Read Ma'anyan KESAH KAWAN RASUL 16 Bible Online

KESAH KAWAN RASUL 16 - Ma'anyan bible

KESAH KAWAN RASUL 16

¹Hi Paulus nampalus pakiaan here ma Derbe, udiyiru ma Listra. Hang yaru naan erang kaulun ulun sa umba Yesus bangaran hi Timotius. Inehni erang kaulun Yahudi sa haut parisaya ma Yesus; kude ambahni ulun Yunani.

²Hang penah kawan ulun parisaya sa muneng hang Listra anri Ikonium, hi Timotius haut taru ulun erang kaulun sa maeh.

³Hi Paulus hamen nampan hi Timotius umba baya hanye. Daya yiru hanye nyunat hi Timotius. Hanye ngulah kalayiru daya kawan ulun Yahudi hang daerah yiru karasa sa ambah wat Timotius ulun Yunani.

⁴Hang tiap tumpuk sa naganta daya here, here nampe ma kawan ulun sa parisaya kawan kaputusan sa haut natukas daya kawan rasul baya kawan pamimpin hang Yerusalem. Here ngami nasehat ma kawan pulaksanai sa haut parisaya yiru nampan nampalus kawan aturan yiru.

⁵Balalu kawan ungkup yiru batambah mansing hawuang iman here, nelang tiap anrau magin batambah rama jumalahni.

⁶Roh Alatalla puang kalewa hi Paulus anri hi Silas iwara lengan Alatalla ma propinsi hang Asia. Jadi pakiaan here natampalus ma daerah Prigia anri Galatia.

⁷Tawuk hampe parbatasan Misia, here mansuba masuk ma propinsi Bitinia, kude Roh Yesus nguring here ma yaru.

⁸Jadi here mitah Misia balalu palus ma Troas.

⁹Malemni, hang Troas, hi Paulus kadinung isa paninungan. Hang wuang paninungan yiru hanye kadinung erang kaulun Makedonia minri hang hadapanni nelang ilaku tatuu nampan hanye tulak ma Makedonia nampan ngarawah here.

¹⁰Udi hi Paulus kaiyuh paninungan yiru, kami balalu batatap neu tulak ma Makedonia. Karana anri yakin kami ngalap kasimpulan himat Alatalla nunyu kami iwara Kabar Maeh yiru ma kawan ulun hang yaru.

¹¹Kami nanan Troas balalu balayar palus ma Samotrake, hang anrau keatunini ma Neapolis.

¹²Teka yiru kami ma Pilipi, tumpuk hang wilayah palanungkai Makedonia. Pilipi jajahan karajaan Roma. Hang yaru kami muneng papire anrau.

¹³Hang anrau Sabat kami tulak ma pingir hungei hang luar pintu gerbang tumpuk, daya kami karasa hang yaru naan unengan sumbayang ma ulun Yahudi. Balalu kami maharung bapaner anri kawan wawei sa bakumpul hang unengan yiru.

¹⁴Erang kaulun teka here padagang kain ungu, ngaranni hi Lidia nelang asalni teka Tiatira. Hanye sinta ma Alatalla, balalu Tuhan manggarak ateini nampan hanye narime inun sa naajar daya Paulus ma hanye.

¹⁵Hi Lidia anri katuluh ulun hang lewuni nabaptis. Udi nabaptis hanye nerau kami. Hanye kaeau, “Amun naun kaingkam aku ulun sa tuu-tuu haut parisaya ma Yesus, hayu amalem hang lewuku.” Balalu hanye nganauneh nampan kami narime pilakuanni.

¹⁶Hang hinra anrau tawuk kami rahat takia ma unengan badoa, kami panalu anri erang kaulun wawei; hanye erang kaulun walah. Wawei yiru nakuasa daya roh jahat sa tau maramal kawan kejadian sa sagar jari hanrian anrau. Anri maramal nasib ulun, wawai yiru kaiyuh kauntungan sa hante ma kawan majikanni.

¹⁷Wawai yiru santar ngapung hi Paulus anri kami nelang kaeau, “Kawan ulun yiti walah wat Alatalla! Here hawi lepuh iwara manaun kewangun sarani naun kaiyuh salamat!”

¹⁸Papire anrau lawahni wawei yiru saratang ngulah kalayiru. Hi Paulus wawai kasabarenni, hanye ikulik balalu kaeau ma roh yiru, “Hawuang ngaran Yesus Kristus aku nunyu hanyu kaluar teka wawei yiti!” Tawuk yiru pada roh yiru kaluar balalu nanan wawei yiru.

¹⁹Tawuk kawan majikanni karasa kawan sara here nampan kaiyuh duit haut wawai, here nyamba hi Paulus anri hi Silas, balalu nginsing here rueh ma alun-alun mangadap ulun sa bawajib.

²⁰Here ngampi hadap hi Paulus anri hi Silas ma kawan pejabat pemerintah Roma, balalu kaeau: “Kawan ulun yiti ulun Yahudi. Here ngasasaur tumpuk takam.

²¹Here nunyu ulun nampalus adat kabiasaan sa balawanan anri hukum takam, ulun Roma. Takam puang tau narime atawa umba adat kabiasaan yiru!”

²²Kawan ulun rama pada umba manyarang hi Paulus anri hi Silas; balalu kawan pajabat pamarentah ngirah pakaian teka tenga karueh rasul yiru balalu nunyu ulun ngakasah kararueh here.

²³Udi here bahimat nakakasah, here natamasuk mawuang panjara. Kapala panjara nahuyu jaga here bahimat.

²⁴Daya parentah yiru kapala panjara nahan here hawuang kamar panjara sa hang penah, balalu manga pee here makai balunggu.

²⁵Leu penah malem hi Paulus anri hi Silas rahat badoa anri manyanyi kawan tawat ma Alatalla. Kawan ulun tahanan sa lain pada rahat nyanrengei here manyanyi.

²⁶Salenga hawi gempa bumi sa tamam, hampe panjara yiru gaguyuh. Katuluh wanawang panjara uras tauka nelang kawan rantai anri balunggu kawan tahanan uras talapas.

²⁷Kapala panjara yiru embah pulus ambuan. Dami hanye kadinung kawan wanawang panjara uras tauka, hanye nyintak pedangni kai mitu daya hanye minda kawan tahanan haut uras rari.

²⁸Kude hi Paulus anri lengan mehet kaeau, “Ada munu tenganu! Kami katuluh naan hang yiti!”

²⁹Kapala panjara yiru laku palita balalu nempat masuk ma wuang, nelang neter hanye ileku hang hadapan Paulus anri hi Silas.

³⁰Udi hie hanye nginsing here kaluar balalu kaeau, “Tuan-tuan, inun sa harus naulahku nampan aku nasalamat?”

³¹Hi Paulus anri hi Silas nuing, “Parisayaleh ma Tuhan Yesus! Hanyu sagar nasalamat-hanyu baya katuluh ulun sa naan hang wuang lewunu!”

³²Balalu hi Paulus anri hi Silas manarang lengan Tuhan ma kapala panjara yiru anri ma katuluh ulun sa naan hawuang lewuni.

³³Hang penah malem yiru pada, kapala panjara yiru nginsing here balalu ngabarasis kawan batan here. Balalu hanye baya katuluh ulun sa naan hang lewuni palus nabaptis.

³⁴Udi hie hanye nginsing hi Paulus anri hi Silas ma lewuni balalu nyarungan makuta ma here; Hanye anri katuluh kaluwargani tuu arai daya here itati parisaya ma Alatalla.

³⁵Hang anrau kaiyat unini, kawan pajabat pamerentah Roma ngutus polisi ma panjara neu nampe parentah nampan hi Paulus anri hi Silas nalapas.

³⁶Kapala panjara iwara neu hal yiru ma hi Paulus. Hanye kaeau, “Tuan-tuan, pajabat pamarentah haut ngami parentah nampan napas naun. Itati naun iyuh mudi. Salamat jalan!”

³⁷Kude hi Paulus kaeau ma kawan patugas polisi yiru, “Kami warga negara Roma. Puang lagi naadili kami haut nakakasah hang hadapan umum nelang natamasuk mawuang panjara. Kude itati here nunyu kami tulak anri suni-suni? Kami puang hakun! Huyu kawan pajabat pamarentah yiru hawi raerai ma yiti lepuh napas kami.”

³⁸Kawan patugas polisi yiru balalu malapor hal yiru ma kawan pajabat pamarentah Roma. Tawuk kawan pajabat yiru karengei sa hi Paulus anri hi Silas warga nagara Roma, here balalu takut.

³⁹Here balalu tulak ilaku maaf teka hi Paulus anri hi Silas, udiyiru ngatet here rueh kaluar teka panjara, balalu ilaku nampan here tulak teka tumpuk yiru.

⁴⁰Hi Paulus anri hi Silas nanan panjara yiru balalu tulak ma lewu Lidia. Udi panalu kawan ulun sa parisaya hang yiru, nelang ngami samangat ma here, hi Paulus anri hi Silas balalu tulak.