Read Ma'anyan KESAH KAWAN RASUL 1 Bible Online

KESAH KAWAN RASUL 1 - Ma'anyan bible

KESAH KAWAN RASUL 1

¹Teofilus sa nahormat, Hawuang bukuku isa palanungkai aku haut iwara katuluh inun sa naulah nelang naajar daya Yesus teka hanye nuku pagawianni,

²hampe anrau hanye naenat ma surga. Kapihuan hanye mihembuk ma surga, anri kuasa Roh Alatalla hanye ngami papire patunjuk ma kawan rasulni isa tapidi.

³Udi hanye matei, salawah epat pulu anrau hanye gaha nantarang tengani anri tarang tatuu ma kawan rasul sa hanye tuu-tuu welum. Here kadinung hanye nelang here bapaner anri hanye neu kewangun Alatalla marentah yalah Raja.

⁴Tawuk hanye bakumpul baya here, hanye kaeau ma here, “Ada naun tulak teka Yerusalem. Anrei hang yaru hampe Ambah ngami inun sa haut najanjini, hanyeyiru inun isa haut waraku dahulu yari ma naun.

⁵Daya hi Yohanes mambaptis makai ranu, kude papire anrau lagi naun sagar nabaptis makai Roh Alatalla.”

⁶Tawuk kawan rasul bakumpul baya anri Yesus, here nunti ma hanye, “Tuhan, inun itati Tuhan hamen ngapinri mulek Pamarentahan bangsa Israel?”

⁷Yesus nuing, “Ambahku raerai sa nukas anrau anri wayahni. Naun puang parlu karasa daya hal yiru hak Ambah.

⁸Kude naun sagar kaiyuh kuasa, amun Roh Alatalla haut hawi ma naun. Nelang naun sagar jari kawan saksiku hang Yerusalem, hang Yudea, hang Samaria hampe ma hujung dunia.”

⁹Udi Yesus kaeau kala yiru, hanye mihembuk ma surga hang hadapan matei here balalu awan nyalumbu hanye teka paninungan here.

¹⁰Ganjah here mihangut ma langit, tawuk Yesus mihembuk, salenga naan rueh kaulun malekat bapakaian mahilak, minri hang higa here.

¹¹Balalu kaeau ma here, “U kawan naun ulun Galilea, wuah inun naun ekat minri hang yiru nelang mihangut ma langit? Yesus, sa dinung naun taenat ma surga hang hadapan matei naun, sagar mulek lagi anri sara sameh kala dinung naun hunien.”

¹²Udi hie kawan rasul balalu mulek ma Yerusalem teka Bukit Zaitun. Bukit yiru naan kira-kira erang kilometer lawitni teka Yerusalem.

¹³Dami hampe Yerusalem here tulak ma lewu unengan here manginap, balalu mambai ma kamar hang ambau. Kawan rasul yiru, hanyeyiru hi Petrus anri hi Yohanes, hi Yakobus anri hi Andreas, hi Filipus anri hi Tomas, hi Bartolomeus anri hi Matius, hi Yakobus anak Alfeus, hi Simon Patriot anri hi Yudas anak Yakobus;

¹⁴here saratang anri isa atei bakumpul badoa. Here badoa sinrah baya kawan wawei tamasuk pada hi Maria ineh Yesus anri kawan pulaksanai Yesus.

¹⁵Hang hinra anrau, tawuk here rahat bakumpul-naan kira-kira jatuh ruampulu kaulun sa hadir-hi Petrus minri balalu bapaner. Hanye kaeau,

¹⁶“Pulaksanai katantuluh! Inun sa nasurat hawuang Surat Barasis, yiru harus jari. Dahulu mitah hi Daud, Roh Alatalla haut nujum neu hi Yudas, pamimpin kawan ulun sa nyamba Yesus yiru.

¹⁷Hi Yudas hanyeyiru erang kaulun teka takam, nelang hanye haut napidi pada nampan umba bagawi baya takam.” (

¹⁸Hi Yudas yiti haut kaiyuh tane pasaran teka upa panghianatanni sa jahat. Hanye lawu palus matei anri wuntungni patuhi hampe kawan sanaini uras kaluar.

¹⁹Katuluh ulun sa muneng hang Yerusalem uras karasa neu hal yiru. Yiru sababni hawuang basa here, here ngampungaran tane yiru Akeldama, sa baarati: ‘Tane Ira’.)

²⁰“Daya hawuang Buku Mazmur naan nasurat kalayiti, ‘Elah unengni muneng jari suni; ada sunah erang kaulun sa muneng hawuangni.’ Naan nasurat kalayiti pada, ‘Elah kadudukanni naalap daya ulun lain.’

²¹Daya yiru, harus naan erang kaulun sa umba baya takam pakai jari saksi sa Tuhan Yesus haut welum mulek teka pampatei. Ulun yiru harus isa teka teka kawan ulun sa saratang baya anri takam tawuk takam sinrah Yesus maawe-awe, teka hi Yohanes mulai mambaptis hampe tawuk Yesus mihembuk ma surga teka penah takam.”

²³Balalu kawan ulun sa naan hang yiru mangusul rueh kaulun isa bangaran hi Yosef sa naantuh pada hi Barsabas (hanye naantuh pada hi Yustus) anri hi Matias.

²⁴Here balalu badoa. Here kaeau, “Tuhan, hanyu karasa atei katantuluh ulun. Hi Yudas haut lawu teka jabatanni sabagai rasul nelang haut matei. Jari tutui ma kami, hie teka rueh kaulun yiti sa napidi daya Tuhan nampan naami tugas yiru nganti hi Yudas.”

²⁶Udi yiru karueh ngaran yiru naundi, hasil undian lawu ma hi Matias. Jari hanye balalu naangkat jari Rasul nampan umba baya anri kasawalas rasul lainni.