Read Ma'anyan KESAH KAWAN RASUL 18 Bible Online

KESAH KAWAN RASUL 18 - Ma'anyan bible

KESAH KAWAN RASUL 18

¹Udi yiru hi Paulus nanan Atena tulak ma Korintus.

²Hang yiru hanye panalu erang kaulun Yahudi bangaran hi Akwila asalni teka negeri Pontus. Hi Akwila wau tuu hawi teka Italia baya matueh waweini hi Priskila. Here hawi ma Korintus daya Kaisar Klaudius haut nunyu kawan ulun Yahudi kaluar teka Roma. Hi Paulus tulak ganta here rueh,

³balalu muneng hang yiru baya here nelang bagawi baya here, daya mata pancaharian here sameh anri hi Paulus, hanyeyiru tukang ngulah kemah.

⁴Kude hang tiap anrau Sabat, hi Paulus tulak lepuh bapaner hang lewu sumbayang nampan kawan ulun Yahudi atawa kawan ulun Yunani, parisaya ma Yesus.

⁵Dami hi Silas anri hi Timotius hawi teka Makedonia, hi Paulus ngampuriran katuluh waktuni pakai iwara Kabar Maeh teka Alatalla ma kawan ulun Yahudi neu Yesus yiru Raja Panyalamat sa najanji Alatalla.

⁶Kude daya kawan ulun santar nawan nelang ngahalaen hanye, hi Paulus balalu ngebas habu teka pakaianni yalah siri pakai ngampi itung here neu kahalaen here. Hanye kaeau, “Amun naun silaka, yiru hala naun raerai! Aku lapas tangan! Mulai itati aku sagar tulak ma kawan ulun sa puang Yahudi.”

⁷Hi Paulus balalu nanan here tulak muneng ma sa lewu hang tuhi lewu sumbayang yiru. Lewu yiru lewu wat ulun sa puang Yahudi, kude hanye nyambah Alatalla. Ulun yiru bangaran hi Titius Yustus.

⁸Kude hi Krispus, kapala lewu sumbayang yiru baya kawan anak tukuini parisaya ma Yesus. Nelang rama pada kawan ulun Korintus lainni nyanrengei kabar sa natahampe daya Paulus, balalu here parisaya ma Yesus palus nabaptis.

⁹Hang hinra malem hawuang paninungan, Tuhan kaeau ma hi Paulus, “Ada Takut! Bapaner tarus nelang ada suni.

¹⁰Daya aku nyinrah hanyu. Puang sunah erang kaulun kaiyuh nampalus sa jahat ma hanyu, daya rama ulun hang tumpuk yiti samula ulun watku.”

¹¹Daya gana yiru hi Paulus muneng hang Korintus isa satengah taun lawahni neu ngajar lengan Alatalla ma here.

¹²Tawuk hi Galio jari gubernur Akhaya, kawan ulun Yahudi isa pakat nawan hi Paulus nelang ngising hanye ma pangadilan.

¹³Here mangadu kala yiti, “Ulun yiti nantiring ulun rama nampan nyambah Alatalla makai sara sa puang susuk anri hukum Moses!”

¹⁴Dami hi Paulus ngunu nuing, hi Galio haut kaeau ma kawan ulun Yahudi! “U naun ulun Yahudi! amun sa nakadu yiti hal kahalaen atawa kajahaten, samula puang hala amun aku sabar nyanrengei pangaduan yiti.

¹⁵Kude yiti hanyeyiru pibantahan neu kawan lengan anri kawan ngaran nelang kawan hukum wat naun raerai! Jadi naun harus nangkaehni. Aku kabaratan mangadili kawan hal sa kalayiti!”

¹⁶Hi Galio balalu ngusir here kaluar.

¹⁷Here balalu nyamba hi Sostenes kapala lewu sumbayang yiru, balalu ngakasah hanye hang hadapan meja pangadilan. Kude hi Galio budas puang paduli neu hal yiru.

¹⁸Udi yiru hi Paulus magun lawah muneng hang Korintus. Lawah udi yiru hanye ngantuh salamat muneng ma kawan ulun parisaya hang yiru, balalu tulak balayar baya hi Priskila anri hi Akwila ma Siria. Hang Kengkrea, hi Paulus nyukur wuluni sa haut lawah napaladarni ambau daya hajatni ma Tuhan.

¹⁹Tawuk hampe Epesus hi Paulus nanan hi Priskila anri hi Akwila, balalu masuk ma wuang lewu sumbayang palus bapaner anri kawan ulun Yahudi hang yiru.

²⁰Here ilaku nampan hanye muneng labis lawah lagi baya here, kude hi Paulus puang hakun.

²¹Kude biar kalayiru tawuk kai tulak, hanye kaeau, “Amun manyu kabahumen Alatalla, aku sagar mulek lagi ma yiti.” Udi kaeau kalayiru hanye balalu tulak ma Epesus.

²²Dami minau hang Kaisarea, hanye tulak ma Yerusalem lepuh nabe kawan Ungkup hang yiru, balalu palus ma Antiokhia.

²³Udi muneng hang yiru papire lawahni, hanye tulak lagi nunung daerah Galatia anri Firgia nampan ngampi kansing iman kawan ulun parisaya.

²⁴Hang tawuk yiru, hawi ma Epesus erang kaulun Yahudi kalahiran Aleksandria, ngaranni hi Apolos. Hanye pandai bapaner nelang kataru tuu neu isi Surat Barasis,

²⁵nelang haut naajar neu mantaru ajaran neu Yesus. Balalu anri samangat sa tamam hanye ngajar anri taliti neu Yesus, biar ekat baptisan Yohanes sa katuruenni.

²⁶Anri heei hi Apolos mulai bapaner hang lewu sumbayang nelang tawuk hi Priskila anri hi Akwila karengei inun sa naajarni, here nginsing hanye ma lewu. Hang yaru here manarang ma hanye bujur tatuu lagi neu ransana Alatalla nyalamat murunsia itetei Yesus.

²⁷Udiyiru hi Apolos ngaheng tulak ma Akhaya. Balalu kawan ulun sa parisaya ma Yesus hang Epesus nulis surat ma kawan ulun sa parisaya hang Akhaya nampan here hakun nerime hi Apolos. Nelang tawuk hi Apolos hampe hang Akhaya, pangarawahenni tuu bariran ma kawan ulun sa daya lelu Alatalla haut parisaya ma Yesus.

²⁸Daya anri bapangaruh tuu, hi Apolos nyantalau kawan ulun Yahudi basual hang penah rama. Nelang hanye nutui bukti anri kawan ayat teka Surat Barasis neu Yesus yiru Raja Panyalamat sa najanji.