Read Ma'anyan KESAH KAWAN RASUL 22 Bible Online

KESAH KAWAN RASUL 22 - Ma'anyan bible

KESAH KAWAN RASUL 22

¹“Bapa-bapa anri kawan Pulaksanai katuluh! Aku hamen nampe pambelaanku ma naun. Suba rengei!”

²Tawuk here karengei hi Paulus bapaner hawuang basa Ibrani, here balalu magin suni. Hi Paulus nampalus kataranganni.

³“Aku yiti ulun Yahudi,” eau Paulus, “aku nakayaan hang Tarsus hang Negeri Kilikia, kude aku naampihante hang yiti hang Yerusalem nelang nadidik anri humur-humis daya guru besar Gamaliel hang hukum sa na ami daya Moses ma datu nini takam. Sameh kala naun katuluh hang yiti anrau yena, aku pada bahimat bagawi ma Alatalla.

⁴Aku ngakasah hampe matei kawan ulun sa umba ajaran wau yiru. Here katuluh hau upu atawa wawei, jambaku balalu tamasukku mawuang panjara.

⁵Imam Hante raerai anri katuluh Pangadilan Agama kaiyuh ngami kasaksian sa aku puang ipusu. Daya here yiru sa ngami ma aku surat pangantar sa natahampe ma kawan ulun Yahudi hang Damsyik. Makai surat yiru aku kaiyuh nyamba kawan ulun sa parisaya ma ajaran wau yiru hang yaru balalu nginsing here ma Yerusalem nampan nahukum.”

⁶“Tawuk aku ganjah hawuang pakiaan nelang haut kai hampe Damsyik, tawuk penah anrau, salenga naan sahaya sa maraai tatuu nyiar teka langit ngawariung aku.

⁷Aku tumbang ma tane balalu karengei naan lengan sa kaeau ma aku, ‘Saulus, Saulus! Wuah inun hanyu ngahanangen aku?’.

⁸Balalu aku nunti, ‘Hie hanyu, Tuan?’ ‘Aku yiti Yesus ulun Nasaret sa nakahanangen dayanu,’ tuingni.

⁹Kawan ulun sa naan hang yiru baya aku kadinung sahaya yiru, kude here puang karengei lengan sa bapaner anri aku.

¹⁰Balalu aku nunti lagi, ‘Inun sa harus na ulahku, Tuhan?’ Tuhan nuing, ‘Ambuan hulu ma Damsyik. Hang yaru die ma hanyu sagar nawara neu katuluh inun sa na kabahumen Alatalla naulah dayanu.’

¹¹Aku balalu pehe daya sahaya sa ngampi silau yiru. Balalu kawan hengauku nganyak aku masuk ma Damsyik.

¹²Hang yaru naan erang kaulun bangaran hi Ananias. Hanye erang kaulun mawitu bujur nelang ngalut nuu nampalus hukum Moses. Katuluh ulun Yahudi sa muneng hang Damsyik mahormat hanye.

¹³Hanye hawi nyuwuk aku, balalu minri hang tuhi aku nelang kaeau, ‘Saulus, hanyu kadinung lagi!’ Tawuk yiru pada aku mihangut ninung hanye.

¹⁴Udi yiru hanye kaeau ma aku, ‘Alatalla datu nini takam haut midi hanyu nampan hanyu karasa kabahumenni, nelang kadinung Yesus, Walah Alatalla sa nampalus kabahumen Alatalla nelang nyanrengei lengan Yesus raerai.

¹⁵Hanyu sagar jari saksi pakai iwara ma katuluh ulun inun sa haut dinung nelang rengeinu.

¹⁶Itati ada lagi lawah nganrei. Ambuan, palus sarah tenganu nampan nabaptis. Herau Tuhan nampan hanyu nasanepah teka kawan dosanu.’ ”

¹⁷“Aku mulek ma Yerusalem, nelang tawuk aku rahat badoa hang Lewu Tuhan, aku nakuasa daya Roh Alatalla.

¹⁸Aku kadinung Tuhan; hanye kaeau ma aku, ‘Hinang tanan Yerusalem, daya ulun hang yiti puang sagar narime kasaksiannu neu aku.’

¹⁹Aku kaeau, ‘Tuhan, here karasa tuu aku yiti haut masuk ma kawan lewu sumbayang nampan nyamba here nelang ngakasah kawan ulun sa parisaya ma hanyu.

²⁰Kalayiru pada tawuk saksinu hi Stefanus matei nawunnu, aku naan hang yiru nelang satuju hal yiru. Likan aku sa nyaga kawan pakaian ulun sa munu hanye.’

²¹Kude itati Tuhan kaeau kamulek ma aku, ‘Hulu tulak, daya aku sagar nunyu hanyu tulak ma unengan lawit ma kawan ulun sa puang Yahudi.’ ”

²²Ulun rama tatap nyanrengei hi Paulus bapaner, kude tawuk lengan sa pangalisan yiru here anri lengan mehet kaeau, “Wunu ulun sa kalayiru. Hanye puang patut welum!”

²³Nelang ngiak here ngebas jubah here nelang namur habu ma awan.

²⁴Balalu komandan Pasukan Roma yiru nunyu hi Paulus masuk ma markas nampan hanye napariksa hang yaru makai kakarasen neu ngarasa inun sababni kawan ulun Yahudi ngiak kalayiru nadap hanye.

²⁵Kude tawuk hi Paulus haut nahuruk nampan nakakasah, hi Paulus kaeau ma perwira sa minri hang yiru, “Inun hanyu iyuh ngakasah erang kaulun warga kerajaan Roma kapihuan hanye naadili?”

²⁶Karengei yiru, perwira yiru tulak nunung komandan pasukan balalu kaeau, “Inun sa sagar naulah nu? Ulun yiti warga negara Roma!”

²⁷Balalu komandan yiru tulak nunung hi Paulus palus nunti, “Suba wara, inun hanyu erang kaulun warga negara Roma!” “Hiai,” eau Paulus, “aku warga negara Roma.”

²⁸Komandan yiru kaeau kamulek, “Aku jari warga negara Roma anri bayar wahai tatuu!” Hi Paulus nuing, “Kude aku nakayaan samula warga negara Roma.”

²⁹Tawuk yiru pada kawan anggota tantara sa hamen mariksa hi Paulus yiru, mundur nelang komandan yiru pada balalu takut daya hanye haut mamborgol hi Paulus, padahal hi Paulus waraga negara Roma.

³⁰Komandan pasukan Roma yiru hamen tuu karasa inun sa bujurni sa ngulah kawan ulun Yahudi ngampi hala hi Paulus. Daya yiru hang anrau keatunini hanye nerau kawan imam kapala anri Pangadilan Agama nampan bakumpul. Hi Paulus balalu nalapas teka balungguni, udi hie nainsing mangadap here katuluh.