Read Ma'anyan KESAH KAWAN RASUL 10 Bible Online

KESAH KAWAN RASUL 10 - Ma'anyan bible

KESAH KAWAN RASUL 10

¹Hang Kaisarea naan erang kaulun upu bangaran hi Kornelius. Hanye erang kaulun kapten “Pasukan Italia”.

²Hanye erang kaulun sa takut ma Alatalla nelang katuluh kulawarga sumbayang ma Alatalla. Hanye ngarawah kawan ulun Yahudi sa paua nelang hanye saratang badoa ma Alatalla.

³Hang hinra anrau leu pukul telu penah anrau hanye kadinung anri bawilah hawuang paninunganni, erang kaulun malekat Alatalla hawi balalu nerau hanye, “Kornelius!”

⁴Hi Kornelius nantau malekat yiru nelang takut balalu kaeau, “Naan inun Tuan?” Malekat yiru kaeau, “Doanu nelang pikaeh ateinu haut natarime daya Alatalla balalu Alatalla ngitung hanyu.

⁵Itati huyu ulun tulak ma Yope nerau hi Simon sa ngaranni budas hi Simon Petrus.

⁶Hanye umba amalem hang lewu erang kaulun tukang kulit bangaran hi Simon, sa muneng hang pinggir pantai.”

⁷Udi malekat bapaner anri hi Kornelius yiru tulak, hi Kornelius nerau rueh kaulun palayan lewuni anri erang kaulun anggota tantara pangawalni sa mawitu bujur takut ma Tuhan.

⁸Hi Kornelius nyarita ma here inun sa haut dinung nelang rengeini yiru, balalu hanye nunyu here tulak ma Yope.

⁹Hang anrau isani, tawuk here magun hang pakiaan nelang kai hampe Yope, hi Petrus mambai ma ambau hapau nampan badoa.

¹⁰Balalu hanye kajuju tuu kakan ikuta. Tawuk yiru anakuta ganjah nasadia, salenga hanye naan paninungan.

¹¹Hanye kadinung langit wawanga balalu naan yalah kain hante bapusing epat gagueng, naului ma tane.

¹²Hawuangni naan papire masam kawan eha sa bapee epat, naan kawan eha sa ilansar nelang naan kawan wurung liar.

¹³Balalu naan lengan sa kaeau ma hanye, “Petrus, ambuan! Samalis palus kuta!”

¹⁴Hi Petrus nuing, “Puang, Tuhan! Huan suah aku nguta kawan sa haram nelang padi.”

¹⁵Kude lengan yiru kaeau lagi ma hanye, “Inun sa haut naeau daya Alatalla halal, ada hanyu nganggap yiru haram.”

¹⁶Paninungan yiru kakune hampe telu kali, udiyiru kain yiru balalu paenat lagi ma surga.

¹⁷Hi Petrus bingung mamikir inun arati teka paninungan yiru. Ganjah hi Petrus mamikirni, kawan ulun sa nahuyu daya Kornelius kahaba lewu Simon nelang here haut minri hang hadapan wanawang.

¹⁸Balalu here nerau ulun palus nunti, “Inun hang yiti naan tamu amalem, sa bangaran hi Simon Petrus?”

¹⁹Ganjah hi Petrus magun mamikir inun arati teka paninunganni yiru, Roh Alatalla kaeau ma hanye, “U Petrus, naan telu kaulun rahat ngantara hanyu.

²⁰Hayu hinang inau ma imbe nelang ada ragu-ragu hulu umba here, daya aku sa nunyu here.”

²¹Hi Petrus balalu minau ma imbe palus kaeau ma kawan ulun yiru, “Aku sa naantara daya naun. Naun hawi lepuh inun?”

²²Here nuing, “Kapten Kornelius nunyu kami ma yati. Hanye erang kaulun sa maeh nelang takut ma Alatalla, nelang tuu nahormat daya kawan ulun Yahudi. Erang kaulun malekat Alatalla nunyu hanye laku Tuan hawi ma lewuni, hanye nahuyu nyanrengei inun sa wawara Tuan ma hanye.”

²³Hi Petrus balalu ngendei here amalem hang yiru. Hang kaayat unini hi Petrus ambuan balalu tulak sinrah anri here. Anri papire kaulun sa parisaya teka Yope pada umba.

²⁴Erang anrau udi yiru here hampe hang Kaisarea. Hang yaru here haut naanrei daya Kornelius anri kawan pulaksanaini baya kawan hengauni sa naundang dayani.

²⁵Dami hi Petrus hampe, hi Kornelius tulak nahalu hanye palus ileku hang hadapan hi Petrus.

²⁶Kude hi Petrus ngarawah hanye minri, balalu kaeau, “Ambuan! Aku pada murunsia.”

²⁷Nelang hanye magun bapaner anri hi Kornelius, hi Petrus masuk mawuang lewu. Hang yiru hanye kadinung rama ulun haut bakumpul.

²⁸Hanye kaeau ma here, “Naun raerai karasa kawan ulun Yahudi nauring daya agamani ganta atawa bahubungan anri kawan ulun teka bangsa lain. Kude Alatalla haut nutui ma aku sa aku puang iyuh nganggap hie-hie sa najis atawa haram.

²⁹Yiru sababni tawuk Tuan ilaku nampan aku hawi, aku puang kabaratan hawi. Jadi itati aku hamen karasa wuah inun Tuan ilaku aku hawi.”

³⁰Hi Kornelius nuing, “Telu anrau sa haut paitah, tawuk leu kalayiti, aku rahat badoa hang lewu leu pukul telu kariwe. Salenga naan erang kaulun upu minri hang hadapanku. Pakaian ulun yiru matalak nyahaya.

³¹Hanye kaeau, ‘Kornelius! Alatalla haut narime doanu nelang kaitung pikaeh ateinu.

³²Jadi huyu ulun ma Yope nerau ulun bangaran hi Simon Petrus. Hanye amalem hang lewu erang kaulun tukang kulit sa bangaran hi Simon; lewuni hang pinggir laut.’

³³Yiru sababni aku iwawansit nunyu ulun tulak nerau hanyu. Nelang hanyu tuu maeh atei hamen hawi ma yati. Itati kami katuluh bakumpul hang yiti hang hadapan Alatalla nampan nyanrengei katuluh inun sa nahuyu daya Alatalla sa nawara dayanu ma kami.”

³⁴Balalu Hi Petrus kaeau, “Itati aku tuu-tuu karasa batantu Alatalla puang mambeda katuluh ulun.

³⁵Ulun sa takut ma Alatalla nelang ngulah sa bujur, ulun yiru natarime daya Alatalla puang paduli hanye bangsa awe.

³⁶Pulaksanai katantuluh haut karasa isi kabar sa natahampe Alatalla ma bangsa Israel. Kabar yiru hanyeyiru Kabar Maeh neu pidamai itetei Yesus Kristus, hanyeyiru Tuhan katuluh ulun.

³⁷Naun karasa kewangun kajadian hang litar Yudea, hanyeyiru mulai teka Galilea udi baptisan sa naeau daya Yohanes.

³⁸Naun karasa pada Alatalla haut midi Yesus Kristus ulun Nazaret yiru nelang ngami ma hanye Roh Alatalla anri kuasa. Naun karasa pada Yesus tulak maawe-awe lepuh ngulah ala maeh; hanye nyamare katuluh ulun sa nakuasa daya Iblis, daya Alatalla nyinrah hanye.

³⁹Kami yiti kawan ulun sa haut kadinung raerai katuluh inun sa haut naulahni hang tane ulun Yahudi nelang hang Yerusalem. Kude biar kalayiru here nyalib palus munu hanye.

⁴⁰Kude hang anrau sa katelu Alatalla nyamelum hanye mulek teka pampatei nelang ngalalea hanye ma murunsia;

⁴¹puang ma katuluh ulun, malengkan ekat ma kami sa haut napidi daya Alatalla labis dahulu nampan jari saksini; kami kuman nguut baya hanye udi hanye welum mulek teka pampatei.

⁴²Nelang hanye nunyu kami iwara Kabar Maeh yiru ma ulun katuluh nelang ngami kasaksian hanye bawilah tuu haut naangkat daya Alatalla jari Hakim kawan ulun sa magun welum nelang ma kawan ulun sa haut matei.

⁴³Katuluh kawan nabi iwara neu hanye. Here kaeau himat katuluh ulun sa parisaya ma Yesus, sagar naampun dosani makai kuasa teka Yesus Kristus.”

⁴⁴Ganjah hi Petrus magun bapaner Roh Alatalla minau nelang nguasa kawan ulun sa nyanrengei kabar yiru.

⁴⁵Kawan ulun Yahudi sa parisaya ma Yesus nelang umba hi Petrus teka Yope, katuluhni wauh kadinung Alatalla pada ngami Rohni ma kawan ulun teka bangsa lain sa puang Yahudi.

⁴⁶Daya here karengei kawan ulun yiru bapaner hawuang wahai masam basa nelang nawat nante Alatalla. Balalu hi Petrus kaeau,

⁴⁷“Dinung, kawan ulun yiti haut kaiyuh Roh Alatalla sameh kala takam. Jadi inun tau ulun mahalangi here nampan nabaptis makai ranu?”

⁴⁸Balalu hi Petrus nunyu here nampan nabaptis hawuang ngaran Yesus Kristus. Udi yiru here ilaku nampan hi Petrus muneng baya here papire anrau lawahni.