Read Ma'anyan KESAH KAWAN RASUL 14 Bible Online

KESAH KAWAN RASUL 14 - Ma'anyan bible

KESAH KAWAN RASUL 14

¹Hi Paulus anri hi Barnabas kaingkam wuah hal sa sameh hang Ikonium. Here pada tulak ma lewu sumbayang Yahudi balalu bapaner bahimat hang yaru hampe rama ulun Yahudi anri ulun sa puang Yahudi parisaya ma Yesus.

²Kude kawan ulun Yahudi sa puang hamen parisaya, nantiring kawan ulun sa puang Yahudi, hampe here balalu muar ma kawan ulun sa parisaya ma Yesus.

³Daya yiru hi Paulus anri hi Barnabas muneng lawah hang yiru. Nelang anri heei here bapaner neu Tuhan. Balalu Tuhan pada ngami bukti sa kabar nawara here neu ahi leloni yiru tuu; hanye ngami ma here kuasa nampan here tau ngulah kawan kaajaiban anri kawan hal sa luar biasa.

⁴Kude panduduk hang tumpuk yiru puang sameh pandapat; naan sa umba teka kawan ulun Yahudi nelang naan sa umba teka kawan rasul yiru.

⁵Balalu kawan ulun Yahudi anri kawan pamimpin here baya anri kawan ulun sa puang Yahudi mira pakat nampan nyiksa nelang medak kawan rasul yiru makai watu.

⁶Kude kawan rasul yiru karasa neu galagat yiru, here balalu basingkir ma Listra anri Derbe, hanyeyiru kawan tumpuk hang Likaonia, anri daerah sakitarni.

⁷Hang yaru here iwara lagi Kabar Maeh yiru.

⁸Hang Listra naan erang kaulun upu peeni lumpuh teka kalemah nakayaan, hampe hanye puang suah kaiyuh takia, daya peeni maleme.

⁹Ulun yiru maharung hang yaru nyanrengei hi Paulus bapaner. Hi Paulus kadinung ulun yiru parisaya balalu daya yiru hanye tau nasamare. Hi Paulus maneneng hanye

¹⁰balalu anri lengan mehet hi Paulus kaeau, “Minri wawitu!” Ulun yiru nanturak balalu takia.

¹¹Tawuk kawan ulun rama kadinung inun sa haut naulah daya Paulus, here nantiak hawuang basa Likaonia, “Kawan dewa haut minau ma dunia kalawangun tenga murunsia.”

¹²Hi Barnabas ampungaran here Zeus, nelang hi Paulus ampungaran here Hermes, daya hanye sa bapaner.

¹³Imam dewa Zeus, sa kuilni naan hang hadapan tumpuk, hawi nginsing kawan sapi upu anri kawan wunge ma pintu gerbang tumpuk. Hanye ngunu umba baya kawan ulun rama yiru nyarah parapah ma kawan rasul yiru.

¹⁴Dami hi Barnabas anri hi Paulus karengei inun sa naulah daya ulun yiru, here ngirah pakaian here nelang nempat hang penah ulun rama yiru, balalu kaeau anri lengan mehet,

¹⁵“Wuah inun naun ngulah kalayiti? Kami yiti murunsia sameh kala naun pada! Kami naan hang yiti neu iwara Kabar Maeh ma naun nampan naun katuluh nanan kawan hal sa puang bariran yiti nelang hawi nunung Alatalla sa welum, sa haut ngulah langit anri tane anri laut nelang katuluh inun sa naan hawuangni.

¹⁶Hang wayah sa haut paitah Alatalla maladar kawan bangsa welum manurut aheng here raerai.

¹⁷Kude hanye puang wewung ngami bukti neu dirini, hanyeyiru ngulah pikaeh. Hanye ngami ma naun uran teka langit anri hasil tane hang musimni. Hanye ngami kutaen ma naun anri ngampi sanang atei naun.”

¹⁸Kude anri kawan lengan yiru, sika magun mahadin kawan rasul yiru nahalang kawan ulun yiru nyarah parapah ma here.

¹⁹Papire kaulun Yahudi sa hawi ma Listra teka Antiokhia hang Pisidia nelang Ikonium nantiring kawan ulun rama yiru nampan umba teka here. Here medak hi Paulus makai watu balalu nyujut hanye maluar tumpuk. Here minda hanye haut matei,

²⁰kude tawuk kawan ulun sa parisaya yiru minri ngaliling hanye, hanye ambuan balalu masuk lagi mawuang tumpuk. Keatuni anrauni hanye tulak ma Derbe baya anri hi Barnabas.

²¹Hang Derbe hi Paulus anri hi Barnabas iwara Kabar Maeh yiru nelang rama ulun balalu parisaya ma Yesus. Udi yiru here balalu mulek ma Listra, udiyiru ma Ikonium, balalu ma Antiokhia hang Pisidia.

²²Hang kawan tumpuk yiru here ngampi kansing kawan ulun sa umba Yesus nelang ngami nasehat nampan kawan ulun sa umba yiru rantep parisaya ma Yesus. “Takam harus wahai wuah kahanangen dahulu, aruai takam kaingkam kasanangen hang Dunia Wau Wat Alatalla,” yiru sa naajar kawan rasul ma kawan ulun sa umba Yesus hang kawan tumpuk yiru.

²³Nelang hang tiap ungkup, hi Paulus anri hi Barnabas ngangkat kawan pamimpin pakai mamimpin kawan ungkup yiru. Balalu anri badoa nelang puasa here nyarah kawan pamimpin yiru ma Tuhan sa naparisaya here yiru.

²⁴Udi yiru hi Paulus anri hi Barnabas nampalus pakiaan here mitah daerah Pisidia palus hampe ma Pamfilia.

²⁵Dami udi here iwara lengan Alatalla hang Perga, here tulak ma Atalia.

²⁶Teka yaru here balayar mulek ma Antiokhia. Hang tumpuk yiru unengan here tawuk hie nasarah ma ahi lelo Alatalla, nampan here ngulah pagawian sa itati rahat natampalus daya here.

²⁷Tawuk hampe hang Antiokhia, here ngumpul kawan ulun teka ungkup yiru, balalu here nyarita katantuluh inun sa haut naulah Alatalla itetei here. Here nyarita pada kewangun Alatalla haut nguka lalan nampan kawan ulun sa puang Yahudi parisaya ma Yesus.

²⁸Hang tumpuk yiru hi Paulus anri hi Barnabas muneng lawah baya kawan ulun parisaya.