Read Ma'anyan YOHANES 7 Bible Online

YOHANES 7 - Ma'anyan bible

YOHANES 7

¹Udi yiru Yesus tulak maaru-maati hang Galilea. Hanye puang hakun ma daerah Yudea daya kawan panguasa Yahudi hang yaru ngaheng munu hanye.

²Tawuk yiru pada haut riet Hari Raya Pahapau Rawen.

³Daya yiru kawan pulaksanai Yesus kaeau ma hanye, “Tanan unengan yiti hulu tulak ma Yudea, nampan kawan ulun sa umba hanyu tau kadinung pada panan pagawiannu.

⁴Puang uweng ulun sa nina ngidim sa naulahni amun hanye hamen tawantar. Amun hanyu ngulah kawan hal kala yiru, katuluh dunia musti karasa!” (

⁵Daya kawan pulaksanaini raerai pada puang parisaya ma hanye.)

⁶“Huan wayahni aku ngulah kalayiru,” eau Yesus ma here, “kude ma naun, tiap tawuk tau.

⁷Dunia yiti puang tau pada muar naun. Kude aku samula nakuar daya dunia, daya aku saratang kaeau ma dunia kawan ulah gawini jahat.

⁸Hulu naun raerai tulak ma parayaan yiru. Aku puang tulak daya huan wayahni ma aku.”

⁹Kala yiru eau Yesus ma kawan pulaksanaini, hanye balalu muneng hang Galilea.

¹⁰Udi kawan pulaksanaini tulak ma parayaan yiru, Yesus tulak raerai anri suni-suni puang ulun karasa.

¹¹Salawah parayaan, kawan panguasa Yahudi ngantara hanye nelang nunti, “Hang awe hanye?”

¹²Rama ulun mulai pakakeneh neu hanye. Naan sa kaeau, “Hanye ulun maeh.” Naan pada kaeau, “Puang! Hanye nyantawang ulun rama.”

¹³Kude puang uweng sunah erang kaulun sa heei bapaner tarang-tarangan neu hanye daya here takut ma kawan panguasa Yahudi.

¹⁴Tawuk ganjah parayaan, Yesus masuk mawuang Lewu Tuhan, balalu mulai ngajar.

¹⁵Kawan panguasa Yahudi wauh tuu balalu kaeau, “Kewangun ulun yiti tau wahai pangarasaen, padahal hanye puang suah sakolah?”

¹⁶Yesus nuing, “Sa naajarku yiti puang ajaranku, kude ajaranni sa ngutus aku.

¹⁷Ulun sa hamen ngalut kabahumen Alatalla, sagar karasa inun ajaranku hawini teka Alatalla atawa teka aku raerai.

¹⁸Ulun sa ngami ajaranni raerai ngantara hormat ma dirini raerai. Kude ulun sa ngantara hormat ma ulun sa ngutus hanye, ulun yiru jujur, puang uweng kunuan nipu hang hanye.

¹⁹Angneh hi Moses haut ngami kawan parentah Alatalla ma naun, kude teka naun puang uweng sa makai kawan parentah yiru. Wuah inun naun ngunu munu aku?”

²⁰Ulun rama yiru nuing, “Hanyu rapui! Hie sa ngunu munu hanyu?”

²¹Yesus nuing, “Ekat isa pagawian sa naulahku hang anrau Sabat, balalu naun wauh.

²²Hi Moses ngami aturan ma naun nampan basunat — biar sunat yiru satuuni puang baasal teka hi Moses, kude teka kawan datu nini kapihuan hi Moses. Daya yiru, hang anrau Sabat sika naun ngunu nyunat ulun.

²³Amun naun nampalus yiru nampan ada malangar aturan Moses neu sunat, wuah inun naun sangit ma aku daya nyamare ulun hang anrau Sabat?

²⁴Ada mangadili ulun makai inun sa dinung, kude makai kaadilan.”

²⁵Kamulek naan papire kaulun Yerusalem kaeau, “Angneh hanye yiti ulunni sa rahat naantara nampan nawunu?

²⁶Dinung hanye bapaner anri bebas hang penah rama, nelang puang uweng sa kaeau inun-inun ma hanye! Inun kawan panguasa takam tau pada haut kataru tuu hanye yiti Raja Panyalamat?

²⁷Kude amun Raja Panyalamat yiru hawi puang uweng sunah erang kaulun sa karasa asalni! Kude takam karasa teka awe asalni ulun yiti.”

²⁸Kamulek, rahat Yesus ngajar hang Lewu Tuhan, anri lengan sa mehet hanye kaeau, “Jari naun karasa hie aku yiti, nelang teka awe asalku? Aku puang hawi manyu kabahumenku raerai. Aku nautus dayani sa bakuasa ngutus aku, nelang hanye tau naparisaya. Kude naun puang kataru hanye.

²⁹Aku kataru hanye, daya aku baasal teka hanye, nelang hanye sa ngutus aku.”

³⁰Hang tawuk yiru here hamen nyamba Yesus, kude puang uweng sa heei nigung hanye, daya huan hampe wayahni.

³¹Rama teka kawan ulun yiru mulai parisaya ma hanye nelang kaeau, “Amun Raja Panyalamat yiru hawi, inun hanye tau ngulah labis wahai kaajaiban teka ulun yiti?”

³²Kawan ulun Parisi karengei kewangun ulun rama yiru pakakeneh neu Yesus. Daya yiru, baya kawan imam kapala, here nunyu papire pangawal Lewu Tuhan tulak nyamba Yesus.

³³Yesus kaeau ma ulun rama hawuang Lewu Tuhan, “Ekat erang pitus lagi aku kaiyuh baya naun. Udi yiru aku sagar mulek nunung sa ngutus aku.

³⁴Naun sagar ngantara aku, kude puang kaiyuh panalu aku; daya naun puang kaiyuh nunung ma unengan hang awe aku muneng.”

³⁵Balalu kawan panguasa Yahudi bapaner sasameh here, “Ulun yiti ngunu tulak maawe hampe takam puang kaiyuh manalu hanye? Inun hanye ngunu tulak nunung kawan ulun Yahudi hang luar negeri hang padang ulun Yunani, balalu ngajar ulun Yunani?

³⁶Inun maksudni anri kaeau takam sagar ngantara hanye kude puang kaiyuh kahaba hanye nelang takam puang kaiyuh hawi ma unengan hang awe hanye muneng?”

³⁷Hang anrau pijumpuhan parayaan yiru, hanyeyiru hang anrau sa panga penting, Yesus minri hang Lewu Tuhan balalu kaeau anri lengan mehet, “Ulun sa malah, ware hanye hawi nunung aku nguut ranu.

³⁸Neu ulun sa parisaya ma aku, nasurat hang Surat Barasis, ‘Teka wuang ateini mareh ranu sa ngami pamelum.’ ” (

³⁹Yesus bapaner neu Roh Alatalla, sa sagar natarime daya kawan ulun sa parisaya ma hanye. Daya tawuk yiru Roh Alatalla huan naami; daya Yesus huan namulia mitah pampateini.)

⁴⁰Rama ulun karengei inun sa naeau Yesus, balalu teka here naan sa kaeau, “Ulun yiti himat Nabi yiru!”

⁴¹Sa lain kaeau, “Hanye yiti Raja Panyalamat!” Kude naan pada sa kaeau, “Lain, Raja Panyalamat puang hawi teka Galilea.

⁴²Hang Surat Barasis nasurat neu Raja Panyalamat hanyeyiru katurunan Dawid nelang sagar hawi teka Betlehem, hanyeyiru tumpuk natat Dawid.”

⁴³Akhirni ulun rama mulai basual neu Yesus.

⁴⁴Naan sa ngunu nyamba hanye, kude puang uweng sunah erang kaulun sa heei nigung hanye.

⁴⁵Tawuk kawan pangawal Lewu Tuhan sa nahuyu tulak nyamba Yesus hawi mulek, kawan imam kapala anri kawan ulun Parisi yiru nunti ma here, “Wuah inun naun puang nginsing hanye ma yati?”

⁴⁶Kawan pangawal yiru nuing, “Puang suah naan ulun bapaner sa kala hanye!”

⁴⁷“Inun naun haut nasantawang dayani?” eau kawan ulun Parisi yiru.

⁴⁸“Inun naan teka kawan panguasa takam atawa ulun Parisi sa parisaya ma hanye?

⁴⁹Kude ulun rama yiru puang kataru hukum Moses, here haut takutuk.”

⁵⁰Erang kaulun teka kawan ulun Parisi yiru, hanyeyiru hi Nikodemus sa suah hawi nunung Yesus. Hi Nikodemus kaeau ma kawan ulun Parisi sa lain,

⁵¹“Manurut hukum, ulun puang iyuh nahukum kapihuan pakarani nasanrengei nelang kahalaenni napariksa.”

⁵²“Inun hanyu pada teka Galilea?” tuing here, “Pariksa Surat Barasis! Hanyu sagar kadinung puang uweng nabi sa baasal teka Galilea!” [

⁵³Udi yiru, katuluh ulun mudi ma lewu.