Read Ma'anyan YOHANES 9 Bible Online

YOHANES 9 - Ma'anyan bible

YOHANES 9

¹Tawuk Yesus takia hanye kadinung naan erang kaulun pehe kalemah hanye nakayaan.

²Kawan ulun sa umba Yesus nunti ma Yesus: “Guru, wuah inun ulun yiti pehe kalemah nakayaan? Inun hanye badosa atawa ineh ambahni sa badosa?”

³Yesus nuing, “Hanye pehe puang daya dosani raerai atawa dosa ulun matuehni, kude nampan ulun tau kadinung kuasa Alatalla bagawi hawuang dirini.

⁴Salawah magun kaanrau, takam harus ngulah pagawianni sa ngutus aku. Kamalem sagar hawi, nelang puang uweng sunah erang kaulun sa kaiyuh bagawi.

⁵Salawah aku hang dunia yiti, aku piraai dunia.”

⁶Udi kaeau kala yiru Yesus irura ma tane, balalu hanye ngalut iweini yiru anri tane, udi yiru hanye muhut iwei yiru hang matei ulun yiru,

⁷balalu kaeau ma hanye, “Hulu tulak saawui uruwawanu hang kolam Siloam.” (Siloam aratini: ‘Nautus’.) Ulun yiru balalu tulak nyaawui uruwawani. Tawuk hanye mulek, hanye haut tau kadinung.

⁸Kawan tatanggani anri kawan ulun sa haut suah kadinung hanye basadakah, katuluhni kaeau, “Angneh hanye yiti ulun sa lanani maharung laku sadakah?”

⁹Naan sa kaeau, “Bujur hanye.” Kude naan pada sa kaeau, “Puang, ekat hanye bilang sarupa ulun yiru.” Kude ulun yiru raerai kaeau, “Bujur, aku ulun yiru.”

¹⁰“Kewangun hampe hanyu tau kadinung?” eau here ma hanye.

¹¹Hanye nuing, “Ulun sa bangaran Yesus yiru ngalut tane balalu muhut tane yiru hang mateiku balalu kaeau, ‘Hulu nyaawui uruwawanu hang kolam Siloam.’ Balalu aku tulak nelang tawuk aku nyaawui uruwawaku, aku salenga tau kadinung.”

¹²“Hang awe ulun yiru?” tunti here. Hanye nuing, “Aku puang karasa.”

¹³Anrau yiru anrau Sabat, tawuk Yesus ngalut tane anri iweini pakai nyamare ulun pehe yiru. Balalu ulun sa udi pehe yiru naendei nunung ulun Parisi.

¹⁵Here pada nunti ma hanye kewangun hanye tau kaiyuh kadinung. Hanye nuing, “Hanye muhut luyak hang mateiku, balalu aku nyaawuini, balalu aku salenga kadinung.”

¹⁶Papire teka ulun Parisi yiru kaeau, “Puang tau pada ulun sa ngulah kalayiru asalni teka Alatalla, daya hanye puang mahormat anrau Sabat.” Kude ulun lain kaeau, “Puang tau pada ulun sa badosa ngulah kaajaiban kalayiru?” Balalu timbul pandapat sa babeda hang sameh here.

¹⁷Daya yiru kawan ulun Parisi nunti lagi ma ulun yiru, “Inun pandapatnu neu hanye sa ngulah hanyu tau kadinung?” “Hanye nabi,” tuing ulun yiru.

¹⁸Kude kawan pamimpin Yahudi yiru budas puang parisaya sa ulun yiru udi pehe nelang itati kaiyuh kadinung. Daya yiru here nerau ulun matuehni,

¹⁹here nunti, “Tuu anak naun yiru pehe kalemah teka hanye nakayaan? Kewangun salenga hanye itati tau kadinung?”

²⁰Ineh ambah ulun yiru nuing, “Bujur hanye yiti anak kami, nelang hanye samula pehe kalemah hanye nakayaan.

²¹Kude kewangun hanye itati tau kadinung, kami puang karasa. Nelang hie sa ngulah hanye tau kadinung, kami pada puang karasa. Tunti ma hanye, hanye haut dewasa; hanye raerai tau nuingni.”

²²Ineh ambah ulun yiru kaeau kala yiru daya here takut ma kawan pamimpin Yahudi; daya here haut mapakat, hie ulun sa mangaku Yesus Raja Panyalamat, puang iyuh lagi masuk lewu sumbayang.

²³Daya gana yiru ineh ambah ulun yiru kaeau, “Hanye haut dewasa; tuntileh ma hanye.”

²⁴Balalu here nerau lagi ulun udi pehe yiru, palus kaeau ma hanye, “Ware hanyu basumpah hanyu sagar kaeau sa kapinuuni. Kami karasa ulun yiru ulun badosa.”

²⁵“Inun hanye badosa atawa puang,” tuing ulun yiru, “aku puang karasa, kude isa hal sa rasaku; dahulu hie aku pehe, itati aku kadinung.”

²⁶Balalu here kaeau lagi ma hanye, “Inun sa naulahni ma hanyu? Kewangun hanye ngulah hanyu tau kadinung?”

²⁷Ulun yiru nuing, “Haut saritaku ma naun, kude naun puang hakun nyanrengei. Wuah inun naun hamen nyanrengeini lagi? Tau pada naun sindi umba hanye pada?”

²⁸Balalu here ngawawarah hanye balalu kaeau, “Hanyu ulun sa umba hanye; kami puang! Kami ulun sa umba Moses.

²⁹Kami karasa Alatalla haut pantane ma hi Moses. Kude neu ulun yiru, kami puang karasa teka awe asalni hanye.”

³⁰Ulun yiru nuing, “Aneh tuu amun naun puang karasa teka awe asalni, sadang sa hanye haut ngulah aku tau kadinung.

³¹Takam karasa Alatalla himat puang nyanrengei ulun badosa, malengkan ulun sa mahormat Alatalla, nelang nampalus kabahumenni.

³²Teka panukuan dunia huan suah naan karengei ulun ngulah ulun pehe kalemah nakayaan tau kadinung.

³³Amun ulun yiru puang teka Alatalla, hanye puang maka tau ngulah inun-inun.”

³⁴Tuing here, “Inun? Hanyu sa penu dosa teka kalemah nakayaan, hanyu hamen ngajar kami?” Balalu teka tawuk yiru hanye puang iyuh masuk ma lewu sumbayang.

³⁵Yesus karengei sa here haut ngaluar hanye teka lewu sumbayang. Hanye ngantara ulun yiru balalu kaeau ma hanye, “Inun hanyu parisaya ma Anak Murunsia?”

³⁶Ulun yiru nuing, “Hie hanye, Tuan? Awat wara, nampan aku parisaya ma hanye.”

³⁷“Hanyu haut kadinung hanye,” tuing Yesus. “Hanye sa itati ganjah bapaner anri hanyu.”

³⁸“Aku parisaya, Tuhan,” eau ulun yiru, balalu ileku hang hadapan Yesus.

³⁹Yesus kaeau, “Aku hawi ma dunia yiti lepuh mangadili; nampan ulun pehe tau kadinung kude ulun kadinung jari pehe.”

⁴⁰Papire ulun Parisi sa naan hang yiru karengei Yesus kaeau kalayiru, balalu here nunti ma hanye, “Maksudnu kami yiti pada pehe?”

⁴¹Yesus nuing, “Atikalani naun pehe, naun puang badosa. Kude daya naun kaeau, ‘Kami kadinung,’ yiru baarati naun pagun badosa.”