Read Ma'anyan KESAH KAWAN RASUL 21 Bible Online

KESAH KAWAN RASUL 21 - Ma'anyan bible

KESAH KAWAN RASUL 21

¹Kami iwara tulak ma kawan pamimpin ungkup teka Epesus yiru, udi hie kami nanan here. Balalu kami tulak balayar nuju pulau Kos; hang anrau keatunini kami hampe hang pulau Rodos. Teka yaru kami balayar palus ma palabuhan Patara.

²Hang Patara, kami panalu kapal sa ngunu ma Fenesia. Kami sungkat kapal yiru balalu tulak

³palus balayar hampe kami kadinung pulau Siprus hang tiba tuhi kawi kami; kude kami tarus balayar nuju Siria. Kami tarie mambai hang Tirus, daya kapal sa na tumpang kami yiru sagar mungkar muatanni.

⁴Hang unengan yiru kami tulak nunung kawan ulun sa parisaya ma Yesus, balalu muneng baya here salawah erang minggu. Manyu patitah teka Roh Alatalla here ngami nasehat ma hi Paulus nampan ada tulak ma Yerusalem.

⁵Kude dami galis waktuni kami muneng hang yiru, kami nanan here balalu nampalus pakiaan kami. Here katuluhni baya kawan anak darangan here ngatet kami hampe maluar tumpuk. Hang yaru hang pinggir pantai, kami katuluh ileku balalu badoa.

⁶Udi yiru kami batabe, balalu kami sungkat ma kapal nelang here pada mudi ma lewu here.

⁷Kami balayar palus teka Tirus hampe ma Ptolemais. Hang yaru kami tulak nunung kawan ulun sa parisaya, nampan nampe tabe ma here palus muneng erang anrau hang yaru baya here.

⁸Hang anrau keatunini kami tulak lagi, balalu hampe hang Kaesarea. Hang yiru kami tulak nunung erang kaulun panginjil bangaran hi Filipus, balalu muneng hang lewuni. Hanye erang kaulun teka kapitu kaulun sa na pidi hang Yerusalem.

⁹Epat kaulun anakni wawei bujang haut naami kakuaten daya Alatalla nampan iwara kabar teka Alatalla.

¹⁰Udi papire lawahni kami hang yiru, naan hawi teka Yudea erang kaulun nabi bangaran hi Agabus.

¹¹Hanye hawi nunung kami balalu ngalap ikat pinggang Paulus. Makai ikat pinggang yiru hanye nuruk pee anri tanganni raerai balalu kaeau, “Iti sa nawara daya Roh Alatalla: Sa ampun ikat pinggang yiti sagar nahuruk kala yiti hang Yerusalem daya kawan ulun Yahudi balalu nasarah ma kawan ulun sa puang Yahudi.”

¹²Tawuk kami karengei hal yiru, kami anri katuluh ulun sa perisaya sa muneng hang Kaesarea ilaku tatuu anri hi Paulus nampan hanye ada tulak ma Yerusalem.

¹³Kude hanye nuing, “Inun gunani naun nungkau kala yiti hampe ngulah ateiku lenuh? Aku haut sadia puang ekat najamba hang yaru, kude pada hampe matei daya gana Tuhan Yesus.”

¹⁴Hi Paulus puang hakun nyanrengei lengan kami, kami balalu taduh nguring hanye. “Elah kabahumen Alatalla sa jari.” eau kami.

¹⁵Udi muneng hang yiru papire lawahni, kami natap kawan barang kami, balalu tulak ma Yerusalem.

¹⁶Papire kaulun ulun parisaya teka Kaesarea tulak pada sinrah baya kami neu ngatet kami ma lewu Manason, daya hang yiru kami sagar amalem. (Hi Manason hanyeyiru ulun Siprus sa haut lawah jari ulun umba Yesus.)

¹⁷Tawuk kami hampe hang Yerusalem, kawan ulun sa parisaya hang yiru narime kami anri sanang atei.

¹⁸Hang anrau keatunini hi Paulus tulak sinrah baya kami nunung hi Yakobus; katuluh pamimpin ungkup naan hang yiru pada.

¹⁹Udi nabe here, hi Paulus nyarita ma here inun sa haut naulah Alatalla itetei hanye hang penah ulun sa puang Yahudi.

²⁰Udi nyanrengei sarita Paulus yiru, here katuluh nawat Alatalla. Udi hie here kaeau ma hi Paulus, “Paulus! Hanyu harus karasa samula haut baribu-ribu ulun Yahudi sa parisaya ma Yesus. Here katuluh hanyeyiru kawan ulun sa satia ma hukum taurat Moses.

²¹Nelang itati here karengei hanyu haut ngajar katuluh ulun Yahudi sa muneng hang penah bangsa lain, nampan here napas hukum Moses. Hanyu ngami nasehat ma here nampan here puang nyunat kawan anak here atawa makai adat istiadat Yahudi.

²²Itati kawan ulun Yahudi sa parisaya yiru himat sagar karengei hanyu naan hang yiti. Jadi, kewangun itati?

²³Pangakaehni hanyu nuu nasehat kami. Naan epat kaulun hang yiti sa haut bajanji ma Tuhan.

²⁴Nah, ware hanyu tulak ngulah upasara ngabarasis tenga baya anri here, nelang bayar kawan biaya here nampan here nyukur wulu here. Anri kalayiru sagar bawilah ma katuluh ulun kawan inun sa rengei here neu hanyu yiru puang tuu, daya hanyu raerai pada nampalus hukum Moses.

²⁵Kude neu kawan ulun sa puang Yahudi sa haut parisaya ma Yesus, kami haut ngirim surat ma here nampan puang iyuh nguta kutaen sa haut na sarah ma barhala, puang iyuh nguta ira, atawa nguta eha sa matei na keat; nelang puang iyuh ngulah kawan ulahan sa cabul.”

²⁶Hi Paulus balalu tulak baya kaepat kaulun yiru nampalus upasara ngabaris tenga sinrah anri here hang anrau keatunini. Udi hie here masuk malewu Tuhan nampan iwara papire anrau lagi iriai upasara ngabarasis tenga yiru luput nelang parapah ma tiap tenga here nasarah.

²⁷Dami wayah sa natantu pitu anrau yiru kai galis, papire ulun Yahudi teka Asia kadinung hi Paulus hawuang Lewu Tuhan. Balalu here nantiring kawan ulun rama, udi yiru negei hi Paulus

²⁸nelang anri lengan mahet kaeau, “U, kawan ulun Israel, karawah! Iti ulunni sa tulak maawe-awe ngajar ma katuluh ulun kawan ajaran sa nawan bangsa Israel, nawan hukum Moses nelang nawan Lewu Tuhan yiti. Nelang itati hanye likan nginsing kawan ulun sa puang Yahudi masuk ma Lewu Tuhan balalu ngampi najis unengan sa barasis yiti!” (

²⁹Here kaeau kala yiru daya here haut kadinung hi Trofimus ulun Epesus yiru hang tumpuk baya hi Paulus; nelang here minda hi Paulus haut nginsing hanye masuk ma wuang Lewu Tuhan.)

³⁰Litar tumpuk balalu rawek rukah, nelang katuluh ulun nempat ikuruwundung. Here nyamba hi Paulus balalu nyujut hanye kaluar teka wuang Lewu Tuhan. Tawuk yiru pada wanawang Lewu Tuhan natutup.

³¹Parahatan kawan ulun ngulah deruh yiru ngunu munu hi Paulus, ulun iwara ma komandan pasukan Roma. Hang litar Yerusalem rahat rawek rukah.

³²Komandan yiru balalu palus ngalap papire perwira anri prajurit tulak iwawansit baya here ma unengan huru-hara yiru. Tawuk ulun rama kadinung komandan yiru anri pasukanni, here taduh ngakasah hi Paulus.

³³Komandan yiru tulak nunung hi Paulus palus nyamba hanye, balalu nunyu ulun nuruk hanye. Udi hie komandan yiru nunti neu hie hi Paulus yiru nelang inun sa haut naulahni.

³⁴Meheni teka ulun rama yiru kaeau kalayiti nelang meheni lagi kaeau kalayiru. Hampe kaadaan tuu rawek rangkit hampe komandan yiru puang karasa inun sa bujurni sa haut jari. Daya yiru hanye marentah nampan hi Paulus nainsing ma markas.

³⁵Tawuk here nginsing hanye hampe ma tukat, kawan ulun ngulah deruh yiru ngamuk bahimat hampe hi Paulus tapaksa nagantung daya kawan parajurit.

³⁶Here nataharak teka daya kawan garombolan sa ngulah deruh yiru nelang anri lengan mehet here kaeau, “Wunu hanye!”

³⁷Dami masuk mawuang markas, hi Paulus kaeau ma komandan yiru, “Iyuh aku bapaner erang pitus anri Tuan?” “Inun hanyu makai basa Yunani?” tunti komandan yiru.

³⁸“Amun kalayiru, hanyu puang ulun Mesir yiru sa jari pambaruntak balalu nginsing nempat epat ribu kaulun pangacau basanjata masuk mawuang padang gurun?”

³⁹Hi Paulus nuing, “Aku ulun Yahudi; aku waraga tumpuk Tarsus, tumpuk sa mambatang hang Kilikia. Awat lewa aku bapaner ma kawan ulun yiru.”

⁴⁰Dami hi Paulus naami ijin bapaner, hi Paulus minri hang tukat, balalu ngami isyarat anri tanganni. Katuluh ulun balalu suni. Udiyiru hi Paulus bapaner ma here makai basa Ibrani. Hi Paulus kaeau,