami ma kami sumur yiti. Hanye raerai nyauk ranu nauutni teka yiti; kalayiru pada kawan anak tukuini baya kawan eha samelumanni. Inun ingkam Tuan, Tuan labis hante teka hi Yakub?”

¹³“Ulun sa nguut ranu teka yiti sagar malah lagi,” tuing Yesus,

¹⁴“kude ulun sa nguut ranu sa sagar naamiku, puang tau malah lagi hampe ma kalalawah. Daya ranu sa sagar naamiku yiti sagar jari matei ranu hawuang dirini sa mareh ma luar nelang ngami ma hanye pamelum sajati palus ma kalalawah.”

¹⁵Eau wawei yiru, “Tuan, ami ma aku ranu yiru, nampan aku puang tau malah lagi; nelang puang parlu lagi mulek ma yiti nyauk ranu.”

¹⁶“Hulu mudi, herau matueh upunu, balalu ulek ma yiti,” eau Yesus.

¹⁷“Aku puang uweng matueh upu,” tuing wawei yiru. “Samula tuu eaunu,” eau Yesus.

¹⁸“Daya hanyu haut suah hanime narangan, nelang itati upu sa naan mira baya anri hanyu puang matueh upunu.”

¹⁹“Itati aku karasa himat Tuan erang kaulun Nabi,” eau wawei yiru.

²⁰“Datu nini kami nyambah Alatalla hang bukit yiti, kude bangsa Tuan kaeau ekat hang Yerusalem unengan ulun nyambah Alatalla.”

²¹“Parisayaleh,” eau Yesus ma hanye, “hang hinra tawuk ulun sagar nyambah Alatalla, puang lagi hang bukit yiti nelang puang pada hang Yerusalem.

²²Naun ulun Samaria nyambah sa puang naun kataru, kude kami ulun Yahudi nyambah hanye sa taru kami, daya salamat hawi teka ulun Yahudi.

²³Kude sagar naan wayahni, likan wayahni haut hampe sa anri kuasa Roh Alatalla kawan ulun sagar nyambah Ambah yalah Alatalla sajati kala sa nabahum Ambah.

²⁴Daya Alatalla yiru Roh, nelang ekat anri kuasa Roh Alatalla kawan ulun kaiyuh nyambah Alatalla kala hanye naan.”

²⁵Wawei yiru kaeau ma Yesus, “Aku karasa Raja Panyalamat (sa naantuh Kristus) sagar hawi. Amun hanye hawi, hanye sagar iwara alakatantuluhni ma takam.”

²⁶“Aku yiti hanye,” eau Yesus, “aku sa rahat bapaner anri hanyu itati.”

²⁷Tawuk yiru kawan ulun sa umba Yesus hawi mulek, here wauh kadinung Yesus bapaner anri erang kaulun wawei. Kude puang uweng sunah erang kaulun sa nunti wawei yiru, “Hanyu parlu inun?” atawa sa itunti ma Yesus, “Wuah inun hanyu bapaner anri wawei yiru?”

²⁸Balalu wawei yiru nanan kandini hang yiru, balalu nempat ma tumpuk palus kaeau ma kawan ulun hang yaru,

²⁹“Dinung ma yati ulun sa iwara maaku katuluh inun sa haut naulahku. Gere hanyeyiru Raja Panyalamat?”

³⁰Balalu kawan ulun yiru kaluar nanan tumpuk tulak nunung Yesus.

³¹Tawuk yiru kawan ulun sa umba hanye nuntut Yesus kuman, “Guru,” eau here, “hayu kuman.”

³²Kude Yesus nuing, “Naan kutaen hang aku sa puang naun karasa.”

³³Balalu kawan ulun sa umba hanye ipanunti, “Inun haut naan ulun nginsing kutaen ma hanye.”

³⁴Balalu Yesus kaeau, “Kutaenku hanyeyiru ngalut nuu ma kabahumenni sa ngutus aku, nelang nyanuput pagawian sa nasarahni ma aku.

³⁵Naun kaeau, ‘Epat wulan lagi wayah masi.’ Kude aku kaeau ma naun: Dinung kawan ume haut madintang, nganrei nawasi!

³⁶Ulun sa masi haut sadia narime upani nelang ngumpul hasil ma pamelum sajati palus ma kalalawah. Balalu ulun sa muau anri ulun sa masi tau sameh-sameh sanang-arai.

³⁷Rarapisan yiti tuu pada, ‘Isa ngamule, sa lain masi.’

³⁸Aku nunyu naun tulak maume sa puang naulah daya naun; ulun lain haut bagawi hang yaru kude naun narime kauntungan teka pagawian here.”

³⁹Rama ulun Samaria panduduk tumpuk yiru parisaya ma Yesus, daya wawei yiru kaeau, ‘Hanye sa iwara ma aku katuluh inun sa haut naulahku.’

⁴⁰Tawuk ulun Samaria yiru panalu anri Yesus here ilaku tatuu nampan Yesus muneng baya here. Balalu yesus muneng baya here rueh anrau lawahni.

⁴¹Udiyiru batambah rama ulun parisaya ma Yesus daya kawan inun sa haut naajarni ma here.

⁴²Here kaeau ma wawei yiru, “Itati kami parisaya, puang lagi daya inun sa haut naeaunu ma kami, kude daya kami raerai haut karengei hanye, nelang karasa sa hanye tuu Panyalamat dunia.”

⁴³Udi rueh anrau hanye muneng hang Sikhar, Yesus tulak ma Galilea.

⁴⁴Yesus raerai haut kaeau, “Erang kaulun Nabi puang nahormat hang tumpuk asalni.”

⁴⁵Kude tawuk hanye hampe hang Galilea, kawan ulun hang yaru nyambut hanye anri arai atei, daya here naan hang Yerusalem tawuk Paskah nelang kadinung inun sa haut naulah Yesus.

⁴⁶Udiyiru Yesus mulek ma Kana hang Galilea, hang unengan hanye suah ngubah ranu jari anggur. Hang tumpuk yiru naan erang kaulun pagawai pamarentah, anakni ganjah sakit hang Kapernaum.

⁴⁷Tawuk hanye karengei Yesus hawi ma Galilea teka Yudea, hanye tulak nunung Yesus balalu ilaku Yesus hawi ma Kapernaum nampan nyamare anakni sa haut kai matei.

⁴⁸Kude Yesus kaeau ma pagawai pamarentah yiru, “Amun naun puang kadinung kawan kaajaiban, naun puang parisaya.”

⁴⁹“Tuan,” tuing pagawai pamarentah yiru, “wansit hawi kapihuan anakku matei.”

⁵⁰Eau Yesus ma hanye, “Hulu mudi, anaknu ware.” Ulun yiru parisaya inun sa naeau Yesus, balalu hanye tulak.

⁵¹Hang penah lalan kawan palayanni hawi nunung hanye balalu iwara, “Anak Tuan haut ware.”

⁵²Balalu hanye nunti ma here pukul pire anakni yiru ware. Here nuing, “Hangkariwe pukul isa penah anrau ekumni wawai.”

⁵³Balalu ambah anak yiru kaitung hang tawuk yiru Yesus kaeau mahanye, “Anaknu ware.” Daya yiru hanye baya katuluh kaluargani parisaya ma Yesus.

⁵⁴Yiru kaajaiban sa karueh naulah Yesus hang Galilea udi hanye hawi teka Yudea.