Read Ma'anyan YOHANES 6 Bible Online

YOHANES 6 - Ma'anyan bible

YOHANES 6

¹Papire lawah udi yiru Yesus tulak ma sabarang Danau Galilea, sa naantuh pada Danau Tiberias.

²Dami hanye hampe yaru, rama ulun umba hanye daya here haut kadinung kawan kaajaiban sa naulahni anri nyamare kawan ulun sakit.

³Yesus mambai ma ambau bukit, balalu maharung hang yiru baya kawan ulun sa umba hanye.

⁴Tawuk yiru haut rite anrau Parayaan Paskah Yahudi.

⁵Tawuk Yesus ninung hang kaliling hanye, hanye kadinung ulun rama hawi nunung hanye. Hanye balalu kaeau ma hi Filipus “Hang awe takam tau kaiyuh midi kutaen, nampan katuluh ulun yiti tau ikuta?” (

⁶Yesus karasa inun sa sagar naulahni, kude hanye kaeau kalayiru daya hanye hamen nguji hi Filipus.)

⁷Hi Filipus nuing, “Midi rote makai rueh jatuh duit perak sika puang maka sukup ma kuta kawan ulun yiti, biar tiap kaulun ekat kaiyuh babutit.”

⁸Erang kaulun ulun sa umba Yesus salain, hanyeyiru hi Andreas pulaksanai Simon Petrus, kaeau,

⁹“Hang yiti naan erang kaulun iya upu sa nginsing dime rote anri rueh kaukui kenah. Kude inun aratini yiru ma kawan ulun rama yiti?”

¹⁰“Huyu kawan ulun yiru maharung,” eau Yesus. Hang unengan yiru naan padang rikut, balalu kawan ulun yiru maharung hang ambau rikut — katuluhni naan leu dime ribu kaulun upu.

¹¹Udi hie Yesus ngalap rote yiru, balalu hanye ngantuh tarima kasih ma Alatalla. Udi yiru hanye magi rote yiru ma ulun rama. Udi hie magi kenah, katuluh ulun ikuta hampe wising tatuu.

¹²Udi katuluhni ikuta hampe wising, Yesus kaeau ma kawan ulun sa umba hanye, “Kumpul kalabihan kutaen yiru, ada hampe naan sa taumpe.”

¹³Balalu here ngumpul dua walas karanjang penu, kalabihan kutaen teka dime rote sa nakuta daya ulun rama yiru.

¹⁴Tawuk ulun rama yiru kadinung kaajaiban sa naulah daya Yesus, here kaeau, “Tuu, hanye yiti Nabi sa naharap hawi ma dunia!”

¹⁵Yesus karasa here hawi mamaksa hanye ngunu nampan jari raja here. Daya yiru hanye balalu tulak basingkir ma tiba bukit.

¹⁶Dami anrau nuku kamalem, kawan ulun sa umba Yesus minau ma danau.

¹⁷Balalu here sungkat jukung nyabarang danau nuju Kapernaum. Anrau haut maieng kude Yesus huan eleh hawi nunung here.

¹⁸Tawuk yiru ranu hang danau nuku bagalumbang daya tampuh riwut mehet.

¹⁹Haut balayar leu dime atawa enem kilo meter, here kadinung Yesus hawi nuju jukung takia hang ambau ranu. Here takut tatuu.

²⁰Kude Yesus kaeau ma here, “Ada takut, iti aku!”

²¹Balalu anri sanang atei here narime hanye masuk mawuang jukung, tawuk yiru pada jukung here hampe unengan sa natuju.

²²Ma anrau kaunini ulun rama sa pagun muneng hang sabarang danau, kaitung tuu hunien ekat naan isa jukung hang yaru. Here karasa himat kawan ulun sa umba Yesus haut tulak makai jukung yiru, kude Yesus puang umba.

²³Kamulek papire kawua jukung teka tumpuk Tiberias hawi balalu tarie rite unengan ulun rama nguta rote udi Tuhan ngantuh tarima kasih.

²⁴Tawuk ulun rama yiru kadinung Yesus atawa kawan ulun sa umba hanye puang uweng hang yiru, here pada sungkat ma jukung yiru balalu tulak ma Kapernaum ngantara Yesus.

²⁵Tawuk kawan ulun rama yiru panalu Yesus hang sabarang danau, here nunti ma hanye, “Guru, hantamian hanyu hampe yiti?”

²⁶Yesus nuing, “Kapinuuni, naun ngantara aku puang daya naun kataru maksud kawan kaajaiban sa naulahku, kude daya naun haut ikuta hampe wising.

²⁷Ada bagawi neu ngantara anakuta sa tau galis nelang tau buruk. Ware naun bagawi neu ngantara anakuta sa puang tau buruk nelang sa ngami pamelum sajati palus makalalawah. Anakuta yiru sagar naami Anak Murunsia ma naun, daya hanye haut nadudus daya Alatalla Ambah.”

²⁸Balalu here nunti ma hanye, “Inun sa harus naulah kami nampan nampalus kabahumen Alatalla?”

²⁹Yesus nuing, “Iti sa nakabahumen Alatalla teka naun; Parisayaleh ma hanye sa nautus Alatalla.”

³⁰“Amun kalayiru,” eau here, “inun bukti sa tau naaminu ma kami nampan kami kadinung nelang parisaya ma Ambah? Inun sa sagar naulah daya Ambah?

³¹Datu nini kami nguta manna hang padang gurun, kala nasurat hang Surat Barasis, ‘Hanye ngami ma here anakuta rote teka surga.’ ”

³²Balalu Yesus kaeau ma here, “Perisayaleh puang hi Moses, malengkan Ambahku sa ngami ma naun rote sa kapinuuni teka surga.

³³Daya rote isa naami Alatalla hanyeyiru hanye sa minau teka surga nelang ngami pamelum ma murunsia hang dunia.”

³⁴“Tuan,” eau here, “Ami ma kami kete-kete rote yiru.”

³⁵“Aku yiti rote sa ngami pamelum,” eau Yesus ma here. “Ulun sa hawi nunung aku puang sagar kajuju lagi ma kalalawahni. Neleng ulun sa parisaya ma aku puang sagar malah lagi palus ma kalalawahni.”

³⁶“Kude kala sa haut naeauku ma naun, biar naun haut kadinung aku, naun puang parisaya.

³⁷Katuluh ulun sa naami Ambah ma aku sagar hawi nunung aku. Aku puang nampik hie-hie sa hawi nunung aku.

³⁸Daya aku minau teka surga, puang neu nampalus kabahumenku raerai, malengkan kabahumenni sa ngutus aku.

³⁹Nelang iti kabahumenni sa ngutus aku: nampan teka katuluh ulun sa naami ma aku, puang sunah erang kaulun wawai; kude nampan aku ngele here hang anrau kiamat.

⁴⁰Samula yiti kabahumen Ambahku; Nampan katuluh sa kadinung nelang parisaya ma hanye kaiyuh pamelum sajati palus ma kalalawah nelang aku nyamelum kamulek hang anrau Kiamat.”

⁴¹Kawan ulun Yahudi mulai mangomel nadap Yesus, daya hanye kaeau: “Aku rote sa minau teka surga.”

⁴²Here kaeau, “Angneh hanye yiti Yesus anak Yosef? Kami kataru ineh ambahni! Kewangun hanye tau kaeau hanye minau teka surga?”

⁴³Balalu Yesus kaeau ma here, “Ada mangomel.

⁴⁴Puang uweng sunah erang kaulun kaiyuh hawi nunung aku, amun Ambahku sa ngutus aku, puang nginsing hanye nunung aku; nelang hie sa hawi sagar naele hang anrau Kiamat.

⁴⁵Hawuang buku kawan nabi nasurat kala yiti, ‘Katuluh ulun sagar naajar daya Alatalla.’ Balalu katuluh ulun sa nyanrengei Alatalla nelang paajar teka hanye, hawi nunung aku.

⁴⁶Yiru puang baarati naan ulun sa haut kadinung Ambah. Ekat hanye sa hawi teka Alatalla, haut kadinung Ambah.

⁴⁷Rasa naun; Ulun sa parisaya, kaiyuh pamelum sajati palus ma kalalawah.

⁴⁸Aku yiti rote sa ngami pamelum.

⁴⁹Datu nini naun nguta manna hang padang gurun nelang. Here matei pada.

⁵⁰Kude puang kala yiru anri rote sa minau teka surga; ulun sa nguta rote yiru puang sagar matei.

⁵¹Aku yiti rote sa minau teka surga — rote sa ngami pamelum. Ulun sa nguta rote yiti sagar welum ma kalalawah. Rote sa sagar naamiku neu pamelum murunsia hang dunia hanyeyiru dagingku.”

⁵²Karengei yiru, kawan ulun Yahudi basual sameh here. “Kewangun ulun yiti kaiyuh ngami dagingni ma takam neu nakuta?” eau here.

⁵³Balalu Yesus kaeau ma here, “Parisayaleh: Amun naun puang nguta daging Anak Murunsia nelang nguut irani, naun puang sagar tuu-tuu welum.

⁵⁴Ulun sa nguta dagingku nelang nguut iraku kaiyuh pamelum sajati palus ma kalalawah nelang aku sagar ngele hanye hang Anrau Kiamat.

⁵⁵Daya dagingku tuu-tuu anakuta nelang iraku tuu-tuu uuten,

⁵⁶ulun sa nguta dagingku nelang nguut iraku, tatap mira anri aku nelang aku mira anri hanye.

⁵⁷Ambah sa welum yiru ngutus aku nelang aku pada welum teka hanye. Kala yiru pada ulun sa nguta dagingku sagar welum teka aku.

⁵⁸Iti rote sa minau teka surga; puang rote kala sa nakuta datu nini naun. Daya udi nguta rote yiru, here sika matei. Kude ulun sa nguta rote yiti sagar welum palus ma kalalawah.”

⁵⁹Katuluh yiru naeau Yesus tawuk hanye ngajar hang lewu sumbayang hang Kapernaum.

⁶⁰Udi karengei eau Yesus yiru, rama teka kawan ulun sa umba hanye kaeau, “Pangajaranni yiru tuuni maweat. Hie sa kaiyuh narimeni!”

⁶¹Yesus karasa kawan ulun sa umba hanye mangomel neu hal yiru. Daya yiru hanye kaeau, “Inun naun tasinggung daya eauku yiru huni?

⁶²Kewangun jarini yati amun naun kadinung Anak Murunsia mambai mulek ma unenganni asal?

⁶³Sa nyamelum murunsia hanyeyiru Roh Alatalla. Kakuaten murunsia puang uweng gunani. Kawan lengan sa haut naeauku ma naun yiti hanyeyiru lengan Roh Alatalla nelang kawan lengan yiru ngami pamelum.

⁶⁴Kude naan pada teka naun yiti sa puang parisaya.” (Teka asalni Yesus haut karasa hie-hie sa puang hamen parisaya, nelang hie sa sagar makhianat hanye.)

⁶⁵Balalu Yesus kaeau lagi, “Yiru sababni aku iwara ma naun himat puang uweng sunah erang kaulun sa kaiyuh hawi nunung aku, amun Ambah puang ngabahumen.”

⁶⁶Nuku teka tawuk yiru rama kawan ulun sa umba hanye nanan hanye, palus puang hakun umba hanye lagi.

⁶⁷Balalu Yesus nunti ma kadua walas ulun sa umba hanye, “Inun naun pada ngunu nanan aku?”

⁶⁸“Tuhan,” eau Simon Petrus ma hanye, “nunung hie kami sagar tulak? Lengan Tuhan ngami pamelum sajati palus ma kalalawah.

⁶⁹Kami haut parisaya nelang yakin himat Tuhan utusan sa barasis teka Alatalla.”

⁷⁰Yesus nuing, “Angneh aku sa midi naun dua walas kaulun yiti? Kude isa teka naun yiti hanyeyiru roh sa jahat!”

⁷¹Sa namaksud Yesus hanyeyiru hi Yudas anak Simon Iskariot. Daya biar hanye erang kaulun teka kadua walas ulun sa umba Yesus, hanye sa sagar makhianat Yesus.