Read Ma'anyan KESAH KAWAN RASUL 12 Bible Online

KESAH KAWAN RASUL 12 - Ma'anyan bible

KESAH KAWAN RASUL 12

¹Leu hang tawuk yiru pada Raja Herodes mulai nehek nyiksa kawan ulun Kristen.

²Atas parentahni hi Yakobus pulaksanai Yohanes nawunu makai pedang.

³Tawuk hi Herodes kadinung kawan inun sa naulahni yiru ngampi arai kawan ulun Yahudi, hanye ngulah lagi kalayiru; hanye nunyu ulun nyamba hi Petrus pada. Hal yiru natampalus hang tawuk Hari Raya Rote Puang Baragi.

⁴Udi hi Petrus najamba, hanye balalu natamasuk mawuang panjara. Epat regu tantara sa natugas pakai jaga hi Petrus hang yiru tiap regu jumalahni naan epat kaulun tantara. Dami haut tapitah parayaan Paskah, aruai hi Herodes mangadili hi Petrus hang hadapan ulun rama.

⁵Hi Petrus natahan hang panjara; kude kawan ulun Kristen saratang badoa anri sagalis atei ilaku teka Tuhan ma hi Petrus.

⁶Hang malem kapihuan hi Herodes sagar nginsing hi Petrus ma hadapan ulun rama, hi Petrus manre nelang nabalunggu hang helang rueh kaulun tantara pangawal. Hang wanawang panjara, kawan pangawal lain pada rahat jaga panjara.

⁷Salenga malekat Tuhan minri hang yiru balalu naan nyiar sahaya hawuang kamar panjara yiru. Malekat yiru ngagunsang hi Petrus hampe hanye kaelan. Balalu malekat yiru kaeau, “Hayu wansit ambuan!” Tawuk yiru pada rantai jatang sa naan hang tangan Petrus tauka.

⁸Udi yiru malekat yiru kaeau, “Huwe pakaiannu nelang huruk tadi sapatunu.” Hi Petrus balalu nuwe pakaianni nuruk tadi sapatuni. Udiyiru malekat yiru kaeau lagi, “Pakai jubahnu hayu umba aku.”

⁹Hi Petrus balalu naharak malekat yiru kaluar teka panjara. Kude hi Petrus puang karasa inun sa rahat naulah daya malekat yiru kapinuuni kajadian. Hi Petrus minda yiru ekat hang paninunganni.

¹⁰Tawuk yiru here haut mitah panjagaan sa palanungkai anri sa karueh, here hampe ma wanawang jatang, sa nadap ma tumpuk. Wanawang yiru tauka raeraini, balalu here kaluar palus takia mitah lalan rumis. Salenga malekat yiru nanan hi Petrus.

¹¹Udi yiru ariai hi Petrus kataru inun kajadian sa haut wuah hanye, hanye balalu kaeau, “Itati aku karasa himat Tuhan tuu-tuu haut ngirim malekatni nampan napas aku teka kuasa Herodes nelang teka katantuluh inun sa sagar naulah daya bangsa Yahudi ma aku.”

¹²Dami kataru kajadian yiru, hi Petrus tulak ma lewu Maria, ineh Yohanes sa naantuh pada hi Markus. Hang yiru rama ulun bakumpul nelang badoa.

¹³Hi Petrus nalitik wanawang luar balalu erang kaulun palayan wawei bangaran hi Rode, hawi lepuh nguka wanawang.

¹⁴Hanye balalu kataru lengan Petrus. Daya kalayiru araini, hanye iwawansit mulek hampe puang kaitung nguka wanawang, balalu iwara ma ulun rama hang yiru hi Petrus naan hang luar.

¹⁵“Hanyu rapui!” eau here. Kude hi Rode bajuju kaeau hanyeyiru tuu-tuu hi Petrus. Balalu here kaeau, “Yiru malekatni!”

¹⁶Hentek yiru hi Petrus magun nalitik wanawang. Here balalu nguka wanawang palus kadinung hi Petrus, here wauh tatuu.

¹⁷Hi Petrus ngami tanda makai tanganni nampan here suni, udi yiru hanye balalu nyarita kewangun Tuhan haut nginsing hanye kaluar teka panjara. Hanye balalu kaeau, “Wara ma hi Yakobus anri kawan pulaksanai sa lainni pada.” Udiyiru hi Petrus balalu nanan unengan yiru tulak ma unengan sa lain.

¹⁸Hang kaayat uni kawan tantara pangawal geger. Here bingung neu kawan kajadian anri hi Petrus.

¹⁹Hi Herodes balalu nunyu ulun ngantara hi Petrus, kude here puang tau kahaba hanye. Hi Herodes balalu marentah nampan kawan tantara pangawal yiru natunti balalu nawunu. Udi yiru hi Herodes tulak teka Yudea balalu muneng papire lawah hang Kaisarea.

²⁰Hi Herodes sangit tatuu ma kawan ulun Tirus anri Sidon. Daya yiru here sinrah-sinrah hawi mangadap hi Herodes. Mulani here ngatau hi Blastus, sa ngapala istana Herodes, hampe hanye umba teka here. Udi hie here tulak mangadap hi Herodes, here balalu ilaku badamai, daya wilayah here kawan anakuta numba mihanri hang wilayah Raja Herodes.

²¹Hang hinra anrau sa haut natukas, hi Herodes makai pakaian kabesaranni maharung hang karusi karajaan balalu mulai bapidato hang hadapan rakyat.

²²Kawan rakyat sa rahat nyanrengei yiru basurak nelang kaeau, “Iti lengan dewa, puang lengan murunsia!”

²³Hang tawuk yiru pada malekat Tuhan nampar hi Herodes, daya hanye puang mahormat Alatalla. Hi Herodes kuta sasing balalu matei.

²⁴Maka firman Tuhan magin tayap nelang magin mansing.

²⁵Udi hi Barnabas anri hi Saulus nyanuput tugas here, here mulek teka Yerusalem nelang nginsing hi Yohanes Markus baya here.