Read Ma'anyan KESAH KAWAN RASUL 13 Bible Online

KESAH KAWAN RASUL 13 - Ma'anyan bible

KESAH KAWAN RASUL 13

¹Hawuang ungkup Antiokhia naan papire nabi anri guru, hanyeyiru hi Barnabas, hi Simeon sa naantuh si Hitam, hi Lukius teka Kirene, hi Menahem sa napalihara mira anri Raja Herodes anri hi Saulus.

²Tawuk here rahat sumbayang ma Tuhan nelang puasa, Roh Alatalla kaeau ma here, “Pidileh hi Barnabas anri hi Saulus hulung ma aku, nampan here nampalus pagawian sa haut naamiku ma here.”

³Udi puasa nelang badoa here hanrapak tangan here hang ambau hi Barnabas anri hi Saulus balalu ngutus here rueh.

⁴Daya nautus Roh Alatalla, hi Barnabas anri hi Saulus tulak ma Seleukia. Teka yaru here balayar ma pulau Siprus.

⁵Tawuk hampe Salamis, here iwara lengan Alatalla hang kawan lewu sumbayang Yahudi. Hi Yohanes Markus mambantu here hang pakiaan here.

⁶Litar pulau yiru nakia here hampe ma Pafos. Hang yaru here panalu ulun Yahudi bangaran hi Bar Yesus. Hanye erang kaulun tukang sihir sa mangaku dirini nabi.

⁷Hi Sergius Paulus, gubernur pulau yiru hanye hengau akrab tukang sihir yiru. Gubernur yiru erang kaulun pintar nelang bijaksana. Hanye nerau hi Barnabas anri hi Saulus daya hanye hamen karengei lengan Alatalla.

⁸Kude hi Barnabas anri hi Saulus nalawan daya hi Elimas ahli sihir yiru, daya hi Elimas (ngaranni hawuang basa Yunani) ngulah akal nampan gubernur yiru ada hampe parisaya ma Yesus.

⁹Kude hi Saulus-sa naantuh pada hi Paulus-nakuasa daya Roh Alatalla, hanye maneneng ahli sihir yiru,

¹⁰balalu kaeau, “U ulun panipu sa andal, anak jahanam! Hanyu musuh kawan pikaeh. Wuah inun hanyu puang hamen taduh nanrusak ransana Alatalla neu nyalamat murunsia?

¹¹Itati dinung Tuhan sagar nukum hanyu! Hanyu sagar pehe, hampe hanyu puang kaiyuh kadinung sahaya mate anrau lagi ma papire lawahni.” Tawuk yiru pada hi Elimas kaingkam naan awan maintem! nutup mateini, hampe hanye takia bahahar ngantara ulun pakai nganyak hanye.

¹²Dami gubernur yiru kadinung kajadian yiru, hanye parisaya ma Yesus; hanye mandam daya ajaran neu Tuhan.

¹³Teka Pafos, hi Paulus anri kawan hengauni balayar ma Perga hang Pamfilia. Hang yiru hi Yohanes Markus nanan here, balalu mulek ma Yerusalem.

¹⁴Teka Perga here nampalus pakiaan ma Antiokhia hang Pisidia, dami hang anrau Sabat here tulak maharung hang lewu sumbayang.

¹⁵Udi Buku Moses anri Buku Kawan-nabi nabasa, kawan pamimpin lewu sumbayang yiru nunyu ulun itunti ma hi Paulus anri kawan hengauni, “Pulaksanai katuluh, amun naan nasehat naun ma kawan ulun yiti, hayu tahampe nasehat yiru.”

¹⁶Hi Paulus balalu minri, hanye ngami tanda makai tanganni, udi hie balalu kaeau, “Kawan pulaksanaiku bangsa Israel anri katuluh pulaksanaiku bangsa sa lainni sa ngalut nuu ma Alatalla! Suba rengei eauku:

¹⁷Alatalla bangsa Israel haut midi datu nini takam, balalu ngulah bangsa yiti jari bangsa sa hante tawuk here muneng hang Mesir kala ulun asing. Kamulek anri kuasa sa hante Alatalla nginsing here kaluar teka Mesir.

¹⁸Hanye basabar anri kawan tingkah laku here hang padang gurun epat pulu taun lawahni.

¹⁹Pitu bangsa haut nasamawaini hang tane Kanaan nampan magi tane yiru ma bangsa Israel nampan tane yiru jari milik here.

²⁰Katuluh yiru natampalus salawah epat jatuh dimempulu taun lawahni. Udi tane Kanaan yiru nabagi, Alatalla ngami ma here kawan hakim. Hakim sa pijumpuhanni hanyeyiru Nabi Samuel.

²¹Kamulek here ilaku erang kaulun raja. Alatalla ngami ma here hi Saul anak Kis teka suku bangsa Benyamin neu jari raja here salawah epat pulu taun.

²²Udi Alatalla ngidar hanye teka kadudukanni, Alatalla ngangkat lagi hi Dawid jari Raja ma here. Nelang kalayiti sa naeau Alatalla neu hi Dawid, ‘Aku haut kahaba hi Dawid anak Isai yiru erang kaulun sa ngampi sanang ateiku. Hanye ulun sa sagar nampalus kabahumenku.’

²³Teka katurunan Dawid yiru Alatalla nyadia ma bangsa Israel erang kaulun Raja Panyalamat, kala sa haut najanjini. Raja Panyalamat yiru hanyeyiru Yesus.

²⁴Kapihuan Yesus mulai nampalus tugasni hi Yohanes haut iwara ma kawan ulun Israel nampan here batobat teka kawan dosa here nelang nabaptis.

²⁵Dami haut tiba pijumpuhan pagawianni, hi Yohanes kaeau ma ulun rama, ‘Hie aku yiti eau naun? Aku puang ulun sa naanrei daya naun. Itung, ulun yiru sagar hawi udi aku; pakai nguka tadi sapatuni aku sika puang patut.’

²⁶Pulaksanai katuluh katurunan Abraham nelang katuluh naun sa lainni hang yiti sa ngalut nuu ma Alatalla! Alatalla haut ngirim ma takam kabar salamat yiru;

²⁷daya kawan ulun sa muneng hang Yerusalem anri kawan pamimpin here puang karasa sa hanye panyalamat yiru. Here puang kataru ajaran kawan nabi sa nabasa hang tiap anrau Sabat, hampe here nukum Yesus. Kude satuuni anri nampalus kalayiru, here ngulah inun sa haut natujum daya kawan nabi yiru tulus.

²⁸Biar here puang kahaba sunah butit kahalaen hang hanye hampe hanye patut nahukum makai hukuman mati, kude here ilaku anri hi Pilatus nampan hanye nawunu.

²⁹Dami udi here jumpuh nampalus katuluh inun sa haut nasurat hang Surat Barasis neu hanye, here ngampinau bangkaini teka kayu balasangar, balalu ngelah hanye hawuang pasaran.

³⁰Kude Alatalla nyamelum hanye teka pampatei.

³¹Kamulek baanrau-anrau lawahni hanye hawi nantarang tengani ma kawan ulun sa haut umba hanye teka Galilea ma Yerusalem. Here yiru sa itati jari kawan saksini ma bangsa Israel.

³²Jadi, itati kami nampe Kabar Maeh yiru ma naun: Inun sa haut najanji Alatalla ma datu nini takam,

³³yiru haut natampalus dayani ma takam anri nyamelum Yesus mulek teka pampatei. Daya hang Mazmur sa karueh naan nasurat, ‘Hanyu Anakku, hang anrau yiti aku haut jari Ambahnu.’

³⁴Alatalla haut nyamelum hanye mulek teka pampatei. Itati hanye puang lagi sagar kaingkam pampatei hawuang pasaran. Neu hal yiru Alatalla kaeau, ‘Aku sagar ngami ma hanyu janji barasis sa himat sagar natampalus, sa haut najanjiku anri hi Dawid.’

³⁵Kalayiru pada hang ayat sa lain naantuh, ‘Hanyu puang sagar maladar walahnu sa satia yiru buruk hang pasaran.’

³⁶Hi Dawid haut matei nelang napasar pada baya anri datu ninini, udi hanye nampalus inun sa nahuyu daya Alatalla hanye nampalusni. Bangkai Dawid haut galis hansur katuluhni.

³⁷Kude Yesus, sa nasamelum mulek daya Alatalla teka pampatei, Yesus yiru puang galis hansur.

³⁸Daya yiru pulaksanai katuluh, harus naun karasa anri itetei Yesus yiti kabar neu pangampunan dosa nawara ma naun; naun harus karasa batantu tiap ulun sa parisaya ma hanye, naempas teka kawan dosa sa puang tau napuhut itetei kawan parentah Alatalla sa natahampe daya Moses.

³⁹

⁴⁰Yiru sababni naun harus mantaru mamaeh, ada hampe wuah naun kala sa naeau daya kawan nabi yiti,

⁴¹‘Pantaru mamaeh, u naun kawan ulun sa sindi mahina! Naun sagar wauh, balalu matei! Daya hang jaman yiti aku rahat nampalus pagawian sa naun raerai puang sagar parisaya, biar naan ulun sa manarangni ma naun.’ ”

⁴²Tawuk hi Paulus anri hi Barnabas nanan lewu sumbayang yiru, kawan ulun hang lewu sumbayang yiru ilaku nampan here mulek lagi hang anrau Sabat sa hanrian, nampan manarang lagi neu kawan hal yiru.

⁴³Udi kawan ulun kaluar teka lewu sumbayang yiru, hi Paulus anri hi Barnabas nataharak daya rama kawan ulun Yahudi anri ulun teka bangsa lain sa haut masuk agama Yahudi. Balalu kawan rasul yiru ngami nasehat ma here nampan here tatap welum hawuang ahi lelo Alatalla.

⁴⁴Hang anrau Sabat hanrianni, bilang katuluh ulun hang tumpuk yiru hawi nyanrengei lengan Tuhan.

⁴⁵Tawuk kawan ulun Yahudi kadinung kawan ulun rama yiru, here tuu muar. Here mahina hi Paulus nelang nawan katuluh inun sa naeauni.

⁴⁶Kude hi Paulus anri hi Barnabas magin batambah heei lagi bapaner tarang tarus here kaeau, “Lengan Alatalla samula harus natahampe ma naun dahulu. Kude daya naun puang hamen narimeni, naun haut nukas raerai sa naun puang patut narime pamelum sajati palus makalalawah. Balalu itati kami nanan naun tulak ma bangsa lain.

⁴⁷Daya Tuhan haut ngami parentah ma kami; Tuhan kaeau, ‘Aku haut nukas naun jari isa piraai ma kawan bangsa lain sa puang Yahudi, nampan naun nginsing kesalamatan ma litar dunia.’ ”

⁴⁸Tawuk yiru kawan ulun teka bangsa lain sa puang Yahudi karengei hal yiru, here tuu sanang, balalu nawat lengan Alatalla. Nelang kawan ulun sa haut natukas daya Alatalla nampan kaiyuh pamelum sajati palus ma kalalawah, here yiru parisaya.

⁴⁹Lengan Tuhan balalu tayap maawe-awe hang litar daerah yiru.

⁵⁰Kude kawan pambesar hang tumpuk yiru anri kawan wawei teka golongan sa ambau sa takut ma Alatalla, natantiring daya kawan ulun Yahudi. Here mamusuhi hi Paulus anri hi Barnabas balalu ngusir here rueh kaluar teka daerah yiru.

⁵¹Balalu kawan rasul yiru mapau ngebas pee here hang hadapan ulun rama yiru neu paringatan, balalu tulak ma Ikonium.

⁵²Kawan ulun sa umba Yesus hang Antiokhia arai tatuu nelang nakuasa daya Roh Alatalla.