Read Ma'anyan KESAH KAWAN RASUL 23 Bible Online

KESAH KAWAN RASUL 23 - Ma'anyan bible

KESAH KAWAN RASUL 23

¹Hi Paulus maneneng kawan anggota pangadilan yiru balalu kaeau, “Pulaksanai katuluh! Hampe anrau yiti aku puang kaingkam naan kahalaen nadap Alatalla hang kunuan ateiku neu pamelumku.”

²Tawuk hi Paulus kaeau kalayiru, Imam Hante Ananias nunyu ulun sa minri hang rite ni Paulus nampar wawa Paulus.

³Hi Paulus balalu kaeau ma Imam Hante yiru, “Alatalla himat nampar hanyu, ulun jahat sa pura-pura barasis! Hanyu maharung hang yiru mangadili aku manurut hukum Moses, kude hanyu raerai malangar hukum yiru anri nunyu ulun nampar aku!”

⁴Kawan ulun sa naan hang rite hi Paulus kaeau ma hi Paulus, “Hanyu mahina Imam Hante wat Alatalla!”

⁵Hi Paulus nuing, “U pulaksanai, aku puang karasa, hanye imam hante. Samula hawuang Surat Barasis naan nasurat, ‘Ada hanyu mahina pamimpin bangsanu.’ ”

⁶Hi Paulus kadinung naan meheni teka kawan anggota pangadilan yiru teka kawan ulun Saduki nelang meheni lagi teka kawan ulun Farisi. Daya yiru hanye kaeau ma pangadilan yiru, “Pulaksanai katuluh! Aku erang kaulun Farisi, katurunan Farisi. Aku naadili hang yiti daya gana aku parisaya himat kawan ulun sa haut matei sagar welum mulek.”

⁷Dami hanye kaeau kalayiru, kawan ulun Farisi anri kawan ulun Saduki yiru mulai basual, hampe sidang yiru tabagi jari rueh golongan. (

⁸Daya kawan ulun Saduki bapandapat ulun matei puang sagar welum kamulek, nelang kawan malekat puang uweng, kalayiru pada roh puang uweng; kude ulun Farisi parisaya ma katuluh hal yiru.)

⁹Balalu timbul karawekan sa tamam. Papire ulun Farisi sa jari guru agama minri palus nawan bahimat. Here kaeau, “Manurut kami ulun yiti puang uweng hala sunah hena butit! Tau pada samula naan roh atawa malekat sa bapaner ma hanye!”

¹⁰Sual jawab yiru jari kalayiru tamamni hampe komandan yiru takut salenga hi Paulus sagar nakarubut daya here. Hanye balalu nunyu pasukanni tulak ngalap hi Paulus teka penah here yiru nginsing hanye ma markas.

¹¹Malem yiru pada Tuhan Yesus minri hang rite hi Paulus nelang kaeau, “Ampikansing ateinu! Hanyu haut ngami kasaksiannu neu aku hang Yerusalem. Hanyu sagar ngami kasaksian kalayiru pada hang Roma.”

¹²Kaiyat hinang hang anrau keatunini, kawan ulun Yahudi mulai ngulah komplotan. Here basumpah puang sagar kuman atawa nguut amun here huan munu hi Paulus.

¹³Naan labis teka epat pulu kaulun sa ngulah komplotan yiru.

¹⁴Here tulak nunung kawan imam kapala anri kawan pamimpin Yahudi nelang kaeau, “Kami haut sameh-sameh basumpah, puang sagar kuman atawa nguut inun-inun amun kami huan munu hi Paulus.

¹⁵Nah, itati naun anri kawan anggota Pangadilan Agama ware ngirim surat ma komandan pasukan Roma yiru nampan ilaku hanye nginsing hi Paulus mulek mangadap naun, yalah naun hamen mariksa parkarani lagi anri humur-humis. Balalu kami sagar basadia munu hanye kapihuan hanye hampe yiti.”

¹⁶Kude anak teka pulaksanai Paulus karengei neu ransana komplotan yiru. Hanye balalu tulak ma markas lepuh iwara neu hal yiru ma hi Paulus.

¹⁷Hi Paulus balalu nerau erang kaulun perwira balalu kaeau ma hanye, “Insing iya muda yiru nunung komandan; hanye naan sa hamen nalaporni ma komandan.”

¹⁸Perwira yiru nginsing iya muda yiru nunung komandan balalu kaeau, “Hi Paulus, tahanan yiru nerau aku nelang ilaku aku nginsing iya sa muda yiti nunung hanyu; hanye naan hamen nalaporni.”

¹⁹Komandan yiru negei tangan iya muda yiru, balalu nginsing hanye ngaraerai ma pinggir palus nunti, “Inun sa hamen nawaranu ma aku?”

²⁰Iya muda yiru nuing, “Kawan ulun Yahudi haut mapakat nampan ilaku tuan nginsing hi Paulus mangadap Pangadilan Agama keatuni, yalah here hamen mariksa lagi parkarani anri humur-humis.

²¹Kude ada tuan mulur pilakuan yiru, daya naan labis teka epat pulu kaulun sa rahat sanina neu mungun hanye hang lalan. Here katuluhni haut basumpah puang sagar kuman atawa nguut amun here huan kaiyuh munu hi Paulus. Itati pada here haut sadia, ekat nganrei jawaban teka tuan.”

²²Komandan yiru kaeau, “Ada iwara mahie-hie sa hanyu haut malapor yiti ma aku.” Balalu hanye nunyu iya muda yiru mudi.

²³Udi yiru komandan yiru nerau rueh kaulun perwira, balalu hanye kaeau ma here, “Sadia rueh jatuh prajurit baya pitumpulu tantara bakuda anri rueh jatuh tantara batumbak nampan tulak pukul suei kamalem yiti jua ma Kaisarea.

²⁴Sadia pada kuda neu napakai Paulus balalu insing hanye anri salamat hampe ma Gubernur Feliks.”

²⁵Balalu komandan yiru nulis surat sa lenganni kalayiti,

²⁶“Sa nahormat Gubernur Feliks. Tabe teka Klaudius Lisias!

²⁷Ulun yiti haut najamba daya kawan ulun Yahudi nelang ane wunu here, amun aku puang hawi anri pasukanku balalu nyalamat hanye; daya aku karengei hanye warga nagara Roma.

²⁸Daya aku hamen ngarasa inun sabujurni kahalaen sa nadawa ma hanye, balalu aku nginsing hanye ma Pangadilan Agama here.

²⁹Tena tuu hanye puang uweng ngulah kahalaen inun-inun hampe hanye patut nahukum anri hukuman mati atawa napanjara. Dawaan here ma hanye ekat neu sara anri kawan hukum agama here raerai.

³⁰Udi hie aku naan narime laporan naan ransana sa jahat teka kawan ulun Yahudi nadap hanye. Jadi aku langsung ngirim hanye ma Tuan Gubernur. Nelang aku haut nunyu kawan ulun sa nawa hanye nginsing pangaduan here nadap hanye ma tuan.”

³¹Kawan anggota tantara yiru balalu nampalus tugas here. Here ngalap hi Paulus balalu nginsing hanye malem yiru jua hampe ma Antipatris.

³²Anrau keatunini here nunyu pasukan bakuda nampalus pakiaan baya hi Paulus, kude here raerai mulek ma markas.

³³Tawuk pasukan bakuda yiru hampe hang Kaisarea, here nampe surat yiru ma Gubernur, balalu nyarah hi Paulus ma hanye.

³⁴Udi Gubernur mambasa surat yiru, hanye nunti ma hi Paulus teka awe asalni. Tawuk hanye karasa hi Paulus baasal teka Kilikia,

³⁵hanye kaeau, “Maehleh! Aku sagar mariksa parkaranu, amun kawan ulun sa mangadu hanyu haut hampe yiti.” Balalu hanye marentah nampan hi Paulus natahan hang istana Herodes.