Read Ma'anyan KESAH KAWAN RASUL 19 Bible Online

KESAH KAWAN RASUL 19 - Ma'anyan bible

KESAH KAWAN RASUL 19

¹Tawuk hi Apolos naan hang Korintus, hi Paulus takia nyanitar padalaman hang daerah yiru balalu hampe hang Epesus. Hang yaru hanye panalu anri papire kaulun sa haut parisaya ma Yesus.

²Hanye nunti ma here, “Inun haut naun narime Roh Alatalla tawuk naun parisaya ma Yesus?” Here nuing, “Huan. Likan kami huan suah karengei Roh Alatalla yiru naan.”

³“Amun kalayiru, makai baptisan inun naun nabaptis?” tunti Paulus. “Makai baptisan Yohanes,” tuing here.

⁴Balalu hi Paulus kaeau, “Hi Yohanes mambaptis ulun umak nantarang kawan ulun yiru haut batobat teka kawan dosa here. Kude tawuk yiru pada hi Yohanes iwara ma kawan ulun Israel here harus parisaya ma ulun sa sagar hawi hanrian teka hanye, hanyeyiru Yesus.”

⁵Dami here karengei hal yiru, here balalu nabaptis hawuang ngaran Tuhan Yesus.

⁶Hang tawuk hi Paulus hanrampak tanganni hang ambau here, Roh Alatalla minau ma ambau here, balalu here mulai bapaner makai kawan basa sa aneh-aneh nelang nampe kabar teka Alatalla.

⁷Jumalah here katuluh naan leu dua walas kaulun.

⁸Salawah telu wulan anri puang takut-takut hi Paulus puang taduh haut bapaner ma kawan ulun hang lewu sumbayang nelang basual anri here nampan ngampi yakin here neu kewangun Alatalla marentah yalah Raja.

⁹Kude papire teka kawan ulun yiru mape atei nelang puang hamen parisaya. Hang hadapan katuluh ulun sa bakumpul hang yiru here ngampahe ajaran neu ransana Alatalla neu nyalamat murunsia itetei Yesus. Daya yiru hi Paulus balalu nanan here, balalu tulak baya kawan ulun sa parisaya Yesus ma ruang kuliah Tiranus. Hang yiru hanye tiap anrau basual jawab anri kawan ulun hang yiru.

¹⁰Hanye saratang ngulah kala yiru erang taun lawahni hampe katuluh ulun sa muneng hang propinsi Asia, hau ulun Yahudi atawa ulun bangsa lain, katuluhni karengei lengan Alatalla.

¹¹Alatalla ngulah kawan kaajaiban sa luar biasa itetei hi Paulus.

¹²Amun sapu tangan atawa kain panuruk pinggang sa suah napakai daya Paulus nainsing ma kawan ulun sakit, panyakit here balalu wawai nelang roh jahat pada kaluar teka here.

¹³Naan papire dukun Yahudi sa tulak maawe-awe, ngusir kawan roh jahat teka kawan ulun. Kawan dukun yiru mansuba pada makai ngaran Yesus neu ngusir kawan roh jahat yiru. Here kaeau ma kawan roh jahat yiru, “Hawuang ngaran Yesus sa nawara daya Paulus yiru, aku ngusir naun!”

¹⁴Naan pitu anak upu erang kaulun imam kapala, bangaran hi Skewa, sa nampalus hal kala yiru.

¹⁵Kude roh jahat yiru kaeau ma here, “Aku kataru Yesus, nelang hi Paulus taruku pada, kude naun yiti hie?”

¹⁶Balalu ulun sa karasukan roh jahat yiru nanturak palus ngahangan here anri bahimat hampe here nempat teka lewu yiru ngendei batan nelang tabentur, daya pakaian here sitat pawelah teka tenga here.

¹⁷Katuluh ulun Yahudi anri kawan ulun bangsa lain sa muneng hang Epesus karengei neu kajadian yiru, here balalu takut. Daya yiru ngaran Tuhan Yesus magin natawat.

¹⁸Rama ulun sa haut parisaya ma Yesus, hawi mangaku hang penah rama kawan ulahan here hang tawuk dahulu hie.

¹⁹Nelang here sa biasa makai alimu pitua, ngumpul kawan buku here palus nutungni hang hadapan ulun rama. Haraga kawan buku yiru amun najumalah katuluhni naan leu dimem pulu ribu duit perak.

²⁰Anri sara sa luar biasa kalayiru lengan Tuhan magin tayap nelang magin tamam pangaruhni.

²¹Udi kawan kajadian yiru, hi Paulus nukas tulak ma Makedonia anri Akhaya balalu palus ma Yerusalem. “Udi hengka yaru,” eau Paulus, “Aku harus tulak ma Roma pada.”

²²Balalu hanye ngirim rueh kaulun teka kawan pambantuni, hanyeyiru hi Timotius anri hi Erastus tulak ma Makedonia, kude hanye magun muneng papire wulan hang propinsi Asia.

²³Nakakira hang tawuk yiru naan karawekan sa hante hang Epesus daya ajaran neu Yesus.

²⁴Daya hang tumpuk yiru naan erang kaulun tukang perak bangaran hi Demetrius, sa ngulah kawan lewu dewa ma Dewi Artemis. Ngakali ulun yiru ngami hasil sa hante ma kawan ulun tukang ulahni.

²⁵Daya yiru hanye ngumpul kawan buruhni baya anri kawan buruh tukang perak lainni, balalu kaeau, “Pulaksanai katuluh! Naun karasa takam kaiyuh panghasilan teka pagawian yiti.

²⁶Itati naun haut kadinung nelang karengei raerai inun sa naulah daya Paulus yiru. Hanye kaeau himat kawan dewa sa naulah daya murunsia budas puang dewa. Nelang hanye haut kaiyuh ngulah rama hang yiti ulun parisaya ma ajaranni, puang ekat hang Epesus kude bilang hang katuluh daerah Asia.

²⁷Bahayani hanyeyiru ngakali takam yiti tau kaiyuh ngaran sa puang maeh nelang puang ekat yiru malengkan lewu Dewi Artemis pada sagar naanggap puang ingangaran nelang pihanteni sagar naampahe; padahal hanye dewi sa natawat daya katuluh ulun hang Asia nelang hang litar dunia!”

²⁸Dami kawan ulun yiru karengei neu hal yiru atei here balalu panas, anri lengan mehet here balalu kaeau, “Welum Artemis, dewi ulun Epesus!”

²⁹Balalu karawekan yiru magin tayap hampe litar tumpuk. Kamulek kawan gorombolan sa ngulah rawek yiru nyamba hi Gayus anri hi Aristarkhus, hanyeyiru kawan ulun Makedonia sa nengau hi Paulus hawuang pakiaanni, balalu nyujut here ma stadion tumpuk yiru.

³⁰Hi Paulus ngunu masuk naharak here, kude kawan ulun sa parisaya ma Yesus hang yaru nguring hanye.

³¹Papire pambesar propinsi Asia yiru pada, sa panatangke anri hi Paulus, nunyu ulun iwara ma hi Paulus nampan hanye ada ngalalea tengani hang stadion yiru.

³²Hentek yiru kawan ulun sa bakumpul hang stadion yiru haut rawek rukah. Naan sa kaeau kalayiti, naan sa kaeau kalayiru, daya karamaan teka here puang karasa inun sababni here bakumpul hang yiru.

³³Meheni teka kawan ulun yiru minda hi Aleksander sa ngulah sababni, daya hanye sa natunjul daya kawan ulun Yahudi maju ma muka. Hi Aleksander ngami isyarat makai tanganni nampan ilaku naami kasampatan mambela diri hang hadapan kawan ulun yiru.

³⁴Kude kalayiru here kadinung sa hanye ulun Yahudi, anri lengan mehet here sinrah-sinrah kaeau, “Welum Artemis, dewi ulun Epesus!”

³⁵Akhirni panitera tumpuk bahasil ngampi suni kawan ulun rama yiru. Hanye kaeau, “Panduduk Epesus! Ulun katuluh uras karasa Epesus tumpuk sa malihara lewu Dewi Artemis anri watu barasis sa lawu teka langit.

³⁶Puang uweng sunah erang kaulun sa kaiyuh mambantah hal yiru. Daya yiru ware naun suni nelang ada ngulah ala inun-inun anri babaran.

³⁷Kawan ulun yiti, insing naun ma yiti puang daya here haut marapuk lewu dewi atawa daya here haut mahina dewi takam.

³⁸Amun hi Demetrius anri kawan buruhni yiru naan isa pangaduan nuju erang kaulun, elahni here nginsing pakarani yiru ma pangadilan. Pangadilan nauka neu hal yiru nelang kawan pajabat pamarentah pada saratang naan.

³⁹Kude amun magun naan lagi hal sa lain sa naaheng daya naun, yiru harus nasanuput hang rapat umum sa sah.

⁴⁰Daya kajadian sa jari hang anrau yiti tau mambahaya takam. Takam tau natuduh ngulah pambaruntakan, daya takam puang uweng sunah isa tujuan pakai ngawuahan pirawekan yiti.”

⁴¹Udi kaeau kalayiru, panitera tumpuk yiru balalu nunyu kawan ulun yiru mudi.