Read Ma'anyan KESAH KAWAN RASUL 17 Bible Online

KESAH KAWAN RASUL 17 - Ma'anyan bible

KESAH KAWAN RASUL 17

¹Hi Paulus anri hi Silas nampalus pakiaan here mitah Amfipolis anri Apolonia balalu hampe hang Tesalonika. Hang yaru naan lewu sumbayang ulun Yahudi.

²Hi Paulus balalu tulak ma lewu sumbayang yiru-kala biasa naulahni amun naan lewu sumbayang ulun Yahudi-balalu bapaner anri ulun sa naan hang yaru neu kawan ayat Surat Barasis. Hanye ngulah kalayiru batitir hang telu anrau Sabat.

³Itetei kawan ayat Surat Barasis hanye manarang nelang ngami kasaksian neu Raja Panyalamat sa najanji Alatalla parlu kaingkam kahanangen nelang welum kamulek teka pampatei. “Yesus sa nawaraku ma naun, hanyeyiru Raja Panyalamat sa haut najanji,” eau Paulus.

⁴Papire kaulun balalu parisaya palus umba hi Paulus anri hi Silas; kalayiru pada rama tuu kawan ulun Yunani takut ma Alatalla nelang rama lagi kawan wawei terkemuka.

⁵Kude kawan ulun Yahudi muar. Here nerau kawan ulun galandangan hang kawan lalan neu jari garombolan ngulah huru hara. Balalu here ngulah deruh litar tumpuk palus manyarang lewu Yason lepuh ngantara hi Paulus anri hi Silas, here hamen nginsing hi Paulus anri hi Silas kaluar nadap kawan ulun rama.

⁶Kude tawuk here puang kahaba hi Paulus anri hi Silas, here nyujut hi Yason anri papire kaulun ulun parisaya lainni ma hadapan kawan pajabat sa bakuasa hang tumpuk yiru. Here anri lengan mehet kaeau, “Kawan ulun yiti ngulah rawek hang awe-awe! Itati tumpuk takam pada natunung daya here,

⁷nelang hi Yason haut narime here hang lewuni. Here katuluh malangar kawan katantuan Kaisar Roma, daya here kaeau himat naan lagi Raja lain sa bangaran Yesus.”

⁸Anri kaeau kalayiru here ngulah rama ulun baya kawan panguasa hang tumpuk yiru balalu geger giruh.

⁹Balalu kawan panguasa yiru nunyu hi Yason anri kawan ulun sa parisaya lainni yiru bayar duit jaminan. Udiyiru aruai here nalapas.

¹⁰Malem yiru kawan ulun sa parisaya hang tumpuk yiru nunyu hi Paulus anri hi Silas tulak ma Berea. Dami hampe yaru hi Paulus anri hi Silas tulak ma lewu sumbayang ulun Yahudi.

¹¹Kawan ulun hang Berea labis tauka atei here teka kawan ulun hang Tesalonika. Anri sanang atei here nyanrengei kabar neu Yesus, nelang tiap anrau here mantaru Surat Barasis nampan karasa inun sa naajar Paulus yiru bujur.

¹²Rama teka here balalu parisaya ma Yesus nelang puang butit pada kawan ulun Yunani terkemuka, sa parisaya, hau upu atawa wawei.

¹³Tawuk kawan ulun Yahudi hang Tesalonika karengei hi Paulus iwara lengan Alatalla hang Berea here pada hawi ma Berea balalu ngajahujak marebe hampe kawan ulun hang yaru galisah.

¹⁴Hinang kawan ulun parisaya hang Berea yiru ngatet hi Paulus ma pantai, kude hi Silas anri hi Timotius tatap muneng hawuang tumpuk yiru.

¹⁵Udi ngatet hi Paulus hampe ma Atena, here yiru balalu mulek ma Berea anri nginsing pesen teka hi Paulus nampe hi Silas anri hi Timotius nampan here ngapung hanye anri hinang.

¹⁶Padingian hi Paulus ngarei hi Silas anri hi Timotius hang Atena, ateini tuu mahanang kadinung tumpuk yiru penu anri kawan barhala.

¹⁷Daya yiru hang lewu sumbayang hi Paulus bapaner anri kawan ulun Yahudi baya kawan ulun lain sa nyambah Alatalla hang yiru. Kalayiru pada hang kawan pasar tiap anrau hanye bapaner anri kawan ulun sa naan hang yaru.

¹⁸Kawan guru aliran Epikuros anri aliran Stoa pada basual anri hanye. Papire teka here kaeau, “Inun pangarasaen ulun yiti? Pangatahuanni butit kude hanye wahai wawa!” Papire sa lain kaeau, “Wangunni hanye iwara kawan dewa teka bangsa lain.” Here kaeau kalayiru daya hi Paulus bapaner neu Yesus nelang neu welum mulek teka pampatei.

¹⁹Balalu here nginsing hi Paulus ma unengan bakumpul hang Bukit Areopagus. Hang yaru here kaeau ma hanye, “Kami hamen karasa pangajaran wau sa nawara dayanu yiru.

²⁰Daya hanyu iwara neu kawan hal sa maka wawauh ma panrengeian silu kami. Daya yiru kami hamen karasa inun aratini.” (

²¹Daya katuluh ulun Atena anri kawan ulun asing sa muneng hang yiru katuju tuu nangalis anrau malem here neu pakai bapaner anri nyanrengei kawan hal sa wau.)

²²Tawuk yiru hi Paulus minri hang hadapan kawan ulun sa bakumpul hang Aeropagus yiru, hi Paulus kaeau, “U kawan ulun Atena! Aku lentah kadinung hawuang katuluh hal naun tuu baagama.

²³Daya tawuk aku pasiar ngaliling tumpuk naun nelang ninung kawan unengan sumbayang naun, aku kadinung pada naan isa unengan nyarah parapah; hang unengan yiru naan nasurat, ‘Ma Alatalla Sa Puang Taru.’ Nah, Alatalla sa nasambah naun kude naun puang kataru hie hanye, hanyeyiru sa nawarku ma naun.

²⁴Alatalla sa ngulah dunia yiti anri katuluh hawuangni, hanye Tuhan langit nelang tane. Hanye puang muneng hawuang kawan lewu dewa sa naulah daya murunsia.

²⁵Hanye pada puang parlu karawahen murunsia, daya hanye sa ngami pamelum anri hewuk nelang kawan ala katantuluh ma murunsia.

²⁶Teka erang kaulun murunsia hanye ngulah katuluh bangsa nelang nunyu here muneng hang litar dunia. Hanye pada sa nukas teka asalni hentek awe nelang hang awe here iyuh welum.

²⁷Alatalla ngulah kalayiru nampan here ngantara hanye. Mudah-mudahan here panalu hanye tawuk here ngantara hanye. Kude satuuni Alatalla puang lawit teka takam katantuluh.

²⁸Kala sa naeau eau daya ulun, ‘Takam welum nelang bagarak nelang naan hang dunia yena daya kuasani.’ Sameh pada anri sa naeau daya papire panyair naun. Here kaeau, ‘Takam katuluh samula kawan anakni.’

²⁹Nah, daya takam samula kawan anak Alatalla, takam puang iyuh nganggap Alatalla sameh anri ampatung teka amas atawa perak atawa watu sa naulah manyu kapandaien murunsia.

³⁰Wayah kalungaen takam yiru haut puang naitung lagi daya Alatalla, kude itati hanye nunyu katuluh ulun hang dunia yiti nampan batobat teka kawan dosa here.

³¹Daya hanye haut nukas die hang hinra tawuk sagar mangadili katuluh dunia yiti anri adil. Tugas yiru sagar natampalus daya erang kaulun sa haut napidi daya Alatalla neu yiru. Nelang nampan katuluh ulun yakin neu hal yiru, Alatalla haut nyamelum mulek ulun yiru teka pampatei!”

³²Tawuk kawan ulun yiru karengei neu welum mulek teka pampatei, naan teka here sa kakihi ngasese hi Paulus. Naan pada sa kaeau, “Kami hamen hanyu bapaner lagi neu hal yiru.”

³³Hi Paulus balalu nanan kumpulan yiru.

³⁴Kude naan teka here sa umba teka hi Paulus nelang parisaya ma Yesus, hanyeyiru hi Dionisius anggota Majelis Areopagus, anri erang kaulun wawei bangaran hi Damaris nelang papire kaulun lagi.